June 15. ah Jeb Bush nih republican aiawh in president i cuh ding cu a fehter. Amah cu republican party chung in president aa cuh ding 11 (cuh a duh nain a chim rih lomi he cun 16 hrawng an si te lai) lakah an uar bik mi le a tei lai tiah zumh bik mi a si.
A min tling cu John Ellis "Jeb" Bush a si i amah lawng hi republican lakah Florida governor term hnih a peh khomi a rak si i 2002 khan 2007 tiang a term* hnihnak a rak tuan. Governor rian a chuah tak hnu ah amah kong i biahalnak a rak chuak lengmangmi cu USA president hlun pahnih i fapa le naupa a simi Jeb nih American politics ah kar a hlang ti lai maw, ti kha a rak si ko. Jeb cu 2016 USA election ah khin kum 63 a tling te lai. Amah cu USA election ah a biapi ngaimi Florida in a rami a si lai, i an party zong nih an duh ngaingai mi pa a si.
Anmah chung hi chan thar chung ah American politics cu naihte in a hmu i saang taktak in aa celhmi an si, i a upa G.W. Bush le a pa Bush nih president an ttuan chung vialte le an i cuh lio i "presidential camapaign" voiruk tiang a rak tongmi cu Jeb hi a si ve. Cucaah Presidential campaign ahhin US politics i a biapi timi cu a theibik pawl lakah aa tel.
Tu zan i President Candidate a simi a thanh hlan thla sarih hrawng khan Campaign caah phaisa kawl a rak thawk cang. A vanthat ve nak cu a chungkhat pawl hi mi tthawng ttha le mi theihhngalh tam a ngeimi an rak si caah a hlawhtling tuk ti a si. Bush asiloah Jeb! timi hi campaign caah na hman ahcun republican aiawh in aa cuh hnikmi dang pawl cu kar tamtuk in na rak thlau khawh hna.
Jeb Bush hi 2016 ah a hlawh tlin khawh nakding tampi lakah Spain holh nal tak in a thiammi hi le a nupi cu Mexico-chuak Columbia a si caah a si ve fawn. Mah cu a biapi ngaingaimi pakhat a si i a fale hrim zong holh phun hnih in phun thum tiang a thiammi an si hna i biachim le holh thiam cu miphun aa cawh tukmi ram pakhat caah a rak biapi tuk.
USA election paoh ah fimcawnnak hi biapi ah ai tel lengmang bantuk in mipeem kong hi hrial awk a ttha lo. Jeb nih miphun dang a tthit bantuk in mipeem kong ah a thar in khuaruah tthan hi lumsa ngaiin a chim ttheo- mah zawn ahhin a party he an i kalh deuh tawn. Bush nih fimcawnnak cu a hnak kar ah a tenh tukmi a si bantuk in nomination tikah buaipi bikmi si te dawh si. A ruang cu republican dang nih "Common Core" timi "national standards in math and English" a duh lotu state an tam i Bush hi mah hi Standards hi a uarmi a si.
Tu ca ka tialmi ah Bush ka ti chel, Jeb ka ti chel a si bantuk in Jeb Bush nih Campaign ah zeidah a hman lai timi an ruah tikah Bush cu a hmang ti lo, "Jeb!" a hman. An family-name cu Hillary bantuk in a hmang ngam lo. HillaryCliton tiin Hillary nih a hman lio ah Jeb!2016 tiah Jeb nih cun a hman cang. - A upa Bush cu a lar lo ngaimi president hlun a si caah le mi tampi nih anmah chung president pathum chuah ding (a hnu cun Jeb fapa zong aa cuh te kho, a pa biachim hlan ah donnak a chim ve.) an ruah thur lai ti zong a si kho men. Aruang cu G.W. Bush he hin party khat an si nain an ruahnak le kalpimi aa khat dih lo.
[Tahchunnak ah atu i Iraq kong kan theihmi hi 2003 ah khan rak thei usih law Iraq hi na kap hnga maw tiah Iraq ah nuclear a um lomi pi a um tiah Bush nih a rak kahmi kong he pehtlai in amah rak siseh law a tuah lai maw tuah lo ti an hal tikah "Ka tuah ko lai," tiah a leh hna. - Ahnu ah mah a lehmi cu nan biahalmi theih kai palh caah a si, ka kap lai lo, tiah a hnupi ah a leh tthan hna.]
A vapa keneh dawitu tiah kan ti khawh mi Hillary Clinton le a pa le a upa keneh a dawitu Jeb! hi 2016 USA election penalty aa sut ding ah zumhbik mi an si ko. Jeb! nomination a tei a si ahcun a tluang i a tthami campaign a herh lai i a pa le a upa nakin a thiamdeuh mi a sinak zong a langhter a herh lai. USA sipuazi ka tthatter lai, i buainak (problem) kan ser lai lo, a ummi hi kan phisin lai tiah republican aiawh in president kaa cuh lai ti a thanh nih ah a chim.
Youtube video ahhin Intro. tlawmte a tuahmi zoh khawh a si. (Photo: Reuters)
------
Rel ttha a si na ti ahcun hawi kua chin ve hna. Kai lawm.
Comments
Post a Comment