Champions League "the Last 16" chuih an von thawk i PSG nih Chelsea (2-1) i tei, Real Madrid nih Roma (2-0) in a tei, a dang cu Final a phan kho ding ah ruahmi an si lo caah ka chim ti lo. Hmai zarh hi Barcelona vs Arsenal an chuih lai i Juventus vs Bayern Munchen hi zoh an nuam te lai.
FOOTBALL THAWNGPANG
Mah cu hlan ah bawlung vawlei i ceih supsapmi pawl ka von ttial lai:
Manchester United cu Champions League (CL) "last 16" an i tel khawh lo caah CL tangdeuh a simi Europa League ah an i bualcen ve lai i Denmark club FC Midtjylland he tu zan an i tong lai. Tthaal a dih hnu zong ah Premier League top-4 ah an i tel lo i Europa League an tei lo a si ahcun Champions League a zohtu an si ve rih lai.
Champions League a chuih kho ding dirhmun ah an um lo nain Jose Mourinho nih United hruai ding in hnatlaknak ngeih a si cang. Mourinho hi Tuluk ram club lianlian nih vantawng hlawh pek ding in an sawm, cu pinah Italy club lian pawl nih an auh tuk ko nain United rian aa thim tiah The Sun nih a ttial.
Manchester ahhin Zlatan Ibrahimovic nih a zulh khawh men tiah bia a chuak. Zlatan le Mourinho cu Inter Milan lio in aa kom ngaimi an rak si i naite ah "Tthaal hin cun thil lianngan a cang lai," tiah Ibrahimovic nih a chim. Premier League hi a sawi tawnmi a si nain, PL chuihnak ding ah a thazang le thiamnak hi a taang tuk rih tiah a chim chih, i a bia ning a si ahcun Van Gaal nih a rian a kaltak i Mourinho nih a chawn tikah Zlatan hi United ah a kal ding a lo bik. Asinain kum khat ca lawng min thut a si lai tiah bia a chuak, aruang cu 2018 ah Zlatan cu USA ah tthial aa tim.
Champions League ah United a chuihpi kho lomi, Premier League top ah a kaipi kho lo tiah ruahmi Manchester United Captain Wayne Rooney cu zuar an timh tiah bia a chuakmi cu Manchester Evening News nih a ttial i an zuar a si ahcun Tuluk foot-ball club pakhat ah an zuar lai ti a fiang. Zei ca tiah Tuluk pawl hi nai hrawng te cu bawlung caah phaisa an hmang tuk, i man tampi in mi an cawk pinah hlawh tampi an pek hna i Rooney hi hlawh tthabik a hmu kho ding a si ve.
PSG le Chelsea an chuih ah teinak goal a suttu Edindon Cavani cu Europe ah a min linsa ngaingai, i atu hi Chelsea nih tthaal ah lak ding in PSG an chawnh cuahmah hna. Cavani a pa nih cun Manchester United, Juventus asilole Real Madrid ah kal ding in a forh, nain hlawh tamdeuh pek a timtu Chelsea nih cawk khenh hna dawh in a um. Phaisa mit cu pei an au cio tiah :P
Cavani an zuar a si ahcun PSG nih Inter i a chuhimi Mauro Icardi hi Manchester United an i duada kar ah cawk an i tim. ICardi cu man tam ngaingai in PSG nih lak an duh.
Everton nih an goal-bawh Tim Howard chawngtu ding mi an kal cuahmah, i Chelsea goal-bawh chawngtu ah chiahmi Asmir Begovic hi an duh ngaingai. Cu bantuk in Liverpool khua i angki sen aa hrukmi zong nih goalbawh thar an kawl ve, Real Batis goalbawh Antonio Adan hi an duh ve. Liverpool FC cu an goalbawh thlen a herh bakmi a si.
John Terry tello in cun Chelsea hi phundang pi in a hong lang i PSG he an chuih zong ah hlam a um hringhran. Asinain Chelsea in ai dinh cang caah a chuih lomi a si lo, aa hliam caah a si. Nain tthaal hin cun Chelsea a kaltak lai i USA maw Tuluk ahdah timi biahalnak lawng a um. Asinain Terry hi West Ham nih kum khat tein Premier League ah chuih ding in an hal cuahmah i a lung an tong te hnga maw tiah cuanh a si.
Captain hna i Captain A Baunak Ding Chelsea FC
Leicung minthang a rak simi Ronaldinho a duh lomi England club a um i cucu zeidang ruangah a si lo, Ronaldinho nih hlawh sangtuk aa hauh caah a si, tiah Bleacher Report nih a ttial. Cu club cu NewCastle a si, i Ronaldihon nih amah tein nan club ah ka chuih lai tiah a halmi hna a si. Nain kum 35 a si cangmi pa nih kum khat ah Pund 6million i hauh cu zeitluk an rak thiam hmanh ah lak awk a ttha lo ti a si.
Foto: givemesport.com
Comments
Post a Comment