Australia Open Ah Djokovic Nih Andy Murray Voili A Tei

Australia Open teitu Djokovic le A ttapmi Murray. Foto: REUTERS/Tyrone Siu

Nihin cu bawlung chuih zoh lo in Melbourne ah kan mit kan chiah hna. Novak Djokovic nih Andy Murray cu final ah a tei hnu in Australia Open voi ruknak teitu sinak in tuanbia thar a ttial.

Djokovic hi Australia Open voiruk a teitu a hong si i 1960 kum hrawng i voi ruk tiang teitu a rak simi Roy Emerson he tuanbia thar a ttial. Atu a teimi hi Grand Slam-title 11nak a si i Tennis tuanbia ah minthang a simi Rod Laver le Bjorn Borg hna he an i rual cang. 

Asinain Grand Slam-17 a ngeitu Roger Federer a phak nakding ah teinak paruk a bau rih. Atuning in a thazang a tthat rih i a dam ko ahcun caan tampi a lak cu a hau theng lai lo. Djokovic nih hin kum ruk chung ah Australia Open voi nga a tei. Tu kum chung ah Grand Slam Tournament tuk ding tampi a um rih.

Bjorn Borg le Rod Laver te he aa rual in a um khawhmi cung ah aa lawmhnak a chim hnu ah tuni final i a sungmi a hawipa Andy Murray zong faknak le thapek nak a chim. 

- Nangmah cu a min lianmi na si. Andy, ka hawi ttha le mi tha na si. Australia Open tei ding in zuamnak caan tampi na ngei rih lai tiah fiang tein ka chimngam, tiah lawmhnak a chim lio ah a chim chih. 

Australia Open final hi Murray he voilinak an tuk a si. I a voili ning in Murray a sung. 

Murray nih an zumhbik mi Djokovic tei khawh ding in fakpi in aa zuam, nain Djokovic nih 6-1. 7-5. 7-6 (7-3) in suimilam pathum deng an tuk hnu ah a thai. 

Djokovic cu Melbourne ah aa nuam ngaingai. A khua bantuk ah a cang. Australia Open hi a voikhatnak Grand Slam a tei a si i 2008 ah khan Jo-Wilfried Tsonga a rak tei. 2012 ah Rafael Nadal a rak tei tthan i mah cu hnu cun 2011, 2013, 2015 le 2016 ah Murray cu khuaruahhar ngaiin UK ah a kirter. 

- Autralia Open voi ruk tei cu khuaruahhar ngai a si ko. Cun Novak hi nai kum hrawng cu tluang tein a tuk khawh caah zumh hi a har lei tiah Murray nih teinak aa tlunpitu Djokovic kong cu a chim ve. 

Murray lawng hi Grand Slam tournament ah final voili tiang kai i a voili ning in teinak a hmu lomi a si lo, Ivan Lendl cu Grand Slam-tournament voi nga tiang teinak hmu lo in final a rak kai, i a voi ruknak ah US Open cu a rak tei. Mah cun US Open cu voithum a rak tei ve. Murray zong Ivan bantuk si khawh a si ko. 

Andy nih lawmhnak a chim lio ah a mitthli he nau a pawimi a nupi Kim Sears cung lunglawmhnak a chim chih.