Tu zing ka tho i thawngpang nih a ka donmi cu ka lau, nain lawmhnak in lau a si. Chin miphun chung in Vice-president thim a si tikah miphun pakhat sinak in i lawm lo awk a ttha lo. Aung San Suu Kyi nih “a daimi ramkomh bu sernak ding ah tlangcungmi cu President chungtel ah thim an si, i tlangcungmi an si paoh ah a za tinak si lo, a herhmi thiamnak (thil ti khawhnak) a ngeih a herh,” a timi ah tlangcungmi nih kan ttuan khawh ve ko, timi nakin kan ttuan khawhnak an hmuh i an ttuantermi a si hrimhrim ko.Zei si hmanh ah, Pi Suu Kyi kong hi atu capar ah i hmaithlak ka duh caah bia ka pial lai.
2015 Election hlan thla hnih chung Kawlram ah ka rak um i NLD kalpimi ramkhel rian le lungput ka rak ngiat len ve. NLD dirhmun in cun uar a um lonak a rak tampi, nain Suu Kyi hi cu mi men lo taktak le Union of Myanmar caah um lo awk ttha lomi Pathian nih nun saunak a pekmi a si timi cu ka rak cawn. Minung sinak in a tling lomi cu a si hlei ah uartu a ngeih bantuk in uar lotu zong a ngei ve.
NLD le Suu Kyi nih President cung ah ka um lai, a rak timi kong ah capar ka rak ttialmi hi nihin rel tthan ding in kan sawm hna: NLD le Suu Kyi nawlngeihnak
NLD nih tei sehlaw, President na si lai maw? tiah an rak hal i teinak an rak hmu rih lo nain a rak lehmi hna cu “President cung ah ka um lai,” timi a rak si i nitlaklei mifim pawl le democracy ram tampi lila an khuaruah a rak har ngaingai. A ral zong a ttha, an rak ti. NLD nih teinak a hmuh tikah President si khawhnak ding aa zuam tiah Kawl ralbawi pawl a ton lengmangmi hna hmang in an rak sawisel tthan.
Mah cu a si caah “Suu Kyi hi president a si lai maw?” timi Debate a tuahtu hna an rak um. Sihmanhsehlaw, nunnak pek in hi phunghram hi ka ven lai a titu ralkap 25% tonak Parliament hmang in zeiti hmanh in Suu Kyi cu president a si kho ti lo. A sungkhan. A ngol. A lungdong.
“President cung ah ka um lai,” a rak timi hi amah zong nih a philh kho lai lo, i keimah hmanh nih ka philh kho lo. A um hi a poimi a si lo, keimah pumpak caah. Asinain ramkhel ning ah le nawlngeihnak i cuhnak ah a poipang a chuak sual te lai ti thinphang lawnglawng a si.
Atu ah Vice-president cu USDP si lomi Lai pasal a chuah khawh ding a bawmh. USDP nih nih a biapimi minister-post an tlaih lo ding aa zuam cuahmah. Ram aa thlenka a si, i hmuh thiamnak in kan kalpi lai tiah minister-post a rak kamh hna nain atu ah a si khawh chung in pek lo ding aa zuam, i USDP nih an halmi Shan ramtthen le Rakhain zong a pe te hna lai lo tiah ka ruah ko. NLD lawng silo in Parliament zong ah nawlngeihnak kha tlaih aa zuam cuahmah.
President a si kho ti lo nain “President chak tlaitu” a hong si dingmi a fiang ngaingai cang. NLD le Kawlram ramkhel ah a min lang lem lomi U Htin Kyaw cu President caah a dirpi.
U Htin Kyaw hi Pi Suu Kyi mawttaw mawngtu (driver a rak si) tiin mi tampi nih an theih. Mawttaw mawngtu ti tikah a mawng piakmi minung a um i cu nu/pa nih mawngh a fialnak paoh ah a mawngh ding kha a rian a si. Ruah lo ngai in U Htin Kyaw cu president a hong simi hi Suu Kyi nawlngeihnak a tthawnnak ding caah cun a tthabik a hong si lai. Zeica tiah amah hi naihniam takin saupi a um cangmi a si caah si ko.
U Htin Kyaw cu “Driver” sawh a si lo, leicung minthang Suu Kyi sianginn a rak kainak Oxford University in degree a la vemi a si. Cu pinah Kawlram ah catial thiam min ngei le hmaizahmi pa a si. Suu Kyi min in mi bawmhnak tuahmi Bu pakhat zong ah hruaitu bik a si fawn. Suu Kyi he an i naihniam tuk ti a lang.
President cu si kho ti hlah hmanhsehlaw, President he naihte in rian a ttuan lai i President hna cung ah a um lai timi cu el awk a har cang. Zeitiang dah a nawlngeihnak a si lai, timi cu anmah kar lawng ah ti bang aa dil ko lai.
Suu Kyi caah cun tlaknak le ngaihchiatnak ngai a si kho ko, nain amah nih ramkhel nawlngeihnak tthawng ngai i tlaih in a hruai khawh ding president aa thim khawh hna caah a kut ah nawlngeihnak cu a um hrimhrim i philh a si pah cangmi U Than Shwe kha mithlam ah a cuang tthan lengmang.
President fehternak cu March 30. ah a si lai. Nihin tiang teitu party hruaitu Suu Kyi nih Parliament hmang in NLD a kalpi mi ramkhel lamthluan a thuhnawh khawh peng zong hi nawl a ngeihnak pakhat a si.
Foto: Ap/dvb
Comments
Post a Comment