Bawlung Biathli: Real nih United Phaisa In Cavani Cawk An Duh

Photo: Telegraph.co.uk/REX

January ah cun Europe hi a kik ngaingai, a hleiin Norway hi a kik taktak. Lam kalnak ttha lo in vur a tla i von thai hnu ah bawlung thawngpang van rel, cu i ttanhmi club nih mi cawk i timh lo ahcun tha a chia ngai (lai). Nihin belte mi ngiat lawng si loin cawk an van i thawk hnik cang hna.

Manchester United le Liverpool an chuih a hnubik ah Rooney nih dawh tuk in goal a sut, i a ke chuak tthan cang tiah United cu an i nuam ngai. Asinain United nih Premier League top-4 tiang tel an i tel khawh nakding caah mi thar cawk cu an herh hrimhrim. An zuar ding a fiang pah mi cu lubua pa Fellaini hi a si i AC Milan ah a kalte ttheo lai.




Louis van Gaal nih Toni Kroos cu lak a duh ngaingai, i Real Madrid nih an sian tuk hoi tiah Telegraph nih a ttial. Kroos hi Chelsea zong nih an duh. Kroos an zuarnak phaisa, tlawmte a si lai lo, in Edinson Cavani an cawknak lai. PSG nih Cavani an zuar hniknak a ruang hi Bayern hmaikal Robert Lewandowski cawk an duh caah a si i £70million in an hal lai. - Lewandowski hi an zuar lai lo tiah ruah awk a um ngai nain Bayern i Sport-Director nih Napoli hmaikal Gonzalo Higuain cu kan herhmi a si, a ti. Higuain nih tutan Season ah goal 20 leng a sut cang, Lewandowski zong a derdeuh hlei lo i Robert Agent nih: Nupi dawhte a ngei cangmi nih cun a dang zoh a herh lo tiah Bayern a ti hnawh hna.

Ryan Giggs nih Leicester goalbawh, Kasper Schmeichel cu David de Gea airawl ding ah a duh tiah The Sun nih a ttial. Kasper a pa hi United goal bawh hlun, Giggs he a rak chuih ttimi a si i Real Madrid nih David de Gea cawk an duh tuk tikah Giggs nih goalbawh thar a ngiatnak hi a si.

Chelsea hi Premier League in an tlak lo nakding ah an i zuam a herh i mi thar cawk zong an hauh bantuk in Evening Standard nih West Bromwichs i ngakchia pa Saido Berahino cu cawk ding ah an duhbik a ti. Costa aa khawn caah mi thar cawk an herh i Pato cu a ralaimi Arsenal he chuih tikah chuih kho ve ding in a minthut an hngak ti a si. Anmah bantuk in Tottenham zong hmaikal cawk an duh i Wissam Ben Yedder timi an zoh ngai. Liverpool nih an i cawk sualmi Mario kha nan philh manh rih men lai lo, AC Milan an hlanh hna nain a chuih caan a tlawm tuk i atu hi Balotelli cu West Ham nih Premier League kir ding in an duh tiah Goal nih a ttial.

Arsenal nih Dortmund hmaikal Pierre-Emerick Aubameyang an duhnak a sau cang. Zuar an sian a si ahcun Arsenal nih £53million hrawng an chuah a herh hnga. Amah hi an cawk lo hmanh ah Van Gaal nih a zuarmi Javier Hernandez cu Leverkusen ah goal a sut cuahmah i Arsenal caah goal sut ding in lak a duh. Chim ko ah cun tuan tein a rak duh ngai ko. Liverpool zong nih an duh ngaingai ve.
----

ra tthan te.