2015/16 bawlung kum cu dih lei a panh cuahmah, i puai 11 hrawng cio lawng an taang hna. France League lawng hi pakhatnak a si dingmi PSG an timi 90% chim chung ngam awk a si, i Germany i pakhatnak a si lai tiah ruah ngaimi Bayern Muchen zong an hon tlak ngaingai caah chim ngam a har. Cu bantuk in La Liga, Premier League le Serie A cu pakhatnak a si kho ding Club 2/3 cu an um ve hna.
Cuti a si ko nain a ralaimi tthaal caan i micawk le zuar tik caah mi an i zoh cia hna. Ronaldo le Ramos nih Real Madrid chuah tak an duh, i innka a onhtu club hodah a si ti a tang ah zoh.
Chelsea nih Paul Pogba cu an ngiar ceomo rih. Juventus nih an thlah sian lo a si ahcun phaisa tlawmpal pinah Nemanja Matic he thlen ding tiang Chelsea nih a duh. Chelsea nih an duh rihmi cu Napoli hmaikal, Real Madrid hmaikal hlun a simi Gonzalo Higuain a si. Daily Star ttialnak ah Higuain cu Manchester United, Liverpool le Bayern nih an duh ve.
Chelsea nih hin manager an laa kho rih lo. Atletico Madrid manager khi an duh ngai ko nain nihin i Italy ram manager khi an duh ngai fawn. A fiangmi cu tthaal ah manager thar an ngei lai.
English Premier League tei ding ah duhpi ngaimi Arsenal cu an inn cia ah club fate nih an den hna hnu in ruahchannak a tlawm. Cu a si caah pensen lak lei a panh cangmi Arsene Wenger nih phaisa hman kai sum lai lo, a ti, i Dortmund i buri ah mai pum senh bang, goal a sut khomi Pierre-Emerick Aubameyang cu cawk ai zuam cuahmah. Cu lawng si lo Odion Ighalo le N'Golo Kante zong cawk a duh hna. Arsenal FC ngeitu nih tthaal i mi cawk nak caah Pund 70million nak tlawm lo a pek.
Real Madrid cu La Liga pakhatnak i cuhnak ah kar 5 hrawng hnu an pil caah ruahchannak a tlawmte cang. Mah cu lio ah Cristiano Ronaldo le Sergio Ramos nih Real Madrid in chuahnak nawl an hal, tiah Sport (Spain verson) nih a ttial. Kan hnu zarh Atletico nih an inncia ah an tei hna zanlei ah Ronaldo nih Real Madrid president Perez cu a chawnh ti a si.
Club lian pawl an hnatun a ttha, i Manchester United nih an pahnih ning in lak ding ah a duh ti cu Daily Express nih a ttial colh. Anmah pahnih caah Pund 115million chuah an ngamh tiah a ttial chih. ISCO cu Real nih zuar an duh, English premier league club pawl nih innka an hon i Arsenal nih an du khun.
Manager thlen aa fawih tukmi Real Madrid president nih Juventus manager Massimo Allegri cu Zidane chawngtu ding ah a zoh ziar ti a si. Tutan Champions League hi Zidane nih Real Madrid nih a teipi lo a si ahcun a rian phuah ding redi an si, tiah Dello Sport le AS nih an ttial.
Gary Neville cu Manchester United in aa ngol hnu tlawmpal ah La Liga i min ngei club Valencia FC manager a ttuan colh. A thawknak cu sungh lawngte nih a zulh tikah David Moyes bang a rian chuah colh an timh nain nai hrawng a pehpeh in teinak a hmuh caah 2018 tiang manager ttuan ding in Valencia ngeitu hna nih an hal.
England club lianlian a simi, Arsenal, United, City, Chelsea le Liverpool an i tong hna i Champions League in chuah (chuih ti lo) ding an ceih hna tiah The Sun nih a ttial. A ruangbik cu hi bantuk club lian pawl nih Champions League i telnak ding ah qualify* chuih a hau lo tiah an dirpi caah a si.
Asinan zumhtlak deuh a simi The Times nih a hon ttial tthanmi ah cun Champions League hi Europe lawng ah si lo in Asia le USA zong ah chuih ding in an ceih ti a sideuh. Hi hna club pawl i an i tinh bik mi cu phaisa tampi hmuh kha a si ko, i Asia le USA ah CPL an chuih a si ahcun atu an hmuhmi nakin a let in an hmuh lai ti a fian caah a si, a ti.
Champions League cu a lar i zoh a tong tukmi a si. Tu kum hodah a tei te lai?
Cc: The Telegraph, BBC, Daily Mail, The Independent, The Sun, Manchester Evening News, Daily Mirror, Daily Express le The Times.
Comments
Post a Comment