Tu zing ka thawh ah Manchester United le City nih Barcelona hmaikal Neymar cawk an duh veve timi thawngpang ka hon rel cu ka saduhthah a tling lai tiah kai lawm ngai. Zeica tiah vawleicung bawlung chuih thiambik pathum lak ah Neymar hi a rak i tel i Barcelona in i tthial sehlaw, atu nakin a lang lai tiah ka ruah caah a si.
Nihin thawngpang cu Manchester in thawk usih law, United le City nih Neymar minthut an i cuh ee tiah Goal nih a ttial. Barcelona hmaikal nih a duh i an zuar a si ahcun Premier League i hlawh sangbik a si lai. Guardiola nih City tlaih a timh tikah Neymar hi a leem khodeuh te hnga maw?
United nih Benfica alaikal Renato Sanches an duh ngai, kum 18 lawng a si rih i Euro 35m. hrawng a si rih. Neymar a si khawh lo hmanh ah Cavani, Real Madrid zong nih an duhmi PSG hmaikal hi hal an timh hna tiah ESPN nih a ttial ve. Barcelona hmaikal hlun Valdez cu United nih an hlonh cang.
Pep Guardiola hi tutan Season dih tiang lawng Bayern ah a um lai ti cu a fiang nain Manchester City a tlaih lai timi cu mah tluk cun a fiang lo. Sihmanhsehlaw, Manager thiambik ah ruah vemi Guardiola cu United zong nih an leem, an bawh ko ti a fiang bak, Ferguson zong nih amah hi ai dinh lai i mi an kawl lio i a rak zoh hmasabikmi a si. Januar 21, ah United hruaitu hna nih Paris ah Guardiola an ton tiah bia a chuak i, mah cu zeitindah a si khawh? tiah biahalnak a um colh.
Atu tiang City ah min a thut lonak a ruang cu Bayern le City hi Champions League ah an i ton khawh caah a si, tiah Twitter ah journalist pakhat nih a ttial. A bia ning in cun 100 ah 100 City manager cu Guardiola a si lai.
Manchester Evening News nih a tialning ah atu i City Manager Pellegrini nih tutan innka (transfer-window) ah mi zuar le cawk kan i tim lo tiah a chim.
London ah kal usih law, Arsenal fans caah thawng ttha cu Alexis Sánchez le Mesut Özil an dam cangmi hi a si. Cu pinah Arsenal ah manager rian peh ding in minthut aa timmi Wenger nih Francis Coquelin, Danny Welbeck le Tomás Rosický zong an dam i a rauh hlan ah an chuih kho lai a ti.
Chelsea cu The Talk ttialning ah Everton an arfi John Stone cu cawk hrimhrim an i tim. Chelsea ngeitu nih Terry chaangtu ding ah a duh i 50million pund in a ngamh ti a si. Cuti a si ahcun Everton nih kalter te dawh a si ko. Hnukham an kawl cuahmah i PSG captain Thiago Silva hi a ralaimi tthal tikah cawk ding in an hal hna. Pato cu ESPN chimnak ah Chelsea ah chuih ding in redi a si cang.
Liverpool nih Alex Teixeira an duh ko nain a chuihnak club nih an hauhmi zat 38million pund in an duh lo, nan cabuai ah 24.6million pund kan chiah colh lai nan sian ahcun tiah Klopp nih a ti hna. Livepool nih an herhmi pa a si i an cawk ding khi a si ko, nain Morata hi Liverpool ah Juventus nih kalter dawh in a um pah caah a si kho ko.
Spain ah heikal duak usih law, Fernando Torres kha nan philh rih men lai lo, Liverpool ah goal a rak sut kho takmi Chelsea ah a tlaumi kha AC Milan nih an rak cawk hna i atu hi Spain La Liga, a rak chuih tthingnak club ah a um. Hlan bantuk cu a si ti lo, nain Atletico Madrid nih kan i lak beh lai an ti.
Real Madrid nih hmaikal cawk an duhbikmi cu Bayern hmaikal Lewandowski a si, tiah AS nih a ttial. Bayern nih Napoli hmaikal Higuain an zoh pah tikah Lewandowski cu man tampi in zuar an i timh ca zong a si kho tiah ruah a si i Real i Lewandowski a chuih hmuh ding cu ka saduhthah ngai a si ve.
Club dang cu nan thei duh tuk theng lai lo, cu vial.
Comments
Post a Comment