New York le USA palek vialte nih thong bauh in a zaammi pahnih an kawl cuahmah hna lio a si. An pahnih in tih a nung tukmi, mi thah ruang in thih hlan lo thong pekmi an si.
June 6. (zarhteni) zingka ah kum 48 a simi Richard Matt le kum 24 a simi David Sweat cu New York i thonginn thabik, an conghning zong a thabik timi Clinton Corretional Facility in an zaam ti theih a si i cawnninga zan le zarhte zing karlak ah an zaam hi a si lai, tiah an ruah.
Mah hi thonginn cu kum 170 a hlun cangmi a si i an sak i an hman ni thawk in nihin tiang ah a zaammi cu atu i hi hna pahnih lawng hi an si rih.
Thonginn bauh in a zaammi pahnih hna hi tihnung ngaimi an si, an ti. Thonginn an bauh ruangah si lo in thong an tlaknak aruang, an rak tuahmi sualnak ruangah a si bik. Sweat timi pa hi 2002 ah palek pakhat a rak thah caah zeibantuk upadi le sihni hmanh nih chuah khawh ti lo ding in thih-hlan thong thlakmi pa a si. Matt tu cu 1997 ah pa pakhat kha a tlai-hrem hi thi lakin a tuk caah kum 25 chung thong pek mi a rak si.
Matt cu kum 10 hrawng a taang rih i kum 60 a si hlan ah thong in a chuak kho ding a si. Sihmanhsehlaw, Sweat tu cu thonginn ah a nunnak liamnak in leng ah aa hamdeuh bantuk ah a cang, an zaam tti.
Atu hi mah hna pahnih a tlai khomi paoh cu USD. 100 000 an kamh hna.
An zaamnak ding ah caan saupi timhtuahnak an rak ngei lai, tiah ruah a si i hi an zaam khawh nakding ah bawmtu le thilri zong an ngeih ti a si. Zaamnak a dawnmi thilri le thir tannak ding caah electric-thilri an hman khawhmi nih bawmtu an ngeih a fianter. - Mah hi thonginn ah innsak/remh liomi a um caah mah hna sin in thilri pawl hi hmuhmi a si hnga maw, ti le zeitindah an sinah a phak, asiloah bawmtu an ngei maw ti zong an hlat lio a si.
Vampang an ah i an bauh hnu ah thonginn tang vawli i ti, hnawm le a dangdang kalternak kua pawl an phan. An ngeihmi electric thilri cu an hman than i thir pawl cu an ah khawh hna tiah Sky News nih a tial.
Tunnels (leitang i hnawm, ti, thilri kalternak kua/lam) pawl cu an zulh hna i khuachung lam pawl i a kua an khuhmi thir cu an thial hnu ah an chuak.
A donghnak bik an hmuh hna hi cawnninga zanlei kha a si, nain zarhteni zingka ah an tlau tiah theih a si. Mah hi thonginn cu suimilam pakhat dan in thongtla an tlin le tlin lo zoh peng a si ko. Zan zong cu an zoh peng hna nain an pahnih in an thilpuan kha ihkhun ah an tom i a itmi bantuk in an tuah caah an luh hnawh in an zoh ti hna lo, ti a si.
Ziah an zaam tti khawh ti ahcun, innpa (an thong-innkhan aa changmi) an si caah a si.
New York uktu Andrew Cuomo cu a lungre a thei ngaingai.
- Mah hna pahnih hi tih an nung tuk, i atu hi khawika paoh ah an um/phan kho tiah zarhpini ah a chim.
Hi hna pahnih an zaam ti thawng a than khunnak cu an zaam i tunnels an luh lai te ah catlap eng bimi te pakhat an chiah ta i "Have a nice day" ti an ttial tami ruangah a si ve.
"Chun ttha u."
Cc: SkyNews, Flickr,
Comments
Post a Comment