Van Gaal Cu Sawi Thah In An Thah Deng, Mourinho A Aipuang Ve

Zahan ah Manchester United cu Europa League "last 16" ah Denmark club minthang lem lomi nih 2-1 in a tei. Louis van Gaal caah a phur rit chinchin i mit aunak ngei lo in a um.

ZAANGLEK-SPORT

Premier League Top-4 hi thi lo nung lo in an i zuam i atu ah cun Van Gaal nih Top-4 i tel ding hmanh aa zum ti lo. Cu ti a si tikah Champions League i tel khawh nakding cu lam pakhat lawnglawng an ngei i cucu Europa League tei hi a si, nain Denmark club fate nih a rak hrilh hna i United (home) i an chuih tikah United nih an tei hrimhrim a herh te lai.

Home i an tei te zong ah, Europa League i a chuihmi hi Napoli, Sevilla, Villareal, Dortmund, Livepool le a dang min lian Club an tam caah hi tluk khawnden le dam lo nih a ciahmi United caah ruahchannak cu a tlawm ko.


Nai zarh i Sunderland nih an tei hna hnu khan cun Premier League i Top-4 i tel cu an i zum ti lo ti a fiang. Hmai kum Europa League ah an i zi kho men, theih lo cun Southamton le West Ham zong nih an chuh khawh rih hna. (Europa League chuih cu ferguson lio ah an rak i nautat bikmi a si.)

Manchester khua thawngthanhca nih "Atu bakhin Van Gaal chuah u" tiah tuzing an chuahmi ah an ttial. I British media tampi nih Van Gaal kong cu an ttial cio, pinah Social Media ah a kong a khat.

- Giggs, Scholes, Neville le Butt te pawl an um ti lo hnu, Ferguson nih 2013 in a chuah tak hnu cun Club dangpi ah United hi aa thleng. A rannak in hlan a sinak (identity) hi kawl zok tthan a herh tiah Manchester Evening News nih a ttial i a rannak in Van Gaal chuah ding in a hal.

Van Gaal cu manager a ttuannak a tuanbia (CV) a ttha ngai ko, nain United rian a tlaih hnu in cu vialte cu amah tein a hrawh chih, tiah a ttial chap. Europe club pawl nih an hmang ngam ti hnga maw? ti biahalnak a chuak.

Louis van Gaal hruaimi United nih Manchester United tuanbia a mui chiatter tiah The Times nih a ttial ve.


2-1 in an sungh hnu ah "A palh kho ding cu a palh ko lai" tiah Van Gaal nih a chim:


Khatlei in Mourinho a ing a rak puang. Atu hi Inter Milan club hruaitu hna he tonnak ngei ding in an sawm cuahmah ti a si, i aruang cu atu tiang United nih biafek an pek duh lo caah le hi tluk a si komi Van Gaal an chuah bal rih lo caah a si.

Mourinho nih cun hi tluk a thiam lomi Club hi cawisan tthan a duh, hi rian tlaih a duh tuk caah club lian lian nih an auhbu in a kal lo. Asinain a lung sau hoi ti lo i Inter kal ding in a tlirhkhonh ve cang hna.

Cu a si caah United nih hin Mourinho i manager rian a tlaih ding an duh a si ahcun a rannak in an taw an phawh i an kam an pau a herh lai.

United hi a ralaimi cawn nikhat ni ah Shrewsbury timi League niam te ah a chuihmi Club he FA Cup round-5 an chuih lai. 

Mah cu tikah Van Gaal hi manager a si rih te hnga maw? Zoh te tuah usih.