Thawh tthan zarh chung cu America ah World Cup chuih khawh nakding a ramram an rak i zuam hna. Europe ah cun i hawikomhnak (Friendly Match7FM) an chuih ve hna i 2016 Europe Cup chuih tikah zei ram dah an tthawng te hnga tiin ka rak zoh ve hna.
UEFA EURO 2016 (Europe football championship) ah inntek a si ding France hi Automatic in an i tel caah i hawikomhnak (FM) lawng an chuih, i voi riat an chuihmi chung ah 7 teinak an hmu i goal an sutmi zong a tam. Cucaah nihin tiang cu a tthawng lei in an lang. Sihmanhsehlaw, ram kip nih chambaunak an ngeih dihmi tu zarh FM ah a lang.
France cu inntek a si lai bantuk in tutan ah ka zumh ngaingai hna. Germany le England hi an ttha ngaingai nain thinphang an si nak aa theih tuknak a um. Europe ah min ngei a simi Spain le Italy nih an deuh ngaingai. Cu a si caah EURO 2016 cu pakhatnak a si khomi ram 5+ an um tiah ka ruah.
Cu hna cu:
1. France
A kil tlimi zong an Form a tthat liote an si hna, i Atltico Madrid nih an i bochanmi Antoine Griezmann (25) nih Russia he an chuih ah FreeKick in a goal. Anthony Martial nakin Dimitri hi a thimdeuh te fawn lai tiah ka zumh. A dang pakhat cu kum 19 a simi Kingsley Coman hi a si, a rang taktak.
Real Madrid hmaikal Karim Benzema, France hmaikal tthabik cu Sextape kong ah atu tiang cu ram aiawh in chuih lo ding in an kham lio a si. April 15, ah bia an ceih lai i EURO 2016 a chuih khawh ding le chuih khawh lo ding a fiang lai.
Benzema hi kan herh tuk tiin chuihter khawh cu a si lai lo, nain a lam pakhat khat cu a um te khomi a si. A va chuih khawh te lo si le Arsenal caah goal a sut kho huaha lomi Olivier Giroud hi le Mexico Club ah a chuihmi Russia he an chuih ah a Form ttha i goal zong a sutmi Jean-Pierre Gignac hi a hmante hna a hau ko lai.
France hnukham hi an ttha ngai tawn nain tutan cu Evra a tar cang lawng si loin Sagna zong hlan bantuk a si ti lo. Alai hnukham Raphaël Varane le Laurent Koscielny tu cu vampang bantuk in an dir te lai. A hnubik an chuihmi Netherlands le Russia ah khan goal 4 an thlah i goal 3 cu kham awk ttha lo (set-pieces) bak an si.
2. Germany
World Cup teitu Germany hi EURO2016 ah an zumh cio te hna lai. an Coach Low nih Mesut Özil, Marco Reus le Toni Kroos hi a hmanbik te ttheo hna lai i anmah an um lo hmanh ah Sami Khedira, İlkay Gündoğan, Mario Götze pinah aa khawng i achuih kho te lai lo tiah ruahmi Bastian Schweinsteiger zong a dam kho temi a si.
Nihin tiang cu 3-4-3 Formation a hman i Italy kha 4-1 in a tei. Cu hlan deuh ah England nih an ram cia ah 2-3 in an va tei hna.
Hmaikal thim aa harh ngaingai. A taktak ti ahcun Thomas Muller hi manager paoh nih an duhmi a si ko nain Low nih a kil ah a tlikter, i Mario Gomez le Gotez tu hi England le Italy he an chuih ah khan hmai a kal ter hna. Cu a si bu ah Muller nih a puai hnih ning in goal a sut i hmaikal tthabik a si ko. Euro ah a thlen te hna lai dah.
Philipp Lahm cu World Cup a dih khan aa din cang, i Emre Can (liverpool) cu a chuih. Mino an um len nain International ah an chuih a tlawm tuk. Per Mertesacker le Miroslav Klose zong 2014 khan an i din cang i upa lungfim ah Schweinsteiger a taang nain aa hliam caah a chuih lo ding a fiang.
3. England
England nih 2-3 in Germany a van tei cu lung a tur daan te aa dang. Mino lawngte an si, i an chuihnak club ah anih nih timi lawngte aa zum taktakmi an si hna. A bikin Harry Kane, Dele Alli, Eric Dier le Jamie Vardy cu min thar tete an si. Ross Barkley le Raheem Sterling pinah an kehlei hnukham ROSE zong Cole vanhai lo in a dir ve.
England nih EURO2016 chuih khawhnak ding puai 10 an chuihmi cu sung lo tein an tei dih. An ram cia ah Netherlands nih 1-2 in an teimi hna tu hi i zumh taktak awk an ttha lo, an baunak an i kawl a herh lai.
England hnukham Cahill le John Stones hi ram caah chuihtlaak an si hnga maw timi bia kaa hal. Stones cu 19 hrawng lawng a si i hmailei ah hnukham minthang a si lai tiah Club lianlian nih an i cuh nain Netherlands he an chuih ah a tlau. Chelsea nih an hman tuk lomi Cahill cungah rian tampi a um lai. Wayne Rooney hi a lak lai i chuihter lo in a um khawh lai lo caah Kane le Vardy tu michawngtu an si te ding hi a poi bikmi a si.
4. Spaine
EURO2012 teitu Spaine nih an i nolh te lai tiah rak ruah a si nain 2014 World Cup ah mi an ral deuh. FM an chuihnak siseh EURO2016 ticket an kawlnak zongah lung an tling lo ngaingai.
Xavi le Xabi Alonso an um ti lo tikah Vicente del Bosque nih mi thim ding aa harh kho ngaimi a si. Spaine alaikal ttha an um ngai i an i rual ngawt hna caah hlan bantuk in an ttha ko lai. An hnukham an ttha ngaingai, Gerard Piqué le Sergio Ramos an tthawn lawng si loin Iker Casillas a chawngtu David de Gea hrim a thiam tuk.
An baunak bik cu hmaikal a si i David Villa a chuih ti lo hnu le hlan bantuk a si ti lomi Fernando Torres hi biatak in a hmang lo. Paco Alcácer le Álvaro Morata tiah le tu kum cu an club ah goal an sut kho bak lo.
Diego Costa hi WC ah a rak i bochan bak nain zei a si lomi a si i kum 35 a simi Aritz Aduriz tiah le akil in van tuah piakmi ai ziak bik nain Spaine chuih daan a si lo ai.
5. Belgium: A hnubik FM an chuih ah Portugal nih 2-1 in an tei hna. Vincent Kompany, De Bruyne, Hazard le Vertonghen an dam zau i ttha tein an chuih khawh a si ahcun Belgium hi a minung in cun a tthawng taktak lai. Hmaikal ah Romelu Lukaku hi Benteke le Origi nih an zuam lai i Romelu Lukaku hi a lang ngaingai te lai tiah ka zumh.
6. Italy: Kum tin ka ttanhbik tawn hna. Tu kum zong ka ttanh rih ko hna lai, nain Final cu an kai te lai ka zum lo. Zei ca tiah an Coach hi Chelsea nih laak an duh i ram caah ttuan cu um a har tuk, a ti tikah an ram nih fak ngaiin an sawi. Cucu an thazaang a dernak bik a si lai.
Italy cu hnukham an ttha zungzal i tutan ah Gianluigi Buffon, Giorgio Chiellini, Leonardo Bonucci le Andrea Barzagli hi vampang bantuk in an dir kho te lai. Sihmanhsehlaw, hmaikal ttha an ngei lo. Pirlo a um ti fawn lo. Marco Verratti aa khawn i a dam zau lai maw ti hngalh a si lo.
A chuih lo ding, hlam a si te dingmi ah Netherlands hi a si.
Foto: Skysport, DailyMail
Comments
Post a Comment