Ram 19 Nih Norway Ngakchia Phung (Barnevern) An Doh

London i Norway nagkchia phung duh lonak an au lio. Foto: Støttegroupen/facebook/vg

Tu zarh chung ah vawlei tthen pathum i hmun hleikua ah Norway Ngakchia Phung, anmah nih cun Barnevern an ti i mirang in cun Child Welfare timi duh lonak an langhter. Norway i a ummi hna nih cun Barnevern timi biafang cu kan theih tukmi a si. Asinain Norway phung le upadi (law) a si komi kha zeiruangahdah miphun dang le ram dang nih an doh hnga, tiah ruah len awk tlak a si hnga. I Norway cozah, political party le miphun zong nih an hon ruah ngai cangmi phungphai biapi ngai a si cang.

Norway um Laimi nih cun Barnevern cu a huatu kan tamdeuh. Kan lung zong a fiang hna lo. Kan theihmi cu Barnevern rianttuannak hi nawlngeihnak sangtuk a ngei, i kan ttih. Zei caah dah kan ttih ti ahcun, Norway ah a ummi chungkhar tampi nih an tonmi nu le pa sin in fale lak piak (chuh) ruangah a si. Na fa cu Norway ngakchia zohkhenh ning phung/upadi he aa ralchan in na tuah, na chimh, na zohkhenh kho lo tibantuk le a taksa faak tiang in na tuk/velh ruang ah an laak khawh i cozah nih a ttha an tining in zohkhenh le cawm piak a si (a tawinak in chimmi a si, an in lak piak hnu zong ah rian na ngeihmi a um rih).

Laimi zong kan fale an kan lakpiak. A ruang a tampi. Hi Barnevern he pehtlai in Senri Mekazin 2015 chuak ah capar ka ttial "Zeitindah Fale Lakpiak Hi Kan Hrial Khawh Deuh Lai?" timi capar a si i Norway um Laimi paoh nih cun Senri Mekazin caw ulaw rel ve ulaw tiah kan siaherh ngai hna. 

Norway miphun caah cun buai awk a tlawmdeuh, aruang cu fale velh an hman ti lonak a sau cang. A si khawh chung in tuk le velh in chimhhrin le cawnpiaknak kha an hlawt. Culio ah Norway i a hong peemmi ram dangmi, a hleiin biaknak lei a tlaihchan rihmi miphun pawl nih fale tuk-velh le hrocer kan hmang. Nichuah lei in a rami ko hi kan zual i Europe ciocio zong ah nichuahlei Europe pawl hi nihin tiang fale an tuk rih hna tikah Norway ngakchia phung nih a tlaih lengmang hna. Cu tikah an fale cu nu le pa sin in lak piak an si i cozah nih a cawmtu ding ah thim piakmi chungkhar nih an cawm hna i an nu le pa taktak sinah kirter le lenkaiter an si ti lo. Mah cu hringtu nu le pa caah a fak tukmi a si caah Norway Barnevern hi an huat tuk.


Ram dang in Norway Barnevern a do i chiatnak a aupi hmasatu pawl ah India an si i a luancia kum 8 chung hrawng kha Norway le India cozah pehtlaihnak a tha a der ngaingai. A ruang cu Norway i khua a sami India chungkhar an um i an fale an vuak hna (India fale an velh le an ti hna ning) tikah Norway cozah nih an lak piak hna i an pe ti hna lo. Sihni an hlan, i Barnevern cu taza an cawi hna nain an tei hlei lo i cu ticun India cozah nih Norway cozah cu an lakpiak mi fale pek tthan ding in an rak hal hna nakin aa thawk.

Cu hnu ah Saudi-Arabia nih fak tuk in a sawisel i nihin tiang Norway Barnevern (Child welfare) cu a chia tukmi a si, tiah a sawi rih ko. Refugee in a peemmi hna nih cun tampi chim a si rih lo nain, rianttuan siseh, sianginn kai le pawcawmnak ah a peemmi hna an fale an lak piak hna tikah an ram Embassy ah an kal tawn caah tihin van buaipi a hong si.

Poland an fale zong siseh, Romania mipeem an fale zong an lak piak hna. Nihin zarhte ni ah Romania khualipi ah Norway Ngakchia Phung duh lonak an aupi. London zong ah an aupi i USA le Canada zong ah hi kong duh lonak cu mah lungtho cio in an aupi.

Zeicaahdah an aupi, ti ahcun Ngakchia an lak piak hna tikah nu le pa an ngaihchiat le an tuarmi kha an zoh sawh kho hna lo. Ngakchia lakpiak taitai hi cu a ttha lo tiah an aupimi a si.

Laimi zong kan fale an kan lakpiak. A ruang a tampi. Hi Barnevern he pehtlai in Senri Mekazin 2015 chuak ah capar ka ttial "Zeitindah Fale Lakpiak Hi Kan Hrial Khawh Deuh Lai?" timi capar a si i Norway um Laimi paoh nih cun Senri Mekazin caw ulaw rel ve ulaw tiah kan siaherh ngai hna. 

Happy Sunday!

Cc: Dagen, VG