Bawlung thawngpang cu a tlawh in tlawk ko. Ka theih huammi pawl lawng ka hon ttial lai.
Chelsea ah um a duh tuk ti lomi Eden Hazard nih PSG ah kal a duhnak a langhter ngai cang, nain Real Madrid nih Hazard hi an duh caah James Rodriguez he thlen ding in an hal hna. An pahnih in an umnak club ah an ke a chuak veve lo, i club an i thlen ahcun a tthadeuh khomi a si ko. Chelsea nih James cu Real a kal hlan in an rak duh ngaimi a rak si.
Biafiang a si rih lo nain Chelsea nih an Mourinho an chuah hnu in Manger an duhbik mi cu Juventus manager hlun, tulio Italy a hruaitu Antonio Conte hi a si. Conte cu tthaal i an tuah ding Europe Cup a dih bak in Italy rian chuahtak ding in biakhiahnak cu nihin ah khan a ngeih cang. Ram caah Manager ttuan cu umhar caan a tam, a ti. Chelsea nih an lak lai tiah an zumh. (foto:romapress.us)Chelsea-Captain, John Terry cu Denmark ah manager a ttuan kho tiah bia a chuak. Amah hi Chelsea in aa din chom lai i bawlung maw a chuih rih lai, manager dah a ttuan lai timi cu tthal a dih hin a fiang te lai. A ttuannak ding cu Denmark club Brondby timi a si, i club ngeitu Jan Bech Andersen he hawikom tthatuk an si tiah Mirror nih a ttial. Chelsea i min ngei a rak simi Zola zong nih manager a ttuannak AL-Arabi club ah chuih ding in a sawm i Tuluk club lian pawl zong nih hlawh tampi pek ding in an leem.
Yaya Toure cu Manchester City nih Pep Gaurdiola an lak ding a si caah Club i thlen a duhnak a langhter. Asinain England ah um a duh, i zei club nih an cawk lai ti theih a si lo. Gaurdiola nih 2010 ah Barcelona in a rak zuarmi pa a si i an i rem lo ngai tiah media hmang in theih a si. Gaurdiola nih mi tam nawn a thlennawn lai caah Yaya hi hmun a ngei te lai lo tiah The Mirror nih a ruahnak a ttial.
Manager kong peh rih usih law, Swansea cu Premier League in an tla luklak cang i Liverpool manager hlun Rodgers lak ding in an duh ngaingai. Premier League in a tla ding a fiang ngai cangmi Newcastle nih Benitez cu Premier League in tlaak lo ding chanhchuahtu ah an laak, nain Premier League ah top a si liomi Leicester he an chuihmi ah 1-0 in a sungpi colh hna, i Newcastle cu 18nak ah an um lio a si.
Atu i club lian pawl nih an ngiat ngaimi mino pakhat cu Franch miphun Ousmane Demble a si, i amah hi Manchester United, Arsenal, Barcelona le Bayern München nih an i cuh. Rennes FC ah a chuih i goal a sut cuahmah.
PSG hmaikal Zlatan nih PSG in ka chuak deng cang tiah a chim. Tutan bawlung kum ah goal tampi a sut i Ronaldo he goal tambik ngeih an i zuam cuahmah. Paris khua hmelchun a simi Eiffel Torwer khi keimah zuk in an thlen ahcun PSG in ka chuak bak lai lo tiah bia kai kam a ti :) Mourinho nih United a tlaih ahcun Manchester ah kum khat cu a um lai tiah an zumhbik.
Tu kum Premier League cu cenghngia run nih tei dawh tak in a hong lang cang. Chuih ding tlawmte lawng ai duh cangmi ah an tang i Tottenham cu Mark-5 in an thlau hna i Leicester hi khawndennak an ton sual lo ahcun hrai a thlirtu an si te ko lai tiah zumh an si cang.
Mah lakah cun, Arsenal cu mawhchiat ngai an hong si. A hleiin manager Wenger zong Barcelona a tei i Champions League quarter final a chuih khawh lo ahcun a hnangam awk a si ti lai lo. FA Cup in an tla fawn cang i tu kum ah Hrai pakhat tel a cawipi hna lo ahcun 2017 tiang min a thutmi a dih hlan ah a rian in chuah a fawite cangmi a si, tiah English media nih an ttial.
Cc: The Sun, Mirror, London EveningStandard, Metro, Sky Sport (foto:somosinvictos.com)
Comments
Post a Comment