 |
| Presidential candidates Jeb, Sanders, Hillary le Trump. Foto: reviewjournal.com |
Relchap: 2016 Chung A Cang Kho Ding Cuanhnak
Cawn nikhat ni (feb. 1.) ah Iowa State mipi pawl cu Vote pe ding in vote peknak hmun kip ah an i pong lai i Democratic le Republican in an duhmi Candidate kha President i cuh ding in an thimnak (nominate) an thawk lai. Zarh khat tuan in Candidate pawl nih an minung an rak thlah cio cang hna i anmah pumpak zong nihin ah an va kal pah cio cang.
A hnubik i mipi uarmi pawl tahnak ah Democratic ah cun Hillary Clinton nih Bernie Sanders cu a lonh, i Republican ah cun Donald Trump nih tam ngai in a tei hna i amah zuamcawh kho ding in a langmi cu Ted Cruz lawng a si.
USA president thimnak hi a kong tampi a um, an i zuamnak a tampi. Asinain a biapibik in an i dannak a langmi cu Republican nih Washington DC le USA ralchan in huatnak le ttihnak kha an i buaipi, i Democratic nih cun an ram Siipuazi kong hi an i buaipi ve.
Republican in President cuh a duhmi an tam ngaingai i an lung aa khat lo tiah ruah an si. Democratic in cun an tlawmte. An party pahnih chung in USA President a si kho ding, zumh a simi minung hna an kong tawi theih a ttha tiah ruahmi cu mah hi an si.
Hillary Clinton (democratic):
Hillary Clinton (68) cu Barack Obama avoi khatnak cozah ah 2009-2013 tiang Secretary of United States a rak ttuan. Mah cu hlan cu New York State caah Senator a rak si. A va pa cu avoi linak USA President Bill Clinton a si.
Hillary a larnak cu Working-class timi zaran minung pawl caah fakpi in rian a ttuan, i a hlei in nu pawl nawlngeihnak le tthanchonak caah aa zuam. Amah hi a hmasabik US nu president si khawh a si.
President aa zuamnak ah dawntu bik a simi cu Email kong a si, i a thlite in a him lomi an chungkhar networks in biathli a simi Informations a kuatmi kong a si. A pahnihnak cu Nu nih USA uk cu tiah nu hi zei ah a rel lomi pawl an si.
Relchap: Mi Vanchia Hillary Clinton le Aung San Suu Kyi
Bernie Sanders (Democratic):
Democratic party ah cun Hillary Clinton nakin a larmi an um lo nain nai hrawng tein Bernie Sanders timi Socialist ruahnak a uartu hi dawntu a si kho.
Kum 74 a si cang i President i cuh ding in min a pek lio ah mi tampi an rak uar lo tuk. Asinain a hnu ah cun mi tampi lung a thlen hna, i Democratic party chung in kehlei (socialist) a hoih deuhmi pawl nih an uar ngai.
CNN chimnak ah Sanders hi mino pawl nih Hillary Clinton nakin an uardeuh tuk. Amah hi Norway, Sweden le Denmark system a duh ngaingaimi a si.
Democratic party ahhin Hillary le Sanders dah ti lo a langmi an um tuk lo caah Republican pawl kan zoh cang hna lai. Democratic nih kum riat an uk cang hna i avoi thumnak cu Republican nih an i ruahchan ngaingai.
Donald Trump (Republican):
Chawlet (sipuazi tama) a si, i mirum le TV/thawngpang kip ah theihmi "reality-star" a si Donald Trump (69) nih tutan USA president thimnak cu a hninh ko. Media kip ah amah hi cahmai pakhatnak ah a lang cang. US le Washington ah ralhrang an lut sual lai ti phannak he mipi lung laak aa zuam.
Asinain Iowa State an iton hlan a hnubik Party Debate ah a nuar caah aa tel lo. USA ah Muslim pawl lut ti hna hlah seh tiah a aupimi ruang ah United Kingdom ah Trump cu lutnak nawl pek lo ding a si tiah ting-nga leng mipi nih UK-parliament ah ca an ttial i parliament zong ah Debate an tuah phah.
Trump hi nupi pathum in chungkhar pathum a ser bal i fa panga a ngei.
Relchap: Trump Hi Republican Caah Candidate A Si Ahcun A Poi Ngaingai Lai
Ted Cruz (Republican):
Kum 45 a simi sihni Ted Cruz cu Canada ah a chuah caah amah he aa zuammi Donald Trump nih teinak ah a hman lengmang. USA president icuh tikah hin an chuahkehnak hi a rak biapi tuk.
2013 thawk in Texas State aiawh in Senate ah a tthu ve. Media le mipi lungthin ah Trump changtu a si. Politics ah orhlei ruahnak a ngeimi a si i Tea Party-candidate ti zong in ruah khawh a si.
Marco Rubio (Republican):
Kum 44 a si i Republican in aa zuam dingmi hna lakah a nobik a si. A nu le pa a cu Cuba in a pemmi an si. Law in sianginn a dih i fa pali a ngei.
2011 thawk in Florida State ah Senator a si. Senate ah a biapi in ramdang-pehtlaihnak le i runvennak leiah rian a ngeimi a si.
Tea Party nih an duh ngaimi a si.
Ben Carson (Republican):
Mi hlai lei ah minthang siibawi (neurosurgeon) a si. A min a than aa thawknak cu a pum/lu aa pehmi ngakchia dam tein a rak tthen khawh hna nakin aa thawk i vawleicung mihlai thiambik siibawi tiin an theihmi pa a si. Atu cu pensen a la cang.
Ben Carson (64) hi ngeih khat (Gay) tthitumnak a dotu a si. Obama Care a duh bak lomi a si. Siibawi a si nain HealthCare cu a doh taktak.
Jeb Bush (Republican):
Avoi 41nk president George H. W. Bush a fapa, le avoi 43nk president George W. Bush nau a simi Jeb Bush (62) hi Marco Rubio hlan ah Florida Senator a rak si i Marco cu a sinah rian a rak ttuan.
Bush te chungkhar hi US politics ah pehtlaihnak tampi a ngei i ramri kaupi a ngeimi an si. President kai cuh ve lai tiah Jeb nih a rak chim hnu in 2015 canceo tiang ah amah nakin phaisa a khawm khomi an rak um lo.
Iraq ral 2003 kong ah a upa ruahnak aa hrawm le hrawm lo kong an halmi ah "President rak si ning law ka tuk ve ko hnga," tiah avoikhatnak a leh hna i a thaizing ah aa dang in a rak chim tthan hnu in a thawng a dai.
Relchap: Jeb Bush Nih Zeicandah A Pa le A Upa Keneh A Zulh Khawh Lai?
Thaizing, February 1, in cun Iowa ah ahodah president aa cuh lai timi fian hram aa thawk cang lai. An party cio nih an thimmi kan theih hnu ah hmuhning le ruahning ka ttial tthan te lai.
Ahodah nan uarbik i President tling seh ti nan duh ve?
Cc: Wikipedia/CNN le TV2
Comments
Post a Comment