Thiery Henry: Manchester City Nih Cawk An Duhmi Pasarih Lakah Pakhat Cu An Caw Kho Lai Lo

January Transfer Window an khar, tthaal lawng ah mi cawk khawh a si cang nain manager thar a ngei ding Manchester City le leicung a hlawh sangbik a si ding Pep Guardiola nih Europe i a tthawngbik club si ding in mi thar cawk an i timhmi cu thuh khawh a si hoi lo.

Manchester City a ngeitu hi Premier League ah a rumbik a si, i Guardiola a laak khawh hnu in tthaal ah a biapimi bawlung chuihthiam cawk khawh chung cawk i hlawhtlinnak lam lei an zoh cang. Sheikh Mansour tiah theih deuhmi Mansour bin Zayed Al Nahyan hi Arab mirum a si i England le City ah US Dollar billions in siipuazi (invest) a tuahmi a si.

International Media pawl nih an ceihnak ah City nih vawleicung ah a thiam timi pasarih cawk ding min cazin an lak cang, i City hi hmailei zong ah a tthawngmi si khawh dingah mino tete zong atu hi cawk le i cawm an i tim.

Cawk an duhmi hna cu:

1. Lewandowski hi a si i Pep nih a ka duh ahcun City ah a zul kho ka si tiah amah nih a chim. Asinain City nih Lewandowski bantuk hi an herh hrimhrimmi a si caah an thil ti khawhnak vialte hmang in an lak te lai tiah ruah a si. Real Madrid nih zeitluk indah an leem khawh te lai i a caah phaisa hman an ngamh te lai timi nih lai a rel ngai te khawh fawn.

2. Paul Pogba cu Chelsea, Real Madrid, Barcelona le United nih an i cuhmi a si. Nain Pep nih a lung in a ngiar pengmi a si ve caah Pund million 70. in club dang nih zuam cawh lo ding in an ngamh. Pogba cu mino te a si rih i man tampi in cawk an ngamh cio.

3. Lionel Messi hi Pep tang ah teinak tampi a hmumi, aa thei tuk cangmi an si lawng si loin a thiambak caah City nih an duhmi ah ai tel. Cu hlan cu Messi nih La Liga leng ah kal ka duh a rak ti pah, nain Suibawlung a panganak a lak lio ah Barca. ah ka um ko lai, a rak ti.

Thiery Henry belte nih a zum lem lo:
- Manchester City fans si ahcun tthaal ah minthang tampi lak ding i ruahchan a si ko lai. A rummi club a si ruang lawng ah a si lo, Pep Guardiola bantuk manager nih mi tampi lung a laak khawh i leicung bawlung chuih thiam anih timi hna nih a tang ah chuih an duh. Amah belte Messi hi cu an laa kho lai ka zum lo, tiah Arsenal le a hnu ah Barcelona ah a rak chuihmi Henry nih Mail ah a chim.

Asinain hlawh saang a pe khotu club sinah a kal lai lo ti khawh cu a si lo. Cu pinah Messi nih Barcelona cu Aguero lak piak ding  in a chimh lengmang hna nain an lak piak lo caah le City ah Aguero a chuih caah a Boss hlun Pep Guardiola nih a leem kho lai lo ti khawh a si lo.

4. Neymar tu hi Barcelona nih zuar ding ah an siandeuh, i Manchester United nih an bawh pengmi a si ve. Neymar zong nih atu ning i Barcelona i umnak in hmundang ah i tthial a duhnak a langhter pah pinah Ngunkhuai a pekmi kong ah Spain um awk a tthatlonak a langh pah caah Barcelona nih nan ngamh zah chim u, tiah cawk a duhtu pawl an chimh hna. City nih phaisa chuah ding redi an si lai.

5. John Stone hi nihin England ah cun an duh bikmi mino a si, i Everton ah a chuih. England leng Europe zong ah an duh cio, Barcelona nih an ngiar pengmi hnukham a si. Manchester City nih England mi an cawk a herh lai caah Stone hi an i zuam, a thiam zong a si.
6. Zahan i Everton caah goal 2 a suttu Barkley hi City nih cawk an duhnak a sau cang. Atu zong an ngiar ko rih. Premier League le Europe ah teinak hmuhpi ding in an lem kho lai maw?

7. David Alaba hi hnukham a thiam bakmi a si, nain atu hi Bayern ah a khawng i a chuih tuk lo. Mah cu Pep nih i kalpi a duh.

Mah cu ti a si ahcun Pep Guardiola nih City a luh tikah minung tam ngai a thlen te hna lai ti a fiang, i a chuihtu lawng si loin Trainer pawl zong a thlen te hna lai tiah an ruah cia ko.

Henry nih a chimmi cu Pep Guardiola hi Barcelona manager ttuan a thawk ah minung tampi a thlen hna. A chuihtu zong a thlen ko hna, i Bayern a luh ah khan a lang rihmi cu mi a zuar i mi a cawk ko. City a luh tik zong ah mah ti cun a si te ko lai, tiah a chim.

City ttanh ding in aa tthialmi nan um maw?

Cc: DailyMail