Keimah le Laica ttial kong:
Laiholh le ca duh kai thawk hi 2003 lawng in a si i a ttial ka thiam hi 2007 hnu lawng in a si. Tial kai thawk ah sawisel le pamh tiang ka rak ton, nain ka ngol lo. Ka tial lengmang i nihin tiang ka ttial. Keimah bantuk in ca pipa a rel kho lomi caah tiah Thawngpang Bultan tiin Fidi-biaruahnak ah thawngpang tawi tete ka rak ttial tawn. 2006 private-school ka kai lio ah Data-basic timi Computer lei cawnnak ka lak caah Blog le Website zeitin an tuah ti ka rak theih pah i ka tuah nain Laiholh in cu caan pek a phut lo caah ka rak ngol.
Relchap: Website le Blog An I Dannak
Cu ti Thawngpang Bultan ka rak ttialmi cu USA i kan hawile nih tha an ka pek i Google Ads. hna tuah law chuncaw-einak tel na hmuh lai, an rak ka ti. Norway mi ka hawipa zong nih 2010 ah a rak ka chimh ve, kan bawmh lai ti tiang. Asinain Global Chin News ah thawngpang ttial ding in an rak ka sawm i Google Ads. kong cu an sinin tampi ka rak i chap (ka theihmi a rak tlawm tuk bia mu). an cung ah kai lawm ngai.
Independent Blog:
Chinland Post ah thawngpang ka ttial pah nain, kei hi news tial lawng ka duh lo. Commentary phun ttial i keimah hmuhning capar ttial ka duh i cucu News Agency pawl he aa kalh caah Independent Blog ka sermi cu ka pehzulh i ka huam caan ah ca ka ttialnak hi a si.
Google Adsense hi Online phaisa hmuhnak ah a fawibikmi a si. Mah hi si lo in a dang in phaisa hmuh khawhnak a tampi, nain caan an laa, sok an hauh caah le phaisa i pekning kong ah tlawmte a buaideuh caah Google Ads. hi an hman cio. Phaisa tampi a hmu kho ding nih cun a dang an hman chih. Google nih phung a ngeihmi zulh lo ahcun phih piak a um tawn i kan nau pakhat cu an rak phih piak le a khuaruah a har ngai.
Relchap: Man Pek Hau Lo Blogging Site Thabik
Online in pawcawm an i tim, timi hi an chim pah lengmang. Capo zong a lo. Asinain a cung i ka chim cang bang Laiholh in cun ni khat ah sml.24 caan na pek hmanh a reltu le a zohtu an tlawm tuk caah ni kht ah dollar 15. na hmuh lo caan a tamdeuh lai. Cucu a phu lomi a si. Google Ads. in phaisa hmuh ruah ah ca a ttialmi cu an um ve, tawi tein mi rel duh ding an thim i ni khat ah thawngpang 5-10 an post hmanh ah thla a reltu minung tuak in pawcawm kho hna lo. Zeidang rian an tlolh sual le bang ahcun a poi chinchin.
Culio ah Norway um Laimi tampi nih Ads Blocker an hman hna i Blog/Website pawl i Google Ads. kan chiahmi tete hi an computer le Tablet pawl ah a lang lo. Cu ti a langh lo tikah Bloger/news Website pawl sinah phaisa a lut ti lo. Ads Blocker a hmangtu nih na postmi lawng an zoh, an rel khawh i Ads. na chiahmi pawl rian a ttuan lo.
Kanmah cu chim lo vawleicung holhpi a hmangmi English website pawl zong nih Ads. Blocker cu an huat tuk. Mah hi Laimi kan hman ngai ve tikah Google Ads kan tuahmi in phaisa a lut ding tluk in a lut hoi lo.
Google Ads. in pei phaisa an ngah hi tiah Laiholh blog le Website a kau duh ti lomi zong nan um. Kan holh le ca hi a lamkip in tthanchoter le kilkawi ding i bawmh khawh cio ahcun a ttha tuk ding a si. An website asiloah blog te hna zong Share piak khawh ahcun cucu bawmh cio a si ko.
Hmangtu tlawmte lawng a ngeimi Laiholh hin Online Business tuah i rum ding timi cu a har tukmi a si. Cucaah online i thawngpang a ttialtu, ca a kan tialpiaktu pawl hi kan bawmh khawh hna lo hmanh ah thapek khawh hi cu i zuam awk kan si.
A donghnak ah Laiholh hi kan dawt tuk awk a si ko, nain kan miphun tthancho khawh ve nak ding ah billion 3 hrawng nih hmanmi mirang holh asiloah nan umnak ram miphun holh in blog/website asiloah youtube in phaisa kawl khawh le chawlehnak tuah khawh i zuam cio ding in mino forh kan duh hna.
Comments
Post a Comment