 |
| Foto: Col. Solomon. Private/Facebook (amah theihpinak in tarmi si.) |
Rampi kadaihnak minthutnak ah an rak sawm ve nain Rakhine ah NLD Campaign tuah ah a rak kal caah Suu Kyi cu fak ngaiin an rak sawi: Daihnak a duh lo maw? an ti. Asinain a leh vemi hna cu hi rampi kahdaihnak ah hriamtlai an zate in an i tel lo caah le cheuthum cheuhnih hmanh an si lo caah ka pom lo, ti a rak si. Asinain cozah thimnak an tei hnu January 2016 i Neypydaw ah an tuahmi cozah le hriamtlai phu pawl tonnak ah aa tel tthan.
NLD nih cozah thimnak a tei i cozah a tlaih tikah cun kahdaihnak hi a thar in a ceihpi hna lo hmanh ah cozah an tlaih kum hnih chung hi cu an rau rih lai tiah Eletion lai te ah ka rak ttial.
January 12, 2016 i Neypydaw ah Suu Kyi nih bia a chim tikah atu i kahdaihnak cu a tling lo ti lei in a chim taktak ve. Thein Sein cozah nih 2015 kum dongh lei ah Thein Sein cozah le hriamtlai phu tlawmte nih NCA minthut hnatlakpinak cu Parliament ah a rak chuahpi i Parliament nih an rak fehter. Mah cucu cozah thar a simi NLD hruaitu Aung San Suu Kyi sin in lungtlin lonak a lang i zeibantuk biafiang taktak hmanh a pe kho rih hna lo. A biachimnak ah hriamtlai phu le tlangcungmi hna he daihnak ser ding cu aa hmaithlak hmasami pakhat a si.
NCA hnatlaknak cu za ah za in a dohnak a lang lo nain 2010 in nawlngeihnak a latu Thein Sein cozah nih an rak kalpimi daihnak cu Ramkomh bu Kawlram chungtel vialte i tel i ser a duh. - "Ka fianning ah cun mah hi kahdaihnak itonnak cu rampi kahdaihnak caah hmelchun pakhat le lung i tlinpinak pakhat a si i a ralaimi cozah nih an lim ding rian a si, tiah Suu Kyi nih a chim tthan.
Mi zapi a huap khomi ti lengmang hi Suu Kyi nih cun a dirpimi a si. Cu tikah Kawlram i ramtthen a silo ah ram ngeitu cio nih an duhnak ah cheukhat nih "Mah tein i uknak asiloah independent" kha a duhmi an rak um. Cu bantuk dirhmun ah a dirmi Kawlram ramkhel kong ahhin Suu Kyi nih zeibantuk politics dah kalpi a duh timi cu zoh thiam a herh taktakmi a si. Cu a si caah Suu Kyi nih zei policy dah a ngeih timi hi fiang tein a rauh hlan hrim ah a chim cang ah a ttha hnga.
U Thein Sein cu President in a ttum cang. Kahdaihnak le rampi daihnak caah zeitindah a kalpi lai timi hi hmuh a si rih lo caah daihnak kong i karhlan ning hi tlawmpal cu tlangcungmi pawl nih an i harh pah rih kho men.
Ka capar i ka rak chim chung cang bantuk in cozah thar a kai ding nih hin Thein Sein cozah i kahdaihnak an rak kalpimi kha zeitluk tiang in an rak dawi i an rak i tel timi kan hngal lo. An i tel lo ti khawh a si. Cu a si tikah Myanmar Peace Center (MPC) i kum nga chung rian a ttuanmi vialte khi an hon thlen hna ahcun thil thar le rian har ngai ah a cang kho.
Atu ah MPC caah dollar in millian a za leng bawmhnak cu EU, Japan tibantuk sin in a ra tthan lai i MPC i rianttuan ding phu thar nih cucu zeitindah an hman tthan te lai? Daihnak caah hmanmi zahzat, mah pumpak le chungkhar caah zahzat cu a si ti men lai lo.
Nai Neypydaw an itonnak ah ralbawi zik Min Aung Hlaing nih Myanmar ah ralkap pakhat lawng a um lai, tiah a nawlh lengmang. Mah hi nih hin daihnak taktak a chuahpi kho lai maw, timi biahalnak fakpi in a tuah. Tlangcungmi nih kan duhmi zauk phung le ramkomh uknak cu ithim ko hna seh tiah Suu Kyi bia cu a si nain an kan pe lai maw? Mah miphun/ramthen ralkap ngei lo in hriamtlai pawl nih teh an duh lai maw? Suu Kyi nih zeitindah a tuah lai?
CNA ralbawi zik Solomon nih cun "zeitik hmanh ah hriam kan chia lai lo, Chin ralkap kan um lai," ti lei in Gen. Min Aung Hlaing biachimmi kong ah comment a tuah. Myanmar ralkap nih an duhmi le chuahpimi Union Army cu duh ding a si lo, a ti.
Zeitindah na ruah ve?
Comments
Post a Comment