Manager Thiambik le Kum 10 Chung i Phaisa Hmangbik Manager

Foto: usa.chinadaily.com.cn

Chelsea Manager hlun Jose MOURINHO hi a thiam ko ti ahcun a altu kan um tuk lai lo dah. Atu ah rian lo in a um nain a tuanbia zoh tikah a biapimi teinak tampi a rak hmumi a si. Sihmanhsehlaw, 2015 FIFA nih manager thiambik tiah a thimmi 10 lak lawng ah aa tel i Finalist Pathum lakah aa tel lo. Nan ngaih chia hlah u, a luancia kum hra chung i phaisa a hmangbikmi manager cu Mourinho a si ko. Teitu a ngei lo.

FIFA nih Coach/manager of the year 2015 a thimmi kong le manager thiambik kong kan luh taktak hlan ah vawleicung i club phaisa a hmangbikmi manager pawl tlawmpal hon zoh tuah hna usih.

Kum 10 Chung i Phaisa a Hmangbikmi Manager Pawl:
The Coaching Family nih Twitter ah an tialmi a si i Mourinho nih a luancia kum hra chung ah Euro million 844 a hman caah manager vialte lakah a hmang tambik a si. Inter Milan, Real Madrid le Chelsea a um chung i mi cawknak ah a hmanmi a si. A hon changtu ah Manchester City manager Pellegrini a si i Euro million 813 an hman ve. A tlawmbik a hmangtu hi tu zan i FIFA nih manager of the year 2015 an pek dingmi pa hi a si.

Manager thiambik timi pawl zong nih a ngaingai ti ahcun bawlung chuih a thiambik timi pawl an rak herh tthiam ko hna. Hrai lian thlir khawh nak ding caah chuih a thiammi le a tthami phu (team) an ser a herh. 2005 hnu in cun vawleicung minthang club si khawh nakding caah duhsah tein kal hi a ngah ti lo, i phaisa nih a duhnak paoh ah a thui cio cang hna. Cu a si caah manager pakhat nih Club pakhat a thar in nocawm le ser tthan timi hi an duh cio nain a hong um kho ti lo. Cu tikah Club rum le mi a caw kho dingmi club ah ttuan kha an duh cio, i minthang cia le a thiam tiah hngalh ciami pawl kha manfak pipi in an cawk cang hna.

Manchester City manager Manuel Pellegrini hi City a hruai hnu in phaisa a hmang tuk. Hman awk zong an ngeih caah a si pinah City cu vawleicung club lakah minthang si ding in an i zuam caah a si ve. Mino nakin cikhat te ah City teinak a hmuhter kho ding min ngei cia pawl, min thang taktak si ttung lo in manfak ngai in mi tamtuk a rak cawk. Premir League voikhat an tei. Pakhat cu Real Madrid ah Ronaldo kha record- in a rak cawk caah a si.

Bayern Munchen manager a si dingmi Ancelotti zong Real a ummi lio ah Bale a rak cawkmi le James, Kross te pawl pathumnak phaisa hmangbik ah a chiah.

Mah ti phaisa a hmangmi manager pawl hi min an thutmi kum chung le hmailei ca ruat kho lo in caan tawite chung ca lawng an ruah caah a si, tiah expert pawl nih an chim. Real Madrid le Chelsea nih fawite in manager an phuah hna i cu bantuk in manager kha teinak an hmuh lo tik le an i tinhmi hmun an phak khawh lo tikah an thlen lelek hna caah a si ve.

Alex Ferguson hi 2013 ah khan aa din cang nain a 10nak phaisa hmangbik ah ai tel. A tang ah khin zeizah dah a rak hman timi zoh khawh a si.

2015 kum Manager Thiambik 
Atu i Barcelona manager a ttuan liomi Luis Enrique nih 2014 in manager rian a tlaih i kum khat chung ah Barcelona cu Hrai pathum (triple trump) a lakpi khawh hna i cucu an club tuanbia ah avoi hnihnak a si. Roma, Celta le Barcelona manager a ttuan chung ah Euro million 301 lawng a hman i Mourinho he tah ahcun tamtuk in an i dang.

Luis Enrique hi manager a ttuannak kum 5 hrawng lawng a si rih caah tlawmte a hman zong a si kho men. Khatlei in Suarez an rak cawk lio ahhin amah manager a ttuan hlan in cawk ding fehter ciami a rak si fawn. Cu ti tuak cun a hmanmi tlawmte. - Zei si hmanh ah phaisa an hman a tlawm le a tam kong hi tam ngai ka tial ko nain a biapi tukmi a si lo. A fiangmi cu Club liandeuh paoh nih phaisa tampi an hman, i phaisa tampi an hmuhnak tawn ve.

FIFA nih manager thiambik an thimmi pathum lakah Guardiola aa tel. Asinain phan awk a um lo. Luis hi 2015 ah a thiambik manager a si hrimhrim. Champions league, Copa del Rey le La Liga a teipi hna lawng si lo in Barcelo FC nih tuanbia thar an ttial chap: 2014/15 chung i an chuihmi vialte ah 50 an tei, 4 an i tluk i 6 telawng an sung. Guardiola chan lio zong ah atu Barcelona team nakin an rak ttha chia deuh hlei lo. Cun Bayern ah Quardiola nih teinak a hmuh ngai ko nain 2014/15 ah Barcelona le Luis Enrique tluk in hlawhtlinnak a hmu lo.

Cucaah manger a ttuannak caan zong a tawi ko nain phaisa a hmang lo bik le avoi khatnak i Vawleicung minthang Spain La Liga 2015 ah tei ding vialte Barcelona teinak a hmuhpitu hi FIFA nih manager of the year 2015 an pek awk ah ai tlakbik tiah ka ruah.

Phaisa hmangbik Manager pawl: 
1. José Mourinho 844 million Euro
2. Manuel Pellegrini 813 m.e.
3. Carlo Ancelotti 635 m.e.
4. Roberto Mancini 601 m.e.
5. Pep Guardiola 520 m.e.
6. Rafael Benitez 512 m.e.
7. Louis van Gaal 459 m.e.
8. Arsene Wenger 453 m.e.
9. Brendan Rodgers 391 m.e.
10. Sir Alex Ferguson 382 m.e.
11. Massimiliano Allegri 370 m.e.
12. Laurent Blanc 344 m.e.
13. André Villas-Boas 343 m.e.
14. Luis Enrique 301 m.e.

RELCHAP: PEP Guardiola hi Manager thiambik a si tak maw? 

Kai lawm.