President zung nih Minister Post a chuahpimi 21 lakah 4 cu Aung San Suu Kyi nih tlaih ding a si. Mah cu chung ah cun Minister in the President Office a si aa tel i a cung i kan chimmi nawlngeihnak a tlaih khawh nakding caah a biapibikmi Post ah a cang. President Office in amah nih thimmi President Htin Kyaw cu ruahnak a pek lai i a duhning in a hruai khawh lai.
Asinain mah lawng aa zaa lo. Kawlram ah a biapi tuk tiah a ruahmi Education Reform caah Education Minister Post zong tlaih chih ding a si. Fimcawnnak kong hi kan thlen lo a si ahcun kan ram a tthangcho kho lai lo tiah a zumh caah duhsah deuh in hi Post caah minister cu thimm ding ah a ruah i a si lai, minung ttha a hmuh hlan a tlawmbik thla nga hrawng cu amah a ttuan chung lai ti a si.
2015 thimnak a dih hlan in President a si kho lo ding Aung San Suu Kyi nih hin zei Post dah a tlaih lai tiah a phunphun an purhdah lio ah "foreign minister" Post hi a tlaih lai tiah rak zumh a si bantuk in ramdang pehtlaihnak vuanci zong a tlaih chih ding pali lakah ai tel. Mah hi Post a tlaih a si ahcun a dang Post pawl hi a tei taktak lai lo. Kum 19 leng hmanh pei innthong an thlak cu tiah hi Post pali cu a tei ko lai a titu an um lai, nain thongtlaak timi le rianttuan timi hi aa van-vawlei. Minister cu minthutu sasawh le ruahnak petu sawh an si lo, meetings a tam tuk mi hmanh hi rianpi tuk a si.
Foreign Minister cu khual an tlawng tuk lai. Khualtlawn hi a rian bik a si i ramkip-pehtlaihnak, ramleng khualtlawnnak in a caan a dih lai caah a cung i kan chimmi Post pahnih caah caan a pe kho hnga maw? Cu ti a si ahcun a dang Post ah min lawng Minister cu maw a si lai?
(Foreign Minister a tlaih ahcun NLD he pehtlaihnak a chah a herh lai. Cucu Suu Kyi nih a duh lo taktakmi a si kho fawn, i NLD member nih an duh ngaimi a si khawh tikah Opposition Party nih an duh ngai ding a si.)
Realchap: NLD ah nawlngeihnak an i cuh te kho
Aung San Suu Kyi nih a tlaih herh bak lo tiah ruahmi Minister Post cu Energy a si. Post pakhat ah minister si dingah mah post he pehtlai in Degree lak khi a herh tukmi cu a si lo, i Suu Kyi nih a hruai khawh ko lai, hi Post lawng a tlaih ahcun. Tuluk nih Kawlram (Kachin lei i Dam a ser hnikmi kong) ah a riantunanak kong ah a tuartu mipi caah ruahchannak cu a um kho ngaimi a si. Nain cu ruahchannak cu kan ram ah a herh bikmi a si lo.
Thein Sein cozah lio ah Minister Post 30 hrawng a rak um i NLD le Htin Kyaw cozah ah Post 21 lawng um ding in an chuahpi. Mah ti cun uk a fawi deuh lai, hruai a fawi deuh lai. Zeicah tiah Minister a tlawm deuhdeuh paoh Suu Kyi nih a khontrawl (uk/tlaih) khawh hna lai. A ruang cu NLD in MP tling pawl lakah a zami thil ti khawhnak le thiamnak (A yee chin) ngeimi an tlawm tuk ti a fiang i uknak kong ah hmuhton (experience) an ngeihmi a tlawm tuk ti ah kan palh lai lo. Cucu Suu Kyi nih a theih tuk lai.
Tutan i minister post ah Suu Kyi nih pali a tlaih i a dang a taangmi 17 cu pa lawngte nih an tlaih fawn. Amah lawng nih pasal 17 a paih hna. Tuan ah cun President Htin Kyaw nupi kha Post pakhat tel cu a pek te hna lai tiah rak zumh ngai a si. Education Minister Post tel hi Nu a pe te hna hnga maw? Hi kong i cozah pakhat ah Nu an um lo nak ram le cozah a si ding hi khuaruah cikcek a herhmi a si hnga. Nu hi kan ram ah zeihmanh lo maw an si rih ko lai?
Laimi nih Vice President kan ttuanmi kan i lunghmuih ngaingai. I lawmh awk a si. Nain cozah ah a biapimi Minister Post pakhat hmanh kan tin lomi, cu rian tlai kho ding si khawhnak (qualify) a ngei lomi kan si caah maw a si, hmailei ahcun hi Post pawl a ttuan kho ding in kan i zuam i cu bantuk zong thim le thapek kan herh nakding ah i fahsak awk ngai a si.
Suu Kyi cu president a si khawh ti lo tikah a lam umnak paoh in Ram uk a hon duh cang. Rang tum 31 i cit cu a har lai tiah 21 ah a tthumh i pali cu an chaak tlaih aa zuam i a dang 18 cu hruai a timh hna. NLD chung ah nawlngeihnak tamtuk mi pakhat nih a tlaih hi cu hngalh cia a si nain cozah chung ah president a si lomi nih nawl tamtuk a ngeih tikah kan ram cu a daih ding nakin aa hninh lengmang ding a lam a tamdeuh. Zei caah tiah Ralkap nih an tlaihmi Home Affair, Defence and Border Affair karlak (chung) lawng ah a cawl kho ding a si tthiam ko.
Zei si hmanh ah, mah hi cu President nih a chuahpimi lawng a si rih i thla dih lei ah Parliament nih an fehter hnu ah Cozah muisam taktak cu a lang te hna.
Cc: Myanmar Times, BBC, Aljazeera, ABCnews
Comments
Post a Comment