Thaal

Voi khat cu na rat kaan hmuh. Huamsam te le dai tein, cun a king. Na mirh. Ka ttap. A liamcia, cun a ralaimi caan le atu kong ah ka ttap. Na zapei an nem. Cun tthaal niceu nih a kan lumh, khuapi a langhnak Vuichip tlaang ah kan dir. Khua a pau, tthaal a si rih. Minote kan si rih fawn.

Thingkung le pangpar hna lakah na ka vuanhter, cun lung cung, tlaang cung le ti cung ah. Ka mirh. Na ttap. Cu hnu ah zeizongte hi an dai i zei thil dah a cang lai ti kan hngalh, hrial khawh a si lo zong kan theih ko. Nain kan ngeihmi caan tawite chungah kan i zohnak in kan mit kan tthial siang rih lo. Mah cu a cang ding kong cu philh ta rih kan duh. Caan tawite chung nun tti ta zong a tthahnem kan ti rih kha.

Nunnak kan zoh, thihnak kan ruat i kut zattial tlai in aho hngalh lomi hlei, a thli in kan rak kal tawn lio, liamcia caan kha kan ngai. Na kut cu an thlan, an sa. Na biang cu mitthli nih a ciarter.

Pangpar in ttialhmi T-shirt pante kai aih i pangpar nge pakhat ka awrhlei kut in ka rak i put. Nunnak ka kawl, thihnak ka hngak. Zeitik hmanhah a ra i a cang kho lo ding khuaruahhar thil ka hngak. Zei? Na ka pekmi thlahnak laksawng cu a nem i a lummi a hnubik hnamhnak a si. Ka hmur a rak ciar.

Ka ttap. Na ttap. Ka kut na thlah, ka biang na muai i nangmah te lawng, kha hlei thar panh in na liam thliahmah. Keimah lawg kha hlei tthing ah ka dir tthan i na hnu in zulh kan duh. Thihnak ka orh, hmailei caan ka hngak. Nangmah he nun caan kha ka ruat.

Voikhat cu na hun i mer ta, a hnubik a si. Na mitpum nak tete cu ka mit ah an taang. Kan mit kan ttheh zawn ah zungzal in cu nun thar ah kha hlei khan na rak liam. Kei zong inn ah ka lawi, i ka ihnak-khaan ka luh pah ah pangpar in ttialhmi na ka pek tami angki cu kaa phoih. Cun Furpi a hung chuak.
-----------

Note: "December ka phan tthan cang" timi lenhloi khomhsuat cauk 2010 chuak chung in tthaal a chuak cang tiah van lakmi a si.