Real Madrid nih Tottenham in Gareth Bale cu vawleicung a manfakbik in an rak cawk tiah Football Leaks nih January 20. ah a phuan. Mah cucu Real Madrid nih an duh lo ngaimi, an thuh pengmi a si.
Tu kum January 4. ah khan BBC journalist Jonathan Northcroft nih Real Madrid i Bale an cawknak phaisa zah ttial lo ding in Real Madrid nih an rak chimhmi kong a phuan. Zeica tiah cun, "Ronaldo nih amah nakin a man tamdeuhmi an um kha a duh lo," tiah Real Madrid club hruaitu nih an hngalh caah a si.
Asinain 2013 i Bale an cawknak kha Euro million 100 a si tiah bia a puang cang. Kum hnih le cheu chung hi Bale kan cawknak cu Euro million 91 a si tiah Real Madrid nih an chim. Cu tining a si ta ahcun 2009 i Manchester United in Real ah Euro 94m. in a rak i tthialmi Ronaldo hi manfakbik in cawkmi bawlungchuih thiam a si hnga.
Asinain thil pakhat a ummi cu Tottenham le Real Madrid nih Bale kong an ceih lio ah voikhat pek ah Euro 87m. maw na kan pek lai, Euro 25m in voi li indah na kan pek lai, tiah Tottenham nih an rak hal hna, tiah Football Leaks nih a phuan.
Vawleicung club ah Income tthabik Real Madrid nih million 25 in voi li pek an rak duhdeuh caah Bale a man cu Euro million 100 a si. I A man hnatlaknak chung i aa telmi ah Tottenham in Bale an cawk zah le an cawk ning kha chim bak lo ding ti a si. Ronaldo nih a theih ding an duh lo.
Football Leaks cu Vawleicung bawlung club le a chuihtu hna nih an thli thup in an tuahmi phuan hi an i timhmi a si. A hlei in Europe i club pawl nih mi thar cawk le zuar ning kha biapi in an zoh.
Atu hi Real Madrid biathli an phuan cang, Bale hi vawleicung ah a man tambik a si ti a theih ah Ronaldo hi aa nuam ruam lai lo dah.
Comments
Post a Comment