Pep Guardiola Nih City Hi Club Lianngan Ah Ser Khawh Ko Lai

Foto: Guardian

Nihin hi UK caah January Transfer Window a dih ni a si. Zei club nih hodah an cawk i an zuar timi a fiang dih rih lo, nain Bawlung thawngpang ah hnatun cio a simi Manchester City manager i thlen kong he pehtlai in nihin City manager le a thlengtu ding pa kong tlawmpal in zoh hmanh usih.

Manchester City FC nih an website ah Pep Guardiola cu tutan Season a dih bak in Manchester City manager a si lai tiah biafiang an thanh. Cu hlan ah zumh tuk cia a si ko nain Bayern le City hi Champions League ah aa tong kho an si rih caah an rak fehter lo, i mah cu buin atu an fehter caah thil phundang ngai a si tiin an cuanh cio.

Relchap: January Ah Chelsea Nakin Phaisa A Hmangdeuhmi Cub An Um Lo


Manchester City cu Capital One Cup final kai ding an i fiang cang, i Champions League zong a chuih rih lai. Cu pinah tulio te hi Premier League ah Leicester City nih mark-3 lawng in an thlau rih hna i pakhatnak a la kho an si rih. FA-cup ah Aston Villa cu 4-0 in an tei hoi hna i FA-cup he cun tutan Season ah hrai li cawi kho an si ko.

Manchester City cu teinak Hrai pali a thlir kho ding an si ko nain an manager Manuel Pellegrini a hmailei kong voitam ngai medias nih an chim, tutan Season a dih in cun a chuak cang lai. Pellegrini hi City nih an duh lo rumro cu a si lo, nain City hruaitu le Pep Guardiola hi hawikom ttha tuk an si hna caah le Pep an duhdeuh ca rumro ah a si ko.

Manager a ttuannak ah a hlawhtling ngaingai mi Pep Guardiola cu Barcelona a um lio i a rianttuan tti hawi le a hawi ttha Txiki Begiristain he City ah an ttuan tti tthan kho cang lai.

Pellegrini hi a ttha ngai i tutan ah Hrai li cawi kho an si, nain Club pawl hi a thar i chuah an herh lengmang ve tikah Guardiola in an thlen ding cu City caah thil ttha tuk a si ko lai. Manager pawl nih an ttuannak Club i teinak an hmuh tikah peh lo in an chuah tak ttheo tawn. Mourinho hna kha Porto FC cu Champions League a teipi i a kal tak lawng silo in Inter Milan zong Hrai-thum a thlirpi hna kum ah a chuahtak ko. Cu a si caah tutan i City nih a tlawmbik hrai hnih- asiloah Premier League a tei ahcun Pellegrini caah lung di riam in chuah kha a sunglawi ko hnga.

Manuel Pellegrini hi manager thiam lo a si lo, Club lian a simi Real Madrid te hna zong ah a rak ttuan ko. Atu zong Chelsea nih an duh khawhmi a si.

Pep Guardiola nih "Club pakhat lawng i sau tuk um cu a nuam lo," tiah ESPN ah a rak chim. Bayern Munchen ah kum hnih a um lai i Premier League ah a luh tikah a ttuannak Club cu leicung Football-club ah a lianbik si ding in ser aa tim, i a ser khawh fawn ko hnga. A hleiin City hruaitu hna lakah Barcelona a um lio i a ttuan tti hawi pawl an um. An duhnak an i hngal thiam hna, cun City a ngeitu cu Arab mirum an si hoi tikah Club lian ah a ser khawh hrimhrim ko lai.

Guardiola nih manager a ttuan kum 7 chung ah teinak/hrai 19 a cawi cang. Kum 44 lawng a si rih.