Van Gaal Netherlands Ah A Kal, United Traning An Tuah Lo

Manchester United training tuahpi lo in Netherland a kalmi vankal. foto: Laura Wolfe/Twitter

Manchester Uniteds manager Louis van Gaal cu Old Trafford i a bawi caan a dih lei panh ko cang. Mah cu English thawngthanhca pawl nih an phaimi a si. Zeitik ti cu a fiang rih lo nain a ni asiloah a zarh chung ah a cang kho tiah an ruah.

Bawlung Biathli: Ferguson Cu Giggs Ruahnak Petu Ah Timh Cia A Si

Louis van Gaal cu zarhpini ah khan Manchester Airport ah a thil he an hmuh i a ram, Netherlands ah a kal ti a si. A hlei in zarhpini le nikhatni United-training cu tuah lo in an i dinh caah England i media le United fans pawl an hnatun lawng a ttha ko.


Mit aunak a thei huaha ti lomi United manager van Gaal hi fanu chuahni lawmhpi ah a kal ti dah lo zeiruangahdah Netherlands ah a kal timi biafiang a um lo.

- Training tuah dingmi an leet hi cu mi zapi caah khuaruahhar ngai a si lai. 2014 i David Moyes a rian an rak chuah lio thil sining he an hon i lo tuk, tiah The Daily Mail nih nihin ah a ttial.

Zarhte ni i Souhthamton nih 1-0 in Old Trafford ah an rak tei hna lio ah Fans nih van Gaal cu "Buuu" tiah an rak au hnawh.

Manchester United an Director Ed Woodward nih hin a thli in United i a chuihtu pawl bia a ruah hna i van Gaal kong a ruah hna tiah bia chawkvai a um, i Daily Mail nih cun van Gaal hi a naule nih an rem ziar ti lo tiah a ttial. Ed nih van Gaal hmailei kong an Club hruaitu nih an ruahning kha a chimh hna, cu tikah thilthlennak khaan chung ah van Gaal bia an ngai kho ti lo, tiah cu thawngthanhca nih cun a chim chih.


Chelsea manager hlun Jose Mourinho nih caan rem hmang in United manager rian cu a sok ve. Hika hin relchap: Mourinho Nih van Gaal Hmai Zoh Lo In United Ah Rian A Sok

Ryan Giggs nih van Gaal an dawi ding cu a bawh ko. Khatlei in Ed nih van Gaal cu Giggs nih a chaan lai timi hi van Gaal a rem ti lomi a chuihtu pawl sinah chim sehlaw a dawh, cun a rauh hlan te ah a cang lai tiah English media nih cun an purhdah cang.

David Moyes an rak chuah kum zong ah caan karlak manager rian cu Giggs nih a rak tlaih chung i van Gaal an lak hnu in a bawmtu ah an chiah. Tutan zong van Gaal an chuah ahcun caan karlak caah amah hi an duhbik ko lai tiah ruah a si.

United hi England ah goal sut a tlawmbik club an si.


Laimi United fan pawl zong Facebook ah biatampi an chim ngam ti lo, van Gaal a chuah zok ah a ttha ko an ti len ko cang. Amah belte van Gaal chawngtu ding ah Giggs maw an duhdeuh hnga Mourinho timi hi a fiang tuk lo. Mourinho nih hin a thiamnak vialte chuah in United hruaitu pawl sinah manager rian a hal hrimhrim fawn lai ti cu a fiang, i Giggs cu a mitau lawng a phing ve rih kho men.