 |
| President Thein Cozah le dotu Suu Kyi. foto: Daily Mail |
Relchap: Caan Um Lio Ah Myanmar Cozah Nih Ser An i Hnawhmi Phung
NLD nih teinak an hmu i zeibantuk buainak hmanh um lo tein nawlngeihnak cu kan pek hna lai, i cozah zong an ser lai tiah thlennak kha USDP nih ttha tein an cohlan i a rauh hlan te ah Parliament ah cozah thar an tthu cang lai. Hi ti ruah tikah mang hna a lo thulh kho men, kum 50 leng ralkap nawlngeihnak tang ah khua a sa cangmi hna nih mah ti thlennak von phanh cu lawmh zong a um i nawlngeihnak an pe taktak sual lai lo tiah thin zong a rak phang.
Sihmanhsehlaw, buainak um lo tein le thisen luang lo tein cozah thlennak cu a chuah cuahmah i Democracy lam an on mi cung ah Democracy lam cung ah thlennak taktak cu National League for Democracy (NLD) nih teinak a hmuh caah a kalpi lai tiah ruahchan a si.
Thein Sein a chim bantuk in "Teinak" taktak a si. Cucu NLD ca lawng a si lo, rammi vialte caah a si. Hi zawn ah ka chim lengmang mi cu thisen luang lo tein, tlirhkhonhnak le tthihphaihnak um lo tein nawlngeihnak a pe khotu Thein Sein party hi fak lo awk an ttha lo. Thein Sein hi Nobel Prize hmanh pek a tlaak kho tiah ka rak chim bal. Ralkap uknak tang in mipi duhmi uknak thar ah i thlen lio caan i President a ttuanmi Thein Sein hi harnak tampi lakah a tuah khawhmi a tuah ko tiah ka ruah, i tuanbia nih a philh lai lo.
Aung San Suu Kyi nih teinak a hmuh hnu ni tlawmpal ah ralkap bawi le ralkap hlun, cunglei bawi a ton hna tikah phan awk um lo, dai le zalong tein a ton hna. A caah a har ding cu hriamtlai phu phu-15 leng he daihnak ser hi a si deuh ding ah a tla cang. Aung San Suu Kyi nih zeitindah a ralaimi Daihnak kong hi a kalpi te lai timi thintur ngai in kan hngak cio.
Relchap: Kahdaihnak Kong Ah Lung Kar Mai Tenh In Suu Kyi!
Hmai thla i president thim tikah thim a si ti lo ding Thein Sein nih nawlngeihnak i pekchanh kong ah "Myanmar mi vialte caah Teinak a si" a timi hi cinken tlak ngaimi bia a si ko. Ralkap nih kum 50 nawlngeihnak an tlaih hnu 2011 thawk in President rian a ttuanmi le a cozah a tlaihmi a ralaimi cozah caah "a fawi le a tthadeuhmi a hrampi" a ser piak hna tiah a chim fawn.
"Ka si khawhnak vialte hmang in hnulei kir lo ding kha ni dongh tiang kai zuam pengmi a si," a ti. "President dirhmun in ka tuah khawhmi le ka nawlngeihnak vialte cu a tthabik in ka rak hman ko," tiah a chim rih. Atu cu NLD le Aung San Suu Kyi kut ah Kawlram a um cang.
November i teinak an hmuh hnu ah Suu Kyi nih President Thein Sein, ralkap bawi Min Aung Hlaing, le a biapibik a simi kum 20 leng ralbawkzik hlun Than Shwe a rak ton hna. Zeibantuk bia an i ruah taktak timi kan hngal kho lo, theihthiamnak cu ngeih hna dawh an si, nihin tiang Cozah i thlen ding a tluang.
Zei a si hmanhah, NLD le mipi nih an ttihmi cu a cung i Suu Kyi nih a tonmi hna pawl nih hin parliament thar i mipi thimmi MP pawl an dawi khawh rih hna timi philh awk a ttha lo. NLD nih 1990 i teinak an hmuh i cozah ser le uknak tlaih an timh tikah ralkap nih an chuh hna i an party minung tampi thong an thlak hna, an thah hna, i amah lila zong a nunnak caah thin a rak phang. Cu ticun kum 20 hrawng ralkap uknak tang ah a thih ni hngak in innthong a tlak chel, tlirhkhonh a ton chel in a rak um.
1990 lio a cangmi nolh ti lo in tutan cu NLD nih USDP member cheukhat zong Parliament ah hruaitu dirhmun pek hna ding in bia an tiamh hna, i nihin ah Deputy Speaker cu Upper le Lower House ah pek ding in Nominate an si. NLD nih hin Tlangcungmi zong hmun a pek hnik hna i Upper le Lower House ah minung pathum cu Nominate an si ve, cucu NLD nih rammi vialte a huapmi cozah si an i zuamnak pakhat a si. Chin tu cu kan lung lian tuk i kan rual khawh rih lo caah kan i tel lo.
A donghnak ah Suu Kyi cu phunghrampi nih a kham caah President a duh ko nain a ttuan kho rih lai lo, i ahodah President a ttuan lai timi hi atu tiang cu a fiang lo, nain Suu Kyi ttuan khawh lo ding in 2008 phunghram nih a rak phihmi hi NLD cheukhat nih Ralkap an lawmh ngai ttheo hna lai, a cuh in an i cuh ko cang.
Cc: Ft.com, Svd.se, AFP
Comments
Post a Comment