Obama Tlau Hram Aa Thawk Zan le State of the Union

kl.

Washington, DC i politisian pawl cu an caan hi i sik le i alnak ah an hman a tam ko lai. Phung (upadi) thlennak kong ah Republican le Democratic party lung i tlinpi khawh cu a har ngaingaimi a si. Kanmah Laimi lila hmanh cu Obama duh le duh lo kong in khuaci kan va mui. Asinain tu zan thawk cun Obama cu kan phone le computer cahmai in a tlau thluahmah cang lai i amah zong DC ah i si in i al len caan kha a kaltak deng cang.

Kum khat i voikhat an party pahnih fonh in itonnak cu Congress ah an tuah tawn i cuka ah cun President nih bia a chim tawn. A min ah "State of the Union" an ti. President caah a biapi takmi biachimnak a si lengmang.

President Obama nih January 13 zan suimilam 9:00 (DC time) ah Congress le USA mipi sinah State of the Union cu a tuah lai i mah cu a hnubik a chimmi a si cang lai. President a ttuan caan a dih aa thawknak zong a si lai bantuk in a biachim dingmi hi voidang nakin a phun aa dang deuh lai tiah Obama ruahnak petu hna nih an chim.

[Live in zoh khawh a si, atang hin}
"State of The Union" kong ka ttialmi hika hin rel khawh a si. 

Zei bantuk a va chim zong ah a biachimmi pakhat hnu pakhat in a dih tikah kut a bengtu cu Democratic party lawngte an si lai, cucu a si tawnmi a si.

Obama nih tutan a biachimnak ah Phung(upadi) ser a duhmi le thlen a duhnak kong tampi a chim te lai tiah an rak i ruah cia hna nain Kawlram Cozah bantuk cu a si rua lo, Upadi remh le sernak kong a chim tuk lai lo tiah a biachim ding a phuangtu an rak um. Cu bantuk cun President a ttuan kum i a tuah khawhmi thil pawl a chim len lai lo.

 Ni kum ah khan Congress (republican lawngte) sinah bia a rak chim i tutan cu American mipi sinah bia a chim lai, tiah White House i Communication-director Jennifer Psaki nih The New York Times ah a chim. Hmailei kong ah American nih zeibantuk biachahnak, asiloah zeibantuk timhtuahnak dah an ngeih i hmailei caan hi zeibantuk dah siseh ti an duh timi kong a chim te lai.

A biapi in a chim ding hna lak ah pali cu Administration nih an phuanmi chung in:

  1. Economy (Sipuaizi): USA ah a biapibik cu mah hi a si ko. Cun Obama cozah kai hnu in rian 14.4 million kan ser an ti. 
  2. Climate (khuacaan): Obama hi vawleicung khuacaan kong a buaipimi president a si i phundang ngai a si. Amah chan ah USA nih Climate kong ah rian tampi a ttuan. Asinain mirum le republican pawl nih fak tuk in an doh. Khuacaan aa thlenmi cu minung tuahsernak ruang ah a si lo tiah Rep. nih an dirpi. 
  3. USA leng Vawleipi he pehtlaihnak: George W. Bush nih cun mi he ttuan tti nakcha in mah lawng Vawlei ah dir a rak i thim (Irak 2003). Obama nih a si khawh chung in mi he ttuan tti a duh. Iran he Atomic kong an i ceih, Cuba zong a rem i biaruah/chawnhbiak (diplomacy) a dirpi. Amah hnu a chuak ding president nih teh zeitindah a tuah te hnga?
  4. Health-reform: Obama a rianttuanmi ah hlawh a tlingbik pakhat ah a cang, Rep. nih an phelh tuk bu in. White House chim ning in cun cu hlan i Healthcare a rak ngah lomi million 17 nih an ngah. Mah cu American nih an duhmi a si maw? Republican nih cun kan hrawh colh lai, ti an si.

Tu zan State of The Union ah a ralaimi President kong a chim te hnga maw? A chim ahcun amah party minung Hillary Clinton kong a chim hnga. Asinain a chim men lai lo, Asinain nai hrawng cu Obama thil tuahmi tete ah Hillary nih a fak ngai, an i hmu thiam ngaimi a lawh caah zei a chim paoh ah Hillary caah a chialei cu a si lai lo tiah ka ruah.

Barack Obama cu 49% nih a rian ttuan ttha lo, an ti. I mah cu belte cu Hillary caah a ttha tuk lomi a si.

Obama cu a huatu hna nih a phunphun an puh. 666 an ti, amah hnu president an um ti lai lo, an ti. Cu pawl cu hmailei ah biapi ah a chiami si ti hlah usih. Tu hnu thla 11 lawng White House ah a um cang lai. Mangtha nan ti cia khawh.
--------

 Kai lawm. A ttha na ti ahcun na hawile rak share ve hna.



Comments

Post a Comment