Tu Zanlei Ka Lung i Ka Chiah Khawh Lomi

Ttihnak
ngei lo in
ca ttial.
Zangfahnak
ngei lo in
Edit.

Cattial ai hrawtka tete kan si, i a ttha tuk. Asinain tthancho hi a har ngaingai. Cattial leiah kan tthancho lo lawng si lo in kan caholh, bia le hla a tthangcho kho lo. Ca ttial lengmang hi a za lo, cattialtu he a reltu zong tthancho khawh nakding ah ttialmi ca hi edit tuah hrimhrim a herh. Aho paoh nih editor an herh (Everyone needs an edtor) ti a si.

Ka ttial ciami ca pawl ka rel tthan hna tikah ttha tein ka rel tthan i keimah tein (editor hlan lo in) ka editmi le edit bak lomi hi an rak i dang tuk. Mekazin le journal pawl i ka cabia ka rel tthan tik zong ah Editor hi a thathu maw, a fel maw, cun a thiamngaimi a si maw ti khi a ka ruahter tawn i thleidan khawh pah an si tawn.

Freedom of Speech ti a lar, kan uar cio i ca cu zalong le ttihphannak ngei lo tein ttial awk a si fawn. Cu ve bantuk cun Editor hi an biapi tuk, i careltu mipi a ngeimi Mekazin, Journal le cauk caah cun rengh bak le felbak a herh fawnmi a si. Freedom of speech kan ngei aipet tiah mah duh salam in ttial i Editor zong nih remh piak lem lo ahcun cattialtu he a reltu miphun ca tiang ah thil ttha a si lo.

Atu zong ka ttialmi edit ka tuah chung tikah keimah ttialmi tiin ka ruah chung cu zeihmanh palhnak ka hmu lo. Asinain mi tialmi siseh law, tampi ka hmuh lai, nain ka remh ngam lai maw? Editor cu ka herh te lai, nain zangfahnak a ngei lomi a thiam zong thiammi editor ka duh ko hnga. Man phalh bak ve an hau, quality ttha pei kan duh cu, fial sawh men cun a si kho lai lo.

Editor nih hin pengtlang le ram pakhat politics le societies a remh i a thlen khawh pinah a fimter khawh hna. Nihin i online editors, online media pawl i mipi caah kan ttialmi ca le kan lehchommi hi a thim kan thiam ngai kho men nain miphun caah thilti khawhnak, tuah khawhnak kan ngeihmi hi miphun caah a tthabik in hman ahcun kan miphun khuaruahnak lei ah a sangdeuhmi a chuahpi ko lai.

A donghnak ah mi tamdeuh caah ca a ttialtu hna nih a si khawh chung in cattial i ralring kan hau. Kan ttialmi holh/ca hi thukdeuh zong in kan ruah a herh, kan cawn pah a hau. Kan pale hmanh nih an duhduh in an ttial timi te hna hi fimnak he a tthangmi mino kaa in le kutdong in a chuah awk a si lo. Zapi nih hmanmi kha zulh i ralring tein kan holh hi ttial ding a si.

Ka lungchuak bia!