Zahan cu Arsenal le Tottenham cu 2-2 in an dih caah le Leicester cu 1-0 in teinak a hmuh caah an i lawm ngaingai. Tu kum bawlung thawngpang ah cun Leicester kong hi a ropui bik. Asinain a ralaimi puai 9 hrawng ahhin an lumh sual ahcun Tottenham, Arsenal asiloah United a lo dengmi Manchester City nih 4-1 in Sunderland a tei i Hrai an thlir kho ding ah aa tel ve rih. United ttanhtu thachiat awk a si hlei lo, mizaw le aa khawngmi an dam dih ngawt cang i thlennak a um kho ko.
Bawlung biathli pawl, le ceihphaimi hi a tam tuk kho ko. Manager le a chuihtu pawl cu angki thlen in club an i thleng ve hna. An ceihphai hna ning tluk cun a si lai lo, nain nihin i bawlung vawlei ah an ceih ngaimi pawl kong hon zoh rih hna usih.
Manchester United hi atu Premier League ah Top-1 a simi Leicester nakin Champions League chuih ding ah an i tlaak deuh a titu Football-Expert an hong um len. A ralaimi Champions League kum ah an i tel ding hmanh a fiang rih lo nain Champions League thlen ding kong a ceihtu ah United aa tel ve.
Relchap: Real Madrid nih minung 10 chuah an duh hna
United le Mourinho kong English media pawl nih an ttialmi von i ceih ve hna usih law, Louis van Gaal nih Manchester United cu aa lenh rih ko lio ah thuh awk a ttha lomi cu Mourinho nih a chawn zau lai timi hi a si. United nih Mourinho cu catlap ah min an thutpi rih lo nain "pasal le pasal kar biatiamnak" an ngei cang tiah Italy miphun Football-expert a simi Gianluca Di Marzio nih a chim. Atu hi Mourinho cu Europe i bawlung buai kip zoh ah aa chawk i a ralaimi tthaal tikah Manchester i a kalpi ding minung a ngia hna tiah Marzio nih cun a chim chih.
Mourinho nih a duhmi hna cu The Sun nih thei sehlaw a dawh i PSG an putar Zlatan Ibrahimovic cu a duh ngai kong a chim. Inter Milan lio in aa dawmi an rak si. United nih hnukham an bau ngai caah Mourinho nih Real i a um lio ah a rak uar ngaimi Raphaël Varane hi aa thim cia fawn. Tulio i Juventus ah an bochanmi alaikal Stefano Sturano le Barcelona nih an sian theng lo din Marc Barta khi cawk ding in a duh hna tiah The Sun nih cun a ttial.
Relchap: FIFA president thar an thim khawh cang
Stefano a cawk khawh a si ahcun Marouane Fellaini, Bastien Schweinsteiger le Morgan Schneiderlin caah thinphan awk a si hnga.
Spain ah hei zuang usih law, Neymar nih Manchester City nakin Barcelona ral a simi Real Madrid ah i tthial ka duh deuh tiah Guardiola le City nih cawk an halmi cu a el hna.
England ah kir tthan usih. Leicester a cawisangtu Claudio Ranieri cu Italy ram caah lak ding ah thim hmasabikmi a si, tiah bia a chuak. Aruang cu tulio Italy manager Antonio Conte cu Chelsea nih Mourinho an chuah hnu in Chelsea manager ttuan ding ah bia a chuah peng caah a si. Ranieri zong hi club lian pawl nih an duh ngaingai.
England manager Roy Hodgson nih Manchester United teinak lei ah a hon luhpitu Marcus Rashford (18) cu a ralaimi Europe Cup ah lak ding aa tim ti a si. Marcus hi United caah voi thum lawng a chuih nain goal 4 a sut khawh.
Cc: Daily Mirror, Daily Mail, Daily Express, The Sun, The Guardian, The Times le Daily Record.
Comments
Post a Comment