February 26, Europe zanlei ah FIFA president cu UEFA i General Secretary a simi Gianni Infantino a si tiah media kip nih an hon thanh. Bawlung vawlei ah ruahchannak a thar a chuak tthan tiah mi tampi nih cu thawngpang cu an lawmh. A hleiin Europe lei cu Infantino hi President a tlin caah an lung a tling ngaingai.
FIFA ahhin eihmuar le ziknawh in a khat tiah phuannak a rak um lengmang i a hnu cun thil ttha lo cu aa thup kho taktak ti lo i 2014 khan a hong lang chin lengmang i 2015 dih lei ah cun fiang tuk in zaal-senh le eihmuar a hong puang. Cucaah president Sepp Blatter cu president sinak in aa din i president thimnak a tuah piak hna tikah aa cuh tthan ve caah teinak a rak hmuh tthan. Sihmanhsehlaw, leicung i SuperPower ngei a simi USA, UK le a dangdang nih hi FIFA chung i a dik loning in rianttuannak cu FBI hmang in siseh, Interpol hmang in an hlat tthan tikah le Journalist hna thawng in an langter khawh caah Sepp cu Bawlung-vawleicung in an chuah.
Sepp Blatter lawng a si lo, UEFA president Michel Platini zong FIFA president aa cuh pah in a rianttuan ning ah a dik lonak a um caah FIFA le UEFA in chuah a si ve. Sepp hi a ralaimi kum 2020 tiang ca i president rak thimmi a si.
FIFA nih World Cup a tuah tawn i 2014 kha Brazil ah an rak tuah. World Cup tuah a duh ciomi ram pawl nih phaisa a tomtom in World Cup tuah khawh nakding caah FIFA top-leader pawl cu an rak cheh hna i Vote an rak cawk ti a si. Cu bantuk in Europe Cup le a dangdang International Cup pawl ah ziknawh in VOTE cawk a rak tam tuk ti an hmuh. 2006 Germany World Cup zong, Euro million tampi in Vote an rak cawk tiah a puang. Cu bantuk in a ralaimi World Cup, Dubai i an tuah dingmi zong hi a linh tuknak ram a si caah June-July i chuih dingmi World Cup hi tuah awk a ttha lai lo an ti nabu in phaisa in Vote an cawk i teinak an hmuh. Mah hi kong hrim ah UK/USA an lung a tling lo i an hlat khun.
FIFA hruaitu cunglei bawi nih phaisa tam tuk an rak ei. Dubai i bawlung chuihnak an sak ahhin rian-sal tamtuk an um i hlawh pek lomi zahzat, umnak le tidin thiang ngei lomi tiin harnak an tong i a thimi an tampi. Mah cucu FIFA rian ngai a si nain Dubai cozah cungah mawhchiatnak a tuah lo tiin sawi a si. Cu bantuk in Brazil zong a si ve. I Fifa president cu vawleicung ah USA president te hna bantuk in a tlong leng i a lor ngaingai mi an sinak ah a hman lo ning in an rian ttuannak cu thuh khawh a si lo.
FIFA hi a thar chuah *Reform* a hau ti cu 2006 in an rak chim tuk cang. Atu ah biatak tein an i zuam cuahmah i President thar an thimmi Infantino nih zeitluk indah vawleicung mi thinlung a lak khawh tthan lai timi a ralaimi caan ah kan hmuh khawh te hnga.
Gianni Infantino cu:Infantino nih president aa cuh lio i a chimmi pakhat cu World Cup ah ram 32 lawng chuih ding a simi hi president ka tlin ahcun ram 40 in chuih a si lai, ti hi a si. Mah belte cu atu hin a tuah taktak sual lai tiah a thinphangmi bawlung chuihthiam ram pawl an hong um cang.
2000 kum ah khan UEFA i Jurist chungtel a si cang, i cu tlawm pal ah Neuchatel University i International Centre for Sport Studies *CIES* i an General Secretary a ttuan. Kum sarih a ttuan hnu ah UEFA GS rian a tlaih i nihin FIFA president a si tiang a rak ttuan.
Amah hi Law a cawngmi a rak si. Amah cu Champions League draw nan zoh tawn ahcun nan hmuh lengmang mi a si lai.
Relchap: Man Pek Hau Lo In Blog Ser
FIFA president dirhmun in a ralaimi caan i a rian lian a simi cu Reform le World Cup pek ciami ram pawl kong ceih hi a si lai, i Dubai/saudiarabia hi an leet lai maw leet lo, cuti an leet a si ah Russia hi teh an leet lai maw? an ceih lai, an buai ngai te lai.
FIFA president a ttuan balmi hna cu:
1904-06 (kum 2): Robert Guerin (France)
1906-18 (kum 12): Daniel Woolfall (England)
1918-21: Woolfalls a thih caah caan kar lak president an rak thim lo.
1921-54 (kum 33): Jules Rimet (France)
1954-55 (kum 1): Rodolphe Seeldrayer (Belgium)
1955-61 (kum 6): Arthur Drewry (England)
1961-74 (kum 13): Sir Stanley Rous (England)
1974-98 (kum 24): Joao Havelange (Brazil)
1998-2015 (kum 17): Sepp Blatter (Switzerland)
2016-?: Gianni Infantino (Switzerland)
Cc: TV2/NRK/Wikipedia/
Comments
Post a Comment