Champions League an chuih tthan cang. Real Madrid cu Roma 4-0 in a tei hnu ah Quarter-final ah an lan cang, i Ronaldo nih Champions League goal 90nak a rak sut. Anmah bantuk in Germany club Wolfsburg zong an lan ve cang.
Asinain nihin bawlung thawngpang ah hmunhma a lami cu Bayern Munchen manager Guardiola le Manchester City sport-director a thlite in an i tonmi kong a si.
Manchester City manager rian tlaih ding a rak i timh ahhin Guardiola nih Bayern in a chuah hlan cu Bayern Muchen kong lawng ruah ding le Bayern ca lawng ah a caan vialte hman ding in biakamnak a rak tuah. Sihmanhsehlaw, zahan cawnnikhat ni ah a thli tein City sport-director he Netherlands khualipi Amsterdam ah an i tonmi cu an rak poh hna.
A cung i nan hmuh bantuk in mi nih hngalh khawh lo dingin Guardiola cu aa thuam ko nain an theih tthiam ko. A pawngpa khi City-director cu a si. Netherlands thawngca lianbik le Daily Mirror nih cahmai pathum khat veve in hi kong cu tu zing ah an ttial. Journalist nih theih ding an rak duh lo, cun an pahnih in an iton theih lo ding in an i hrial cu an rak i zuam, tiah an ttial.
Tthaal i mi cawk ding le City hi zeitindah siamremh ding a si timi an ceih. Pep nih Dortmund i a chuih liomi Ilkay Gundogan cu a duh ngaingai caah mah kong cu biapi in an ceih. A dang pakhat Pep nih a duhmi cu Alex Oxlade-Chamberlain a si, i Arsenal ah aa khawn a tam pah caah le a chuih caan a tlawm caah i tthial a duh ngaimi Alex hi City ah a chuih te lai tiah ruah ngai a si.
Pep Guardiola nih City ah hmuh a duh lomi cu Wilfried Bony hi a si, tiah Mirror nih a ttial.
Manchester United ah i tthial hna usih.
England Premier League ah chuih sehlaw zoh a dawh ngai lai tiah mi tampi nih an duh ngaimi Zlatan Ibrahimovic cu United ah Mourinho nih a luhpi lai timi thawngpang a dai lo. Tu zan i Chelsea nih PSG a don tikah zoh bik ding cu amah hi a si fawn lai i United angki aa hruk te lai maw timi biahalnak cu a al rih lo ti a si.
Relchap: Mourinho Nih United Caah Mi Aa Kawl Cia
United, Arsenal le Chelsea nih cawk an duh ngaingaimi Borussia Dortmund hmaikal Pierre Emerick Aubameyang cu kan zuar lai lo tiah thawng an thanh.
PSG nih tu kum Chelsea i a langbikmi Willian cu cawk ding in an ngiar cuahmah. Anmah lawng an si lo, Tuluk club pathum nih hlawh saang pek ding in an leem cuahmah ve.
Pep Guardiola kong lawng chim cu, atu a umnak Bayern Munchen nih aa uangmi bawlung chuihthiam minung pali minthut a laak khawh tthan. Cu hna cu Alonso (2017 tiang), Boateng (2021 tiang), Martinez (2012 tiang) le Thomas Muller (2021 tiang) an si. Muller hi United nih an duh tukmi a rak si.
Barcelona nih Camp Nou cu mi tamdeuh i tlum ding in an kauh lai tiah thawng an thanh. A zohtu minung 100000 (sing 1) tlum ding an duh 2017/18 chung ah thawk colh ding in timh tuahnak an ngei.
A donghnak ah Sunderland FC director cu Adam Johnson kong ah an club rianttuannak a der caah amah tein a rian in a chuak. Adam cu a luancia kum 1-2 ah kum 15 lawng a simi ngakchia nu pakhat he sex a tuah caah voi tampi zung ah auh le a kong i buainak a rak um. Nain Sunderland nih chuah lo in an rak chuihter peng. Tu thla chung ah bia an ceih lai i thong a tlaak ding a fiang.
Cc: Daily Mirror, TV2 Sport, The Sun, Sky Sport, NTB
Comments
Post a Comment