Kan hnu ah FIFA president thar an thim kong ka rak ttial, i atu hi cu hlan i World Cup tuahnak caah FIFA nih eihmuarnak le ziknawh a rak tuahmi pawl cu a puang thluahmah cang. World Cup tuah duh ah FIFA nawlngeitu pawl phaisa a rak petu hna hna zong an theih hna i tazacuai ding an si hna.
1998 France i tuahmi World Cup le 2010 i tuahmi South-Africa Wolrd Cup cu ziknawh le eihmuarnak in tuahmi a rak simi tiah FIFA nih a phuan. Cu a si caah mah ti a ziknawhtu le phaisa a cohlangtu hna cu phaisa tampi liam ding in biaceihzung ah chuahpi an timh hna.
– Leicung bawlung phu hna a hruaitu pakhat sinak in phaisa vialte nan kan khirh a herh lai. Kha phaisa vialte kha lak tthan ding in biakhiahnak kan tuah cang i zeitluk caan sau a rauh zong ah kan ngol lai lo, tiah FIFA president thar Gianni Infantino nih a chim.
A fiang bikmi pakhat cu South Africa nih 2010 i World Cup tuahnak ding ah USD 10.million an rak pekmi hna kha a si i American cozah nih an hlat in an theih bakmi FIFA ah an chimmi (USA nih world cup a sok ah a ngah lo caah FIFA rianttuannak an checkmi chung in an hmuhmi) a si.
FIFA nih minung le company 39 cu taza a cuai hna lai. Hi hna hi an dirhmun le sinak kha a thli in hlawknak ah an hman caah a si, tiah FIFA president nih a chim. Germany 2006 zong ziknawh a um ti a si. A tambik tazacuai ding ah aa telmi cu Central- and South Africa an si.
Champions League i Quarter Final kai ding ah Atletico Madrid le Manchester City an i fiang ve cang. Tu zan ah Barcelona vs Arsenal (2-0) le Bayern Munchen vs Juventus (2-2) an chuih lai i phu hnih lawng Quarter an kai kho lai.
Bia chuak vai pawl von rel hna usih:
Nihin cu ruah lopi in Manchester United ah a kal te lai tiah zumh ngaimi Zlatan Ibrahimovic kha Chelsea nih kum 2 chung ca in a minthut an hal, tiah Franch FootMercato nih a ttial. Kum hnih chung ah Pund 19,2 million pek ding in an kamh tiah a ttial chap. Zlatan nih PSG ah ka um ti lai lo tiah fiang tein a chim i England i Manchester ah maw London ah dek a kal lai ti a lang chin lengmang. Nihin ah khan United nih Zlatan cu an ton tiah bia a chuak fawn. Arsenal nih Toni Kroos an duh e, tiah Spaine thawngthanhca AS nih a ttialmi TV2 nih a ttial chin. Kroos cu Premier League club dangdang le Germany club zong nih an bawh ko. Arsenal cu mi an deuh tuk i an manager Wenger zong a rian kaltak cang ding in a haltu an hon um cang. Asinain tu zan Barcelona a tei ahcun a him khomi a si fawn.
Real Madrid nih David de Gea cu an rak cawk khawh deng. Atu hi a rum tukmi PSG nih kan duh ve tiah phaisa chuah ding in an i biatak ve. United nih David de Gea hi kan tlai kho cawk lai lo ti an phang i amah ai rawl kho dinng mi an kawl lio ve. United nih a duhmi cu Barcelona goalbawh Marc-andre ter Stegen hi a si tiah Daily Mirror nih a ttial.
Manchester Evening News nih a ttialning Borussia Dortmund hmaikal Pierre-Emerick Aubameyang cu fawite in Manchester United nih an laa kho lai lo. Real Madrid ah chuih ding in a pu nih a forh tuk ti a si. Amah hi Arsenal le PSG zong nih an duh ngaingai.
Ca sau rel a huam lomi caah hi vial si rih seh.
Cc: Daily Mirror, TV2, Telegraph and NTB
Comments
Post a Comment