IT Thawngpang: Yahoo A Tla, Google Nih Apple A Tei

IT ah minthang a rak simi Yahoo! cu sungh zatlaknak a ton caah Feb. 2, in rianttuantu 1700, (15%) rian in a dinhter hna, i an company thilri cheukhat zong zuar ding in a chim.

Culio ah Google le Facebook cu an tthangcho chin lengmang.

Facebook hi 2030 ah cun Billion 5 nih an hman te lai tiah an ruah, i hawi nih an tuah lomi a tuahmi a tam ngaingai. Mah cu zeidah a si ti ahcun ram siifak pawl nih Facebook hman khawh ding in a tuah cuahmahmi hi a si.

Facebook nih phaisa a hmuhbiknak cu Cawngia/Advertise hi a si. Mah hi cu Yahoo zong a si ve ko, nain Facebook nih cun siifak ram pawl zong ah zalong le fawite in hman khawh ding in aa ser tikah cu siifak ram pawl nih internet in thil an cawk khawh lo zong ah a hmangtu tam hrat cu phaisa tampi Facebook nih a hui.

Mark Zuckerberg cu vawleicung a rumbik panganak a hong si cang, i a rang taktak. Facebook biatak tein kan hman hi 2007-8 hnu lawng in a si. Atu ahcun amah ngeihmi lawng USD 50billion a si, i Facebook hi leicung a manfakmi company hna lakah ai tel. Atu ning hin cu A rumbik a si zau lai tiah zumh a si.

Yahoo! kong ah kir tthan sihlaw, 2015 chung ah khan phaisa tampi a sung, i November in January 2016 tiang ah USD 4,43 billion a sung. Mah cu a si caah rianttuantu 1700 cu dinhter an si an zung panga zong an khar.

An website muisam tlawmpal cu an hon thlen ve.

Wikipedia ning ah Yahoo! hi 1995 ah rak dirhmi a si i Email le Search-Engine a tthabik a rak si. Laimi tampi zong nih Yahoo hi kan rak hman hmasa i mi vialte nih Yahoo! Email an rak hman cio. Cu tikah Cawngia/ads in phaisa a rak hmu tuk.

Atu ahcun Facebook le Google he an i zuam cang tikah an lonh tuk i Yahoo email ID, le chat, cun E-group pawl zong hman a si ti lo. Mi tamdeuh nih Gmail kan hman i Facebook hi kan hmanbik caah Yahoo cu a sung.

Google cu vawleicung Company ah a manfak cem ah aa chuah i Apple cu a tei tinak a si. Google nih a  ngeihmi Alphabet cu nikum ah billions i an hlawh caah a si i ngunkhuai an pek hnu ah 4.9billion an taang. A luancia kum khat lio nakin million dollar 200 tamdeuh tu kum ah an hmuh.

Google Company hi cawk duhmi um ahcun USD 570billion chuah a hau, i 533billion a simi Apple cu a tei cang tinak a si. Hika hin Google nih Apple a lonh ning an ttial.

Alphabet cu ni kum lawng ah thawkmi a si i Google ta a si. Search-engine a ngeimi le amah te in aa mawngmi mawttaw sernak caah hlathlainak a tuahmi a si.

Google Ads hi an hman tuk ve caah a si i nikum a dih tiang ah Youtube, Gmail, Android pawl cu an phaisa lut 17% a kai.

Photo: Yahoo Image