"Who let Trump get this far?" Trump Hi Republican Caah Candidate A Si Ahcun A Poi Ngaingai Lai

Republican in president cuh aa timi Donald Trump, Ted Cruz le Jeb Bush. 

Cawn nikhat ni ah a ralaimi USA president thimnak ah aa cuh dingmi pawl "Nomination" tuah ding in Iowa State ah tonnak an ngei hna lai. Cu a si caah bawlung thawngpang ttial lo in USA president thimnak he aa pehtlaihmi ka von ttial ta lai.

President thimtu mipi nih ahodah an uarbik timi zohnak CNN nih an tuahmi a hnubik a phichuak ah 42% nih Trump an duh, i amah changtu ah Ted Cruz, Republican a aiawh te lai tiah ka ruahmi cu 19% lawng nih an uar. A dang cu Trump a zuam kho ding an um lo tinak a si.

Mah cu nih Republican tampi cu an aipuanter hna, an thin a domhter hna. Mirum pa Trump, Sarah Palin hoi hna nih cun "Politician a si lo," tiah Trump a ttanhnak a langhter lio ah a chim, hi CNN phichuak ning in cun Republican aiawh in President aa cuh kho dirhmun ah a phan. Mah cu aho ruang ahdah a si hnga tiah atu hi USA ah cun biatak tein an tuak cang.

Politico.com ah "Who let Trump get this far?" tiin an ttial.

A cabia nan rel ahcun Republican pawl cu Nomination ni a phanh cuahmah tikah anmah le anmah an i puh cang. Party chungtel si hna seh, an party phaisa in a dirkamhtu hna, cun an mifim pawl cu zeiruangahdah mirum pa hi a kham le a thlauhtu an um lo, zeihmanh tuah lo in kan um timi biahalnak an ituah cang.

Republican chungtel le mifim tampi nih fiang tein an hngalhmi cu Trump hi Republican repsident-candidate a si ahcun a ralaimi November i President thimnak ah fawite in kan sung lai timi le Congress hrimhrim ah mitam deuh si khawh lo a fawi, timi a si.

FOX nih cawn nili ni i Republican aiawh in cuh a duhmi pawl Debate tuah dingmi ah Trump cu a nuar, Debate hruaitu nu Megyn Kelly he an i rem lo caah a si.

Mah ti a nuarmi cu a dang aa zuammi hna siseh USA media pawl nih fakpi in an mawhchiat. Cu lio ah amah he aa naihbik a simi Ted Cruz nih pumpak in iton i biaraldo ding in a hal. Ted hi Iowa ah cun Trump he aa khingkhang nawn an si lai tiah an ruah.

Donald Trump nih zeiti hmanh in Hillary Clinton a tei lai lo, tiah Republican i hruaitu le a lulei simi an mifim pawl nih an hngalh caah an thin a phang. Election Campaign ah siseh, a dangdang i bia a cihm tikah a biachimmi pawl cu a uartu an tam sawk, amah zong laar a uar vemi a si tikah le vawleipi nih a tonmi thil ruangah an ruar. Sihmanhsehlaw, a taktak (reality) ah ram uktu ding President sinak ding ahcun a har tukmi a si, i hi ti a biachim le a dirpimi hngal ko bu in leicung i mifim, minung zawnruahnak a ngei i Moral ttha aa timi USA mipi le hruaitu hna ih an thim ding cu a har ngaingai lai.

Republican in aa cuh ve dingmi Jeb Bush ruahnak petu Sally Bradshaw nih a chimmi cu Trump bantuk nih hin kan party a fumtom kho lai lo i nu tampi nih vote an pek lai lo, tiah Republican lawng si loin vote a pe khotu vialte (parti ngei he ngei lo he) ruah chin in a chim.

- Donald Trump hi kan thlah (nominate) ahcun Hillary Clinton kan tei kho lai lo. Mah cu politics thiamsang hna nih hlathlai len a herh lomi biafiang a si, tiah Politico ah Sally nih cun a chim.

PS: Hillary Clinton hi Democratic Party nih an Nominate lai tiah a fiang rih lo, tu khar hrawng cu a tla ngaingai.



Donald Trump biaken cu "Make America Great Again" ti a si i "Change" nakin a saudeuh. America hi hlan bantuk an si taktak ti lo. Vawleicung ram tthabik zong a si ti lo timi hi cu al awk a um lai lo.

Trump nih atang i 2012 i Newsroom timi Film Clip te hi a campaign ah hmang sehlaw ti khi a hei ka ruahter ngaingai.

Kan peh te lai.