Chelsea FC nih an captain John Terry cu a minthut an duh ti lo caah tthal hin cun Chelsea in a chuak cang lai ti a hong fiang. Chelsea FC tuanbia a dih lei a panh cang ko lo maw, tiah British Media nih "Chelsea Identity" tiah an timi Terry a chuah ding kong ah Chelsea hruaitu pawl an mawhchiat ngai hna.
Legend an timi kum khua in an hon upat tikah Football-club pawl nih hmunhma pek an i harh tawn hna. A naibik in zoh ahcun Real Madrid nih Iker Casillas cu Porto ah an kalter, i Steven Gerrad zong Liverpool tuanbia ah philh khawh lo ding a si nain a chuak ko. 2014 ah khan Frank Lampard nih Chelsea cu a rak chuah tak ve.
A caan ah cun a nodeuh le a tthang tharmi hna hi kianh i hmunhma pek an herh caah a si tawn ko. Sihmanhsehlaw, tutan i Chelsea nih Terry an dinhter tikah hin a dang he an i khat lo i Chelsea hi an i chuahsual kho ngaimi a si.
Casillas, Gerrard le Lampard nih an club an chuahtak ko nain annih cu an club caah a biapimi an rak si lo lio caan a phak caah a si bik, i Lampard le Gerrard hoi hna cu nuam tein anmah lungtho tein a chuakmi an si. Terry a chuahnak a ruang he cun ai dang.
Kum 14 a si in Chelsea ah ai tthial i kum 11 chung captain a ttuan cang. Chelsea nih an tuanbia ah hrai 25 an thlir i 16 cu Terry a chuih hnu in an lakmi a si caah an club tuanbia ah Terry a biapit ning cu chim hau lo a si.
London i ka rak umnak sang cu Chelsea FC ttanhtu an tambiknak Area a rak si i Terry hmanthlak le Chelsea Flag deuh hmuh a rak si. Mah tluk cun Terry hi Chelsea ah hmun a ngei.
Relchap: John Terry changtu ding ah Stone an duh
Kum 30 cung nih kum 1 lawng "Chance" an ngei:
 |
| Add caption |
Mah cu bia cu phuan rih ding ti a si lo, nain MK Dons he FA an chuih zanlei ah Terry nih a rak chim, keimah duh a si lo, club nih an ka duh ti lo, tiah a rak ti.
Chelsea hi Top-4 ah an i tel kho ti lai lo, i caan karlak cu harnak an tong. An herh hmasami cu Manager thar a si. Manager thar lak hnu ah Terry hi kum khat cu chap te khawh ding phun in an rak ruah ko nain Terry nih aa nautet le a si lai, a duh hnik ti lo. Cu pinah FA-cup an chuih dih zan i a chimmi ruang ah Chelsea PR-minung pawl nih an ngaithiam kho lai lo tiah ruah a si.
Chelsea nih 2004 thawk in manager tampi an rak thlen hna nain John Terry cu nihin tiang Captain an siter. Carlo Ancelotti nih cun "Captain hna i captain" tiah Terry cu a rak fak. Cu bantuk in a hawipa nupi kong i an rak buai lio hmanh ah Fabio Capello nih England Captain ah a rak thim.
English media nih "The Old Guard" tiah an rak timi Terry, Drogba, Lampard, Petr Cech le Ashley Cole an dihdonghnak zong a si lai. Hi hna hi 2005 thawk Mourinho hruainak in teinak lian a rak hmumi an si.
Terry a kal tikah cun Chelsea nih an Identity an thlau he aa khat lai, tiah British media nih an tial.
Relchap: Football Club Cawk Na Duh Ve Maw?
Chelsea i a chuihmi hna lakah hin John Terry bantuk in nawlngeihnak a ngeimi, phundang in chim cun mi a hip khomi an um lo. A taangmi ah Branilav Ivanovic lawng hi kum 30 a luanmi a si, i amah hi Terry chuah hnu in Captain a si lai tiah zumhbik a si (anih cu kum 1 an chap). Gary Cahill hi upalei ah a tlak pinah England a si fawn caah kei nih cun ka zumh ngai.
Diego Costa nih nunnak pe ngam in Chelsea ah a cawl ve, nain mirang holh a thiam lo. Goalbawh seh, tiah Thibaut hi kum 23 lawng a si rih.
Chelsea ttanhtu nih aho hidah nan duh hnga? Terry tluk cu a si lo nain captain a ttuan tawnmi Fabregas lawng hi John dirhmun he aa naihbikmi a si. Chelsea belte ah ruahning bantuk in a laar lo. Mi thar an cawk dingmi aho paoh va si ko hna seh, luh le cangka in captain ttuan tlak ding an um hnga maw?
"a bau," ti tikah hin amah umnak, a dirnak hmun airawl khomi an um lo caah a bau ti a si tawn i Chelsea ah Captain John Terry a bau cang lai. A airawl kho ding hi ka ruat kho rih hna lo.
Chelsea in chuah ding cu bia tak ten ka ngaihchia.Ka upat zong kai thei deuh!theih herh mi le rel duh mi tete na kan ttial piak lengmang i kai lawm
ReplyDeletethank you :)
Delete