Trump Nih Nu Pawl Sin In Vote A Hmuh Lo Ding Fiang Ngai

USA president thimnak ah media hi hmunhma a la tuk i bia aa sum lo i lungchuak paoh a chimmi cu media ah hmun an ngei deuh ko. Atu zong Trump nih nu pawl celh lo ding bia a hon chim tthan i hawi dangh an thawng a daih ngai lio ah amah kong cu a puah in puak tthan.

"Nau aa hrawkmi nu cu daan-tat (punish) ding a si ko," tiah Republican president caah uarbik a simi Donald Trump nih a chim. 


Mah bia cu nihin i MSNBC TV-channel nih interview an tuah lio ah a chimmi a si i biahaltu Chris Mathews nih nau aa hrawkmi hna hi daan-tat awk an si tiah na ruat maw, tiah a hal i a lehmi a si.

- Mah bantuk a tuahmi hna daantatnak pakhat cu a um awk a si ko, tiah Trump nih a leh.

- Daantatnak cu nu caah maw a si hnga?

- Si, (nu caah.).

Relchap: Trump hi Hitler A Lo

Biahaltu nih Trump cu president si law nau hrawh hi na kham lai maw, tiah a hal chap. Trump nih aa thawh i "Umm, hlan bantuk in mi (naupawimi) nih phung lo ning in i hrawhnak an rak kawl chan ah kan kir men hnga,- asinain mah hi cu kham awk bak a si," tiah a leh.

Nu pawl cu zeibantuk daantatnak dah pek awk an si timi cu a chim kho lo.

Mah hi bia a chimmi cu Twitter ah Bernie le Clinton nih an hon leh colh ve.

Repchap: US president aa cuh ding an fiang ti khawh si

A bia a leet tthan. Interview i chim tlawmpal ah Twitter in an den colh hnu in a lungfim rua, a rannak in a biachimmi cu a leet tthan.

- Nau aa hrawkmi kha daantat lo in a hrawk piaktu siibawi pawl hi daantat hna awk a si, tiah a chim tthan.

Republican tampi nih Trump hi an duh lo, i cu a duh lotu tampi cu Senators le politics a hngalmi deuh an si hna. An duh lonak a ruang tampi lakah Latin, Mipeem, islam, zumlotu le nu hna sin in Vote a hmu kho lai lo ti an ruah caah a si.

Nu a aiawh i Nu kong biatak in a aupitu Hillary cu nu vote tampi a hmu lai, i Latin pawl sin zong in a hmu lai. Asinain Trump cu nu a nek ngaingaimi a si. Khrihfa nih nau hrawh kan duh lo nain amah le a caan, a hmun le thil sining in President cu an i cuh lai caah Trump cu Republican pawl nih an kham te lai tiah ka zumh.