Iowa Ah Hillary Clinton le Ted Cruz Nih Teinak An Hmuh, Nain

Iowa ah teinak a hmumi Ted Cruz le Hillary Clinton

Zahan cu Iowa i US president aa cuh ding pawl minpe-thimnak (nomination) zinglei tiang ka rak zulh i mi an tam, buai-ur in suimilam tam lak i ngaih le thinphang ngai in vote an pek cio hnu ah teitu an hong fiang hna.

Relchap: An Kong Tawi Theih A Tthami USA Presidential Candidate Pawl

Mahhi zan hlan ahhin Iowa ah cun Trump le Hillary hi zumhbik an rak si.

Democratic party in Hillary nih a tei. CNN Poll ning in siseh, tuanpi in kar a hlaang cia cangmi Hillary cu an zumh bantuk in teinak a hmu taktak. New York Times ning ah H. Clinton nih 696 hmuh i amah he naih bikin aa zuammi Sanders nih 692 a hmuh. Mah cu a si caah Sanders he an i dang tuk lo nain H. Clinton nih Iowa ah teinak ka hmuh tiah a chim khawh.

H. Clinton le Sanders hi an i tluk tuk caah cheukhat hmun pawl ah cun tangka (coin) hlirh in biakhiahnak an tuah piak hna i cu ti an hlirhnak hmun ruk ah H. Clinton nih a tei tiah Local News nih a ttial.

Hillary caah lunglawmh awk a si nain hnangam dih awk a ttha rih lo, a ralaimi Juli ah khin Democratic nih Philadelphia i an party tonnak an ngeih tikah president ai cuh ding an thim lai caah Sanders zong nih tei te khawh a si. Iowa hi cu a biapi tukmi Test-nak a si.

Sanders hi mino nih an duh tuk. A tar tuk cang pinah USA ah Socialist politics a lar lo tuk caah an rak zum tuk lo. Tahchunnak ah Barack Obama cu Socialist a si tiah fakpi in Republican siseh, anmah party chung lila in a sawitu an rak tam ngaingai. Asihmanhsehlaw, Iowa ah cun mi khuaruah a harter, mino nih an duh tuk i siifak pawl zong nih an duh lai tiah ruah a si.

Republican lei hi Media nih a chimning he ralchan in an chuak ngai i Donald Trump cu Ted Cruz nih a tei. Mahhi zan hlan hrim in Iowa cu Trump caah zatlaak aa thawknak a si, tiah media pawl nih an rak ttial ngai.


Piangthar le Khrihfa tampi nih vote an pek dingmi Ted Cruz nih Iowa ah 28% teinak a hmuh i 24% a hmumi Donald Trump cu pahnihnak a si. Iowa cu Khrihfa an tamnak a si.

Mi tampi khuaruah a hartermi cu Marco Rubio hi a si i Trump nih 1% lawng in a tei. A nobik a si nain "conservative" taktak a si ve i "Keimah nan ka thim ahcun conservative kan tthawnter lai i kan party ka fonh tthan lai," a ti. Amah hi President cuh aa tim vemi Jeb Bush siangngakchia a si bel, i Jeb nih Florida a chuah tak hnu ah Marco nih a rian a chawn.

Jeb Bush nih a pa le a upa keneh zeicandah a zulh khawh te lai tiah ni kum ah khan ka rak ttial cang, i zahan Iowa a phichuak nih zeihmanh a si lonak a langhter ti khawh a si. Jeb Bush nih 3% lawng a hmuh. Iowa hi a donghnak cu a si lo, nain Iowa ah a lar ti lomi cu a ralaimi Feb. 9, ah  New Hampshire i an party tonnak zong ah a laar lai zumh a si ti lo.

----
rak ka leng than te.