Kum 55 a simi min ngei manager Ancelotti cu a hruaimi phu le club ttanhtu (fans) pawl nih chanh an duh, i club hruaitu chung zong in cheukhat nih an ttanh ko. Asinain Bernabeu ah manager rian peh ding in dirkamhnak tling a hmu lo.
Kum 12 chung ah manager min ngei 9 rian a phuah hna:
- Real Madrid nih a ngenmi hi a tam i a lian. Atu cu a thar in duhnak le i sehchih mi lianpi kan ngeih a za cang- mah cu nih cun teinak- hrai a kan thlir ter than lai i club ttanhtu pawl a lawmhter hna lai. Zei si hmanhah Ancelotti nih kum zeimawzah rian fakpi in a ttuanmi cungah lawmhnak chim ka duh, tiah Real Madrid president Florentino Perez nih Ancelotti rian in a chuah ni ah a chim.
Mi rum a si i Real Madrid president a ttuanmi Perez hi a hruaimi club nih a duhmi hrai le teinak a hmuh lo ahcun manager te cungah zaangfahnak a ngei bak lo, ti a si. Daily Mail nih a chimning a si ahcun chawleh in a rummi pa nih hin kum kua chung ah min ngei manager 12 cu an rian in a phuah hna.
A luancia kum 10 chung ah leicung minthang manager a simi Vincente del Bosque, Manuel Pellegrini le Fabio Capello te hna hi Perez hruainak tang ah rianphuah a tongmi cu an si. - Tahchunnak ah Fabio Capello nih Real Madrid hmai thlak a simi La Liga cu a rak teipi hna nain Capello bawlung chuihter dan (style) hi a nuam lo i mi lung a laa lo tiin a rian an rak phuah. A dang cu an duhmi hrai kha an duhmi kum ah an cawi khawh lo caah an chuah hna.
Cu hlan cu manager an phuah hna tikah fawite in manager thar an duhmi an i thim khawh tawn. Cucaah cheukhat chungnawh i thlennak in voi tamdeuh an i thleng, ti khawh a si. Asinain tutan cu Ancelotti nakin a tthadeuh dingmi manager an sawh khawhmi a um rih lo, tiah sport media pawl ah an tial. Manager pakhat a chuah hlan in manager lak awk kha a rak um cang caah a chuah tawn hna i tutan cu an lam a maw, a fiang lo.
Perez nih "Real Madrid manager cu Spain holh a thiammi siseh law a tthabik," a ti. Cucaah Dortmund manager Jurgen Klopp khi an duh pah ko nain Spain holh a thiam lo caah an i donhter nawn. Spain holh ttha tein a thiammi thim ding phun a si tak ahcun Porto manager ttuan liomi Julen Lopetegui khi an zoh nawn. A no tuk rih belte i caan tawi caah cun a ttha lai lo. Atu ah cun hlan i Liverpool a rak hruaitu le atu Napoli ah a ummi Rafael Benitez khi a taang. Benitez cu a chuih-dan hi Real Madrid nih an uar lo ngaimi a si tiah TV2 nih a ttial. Amah lungtho tein Chelsea ah aa tthialmi Jose Mourinho cu kir tthan ding in an auh nain a duh ti lo caah Perez le Real Madrid nih Ancelotti an phuahmi hi cikhat cu bawlung vawlei ah khuaruah tam a si. Zinedine Zidane hi Real Madrid manager cu a ttuan te lai tiah zumh a si, nain tutan cu an ttuanter lai lo tiah ka ruah. Sihmanhsehlaw, mi tampi nih an bawh ngai i amah nihhin a chawn awk a si ko an ti. Khatlei in nai hrawng Real Madrid mino pawl a hruai hna ah teinak a hmuhmi a tlawm tuk caah a hngah deuh cu a hau lai, ti khi an si. - ESPN nih a chimnak ah Germany manager Joakim Low khi an duh. Asinain World Cup champions a simi Low nih hi tluk a tthami Germany Team hi a ralimi kum ah Europe Cup teipi a duh rih ko hna lai tiah ka ruah.
Carlo Ancelotti cu atu hi kum khat chung kai din rih lai tiin biakhiahnak a tuah. Real Madrid ah manager dirhmun in a um chung ah 74% hi teinak a hmuh pi hna. Cucu PSG, Chelsea, Juventus le AC Milan i manager a rak ttuan lio nakin teinak tamdeuh a hmuhmi a si. A ttuannak club pawl i teinak a rak hmuhning zatuak:
74% - Real Madrid
62% - PSG
61% - Chelsea
57% - Juventus
56% - AC Milan
Real Madrid a hruai chungah teinak a hmuhmi cu: UEFA Champions League: 2013–14, UEFA Super Cup: 2014, FIFA Club World Cup: 2014, Copa del Rey: 2013–14
R. Madrid president Perez nih rian a phuahmi manager hna cu:
Vicente del Bosque (23. june, 2003)
Carlos Queiroz (24. may, 2004)
Jose Antonio Camacho (20. september, 2004)
Marino Garia Remon (30. december, 2004)
Vanderlei Luxemburgo (4. december, 2005)
Fabio Capello (28. june, 2007)
Bernd Schuster (9. december, 2008)
Manuel Pellegrini (26. may, 2010)
Carlo Ancelotti (25. may, 2015)
Comments
Post a Comment