Tulio USA Hnintu Hodah A Si? timi capar ka rak ttial. Snowden nih USA rammi siseh, ram dang uktu cozah pawl a thli in NSA nih a ngiat hna a ti thawk khan NSA cu fak tuk in aa hnin cang. Atu hi a tla i a thawng thang ngai. Zeitindah mah tluk a tthawng cozah nih a dirkamh bu in hi tluk mifim lawngte rian ttuannak bu NSA cu aa hninh khawh tiah bia nan hal ahcun hal phu a si.
Asinain thil ttha lo cu aa thup thai kho lo.
Telephone siseh internet in mi ngiat a duh lo i a dotu hna nih fakpi in an do, an hmaitonh i atu hi USA ah cun teinak biapi tuk an hmuh. NSA nih rammi an i chawnhnak telephone chung bia million tampi an lak i an khonmi vialte khi Manhattan i biaceihzung nih cun "phung a si lo" a ti. Aruang cu American Congress nih a theihpimi le a amen mi a si lo caah a si, a ti.
Relchap awk: Democracy a duh mi nih Snowden lawmh awk a si
British tadinca the Guardian le Washington Post i bawm in NSA nih USA phung siseh UN minung covo he i kalh in mi ngiatnak a tuahmi cu an rak phuan. Mah cu kong ah biapi bik a simi cu Edward Snowden timi NSA ah rian a rak ttuan i CIA zong a rak simi pa, atu Russia ah a ummi khi a si.
NSA nih Telephone biaruahnak pawl- honih ho a chawnh, khawika in a chawnh i aho he dah an i chawnh timi kha tlaih tam khawh chung tam tlaih aa zuam, i a fim (saved) dih hna. Cu pinah Email, le a dang internet, Facebook tiang in nangmah nih na hman bantuk tein an rak hman i Privacy timi pumpak sinak vialte chuh a rak simi cu an rak khon dih.
Mah lak ah cun Snowden phuanmi ah biapi a simi cu ram kip i cozah hruaitu hna tiang kha a thli in an rak ngiat, an phone tiang an rak firmi kha a si.
Rand Paul, president aa cuh ding Republican pa nih Manhattan biaceihzung i biaceih bawi Gerard Lynch i cahmai 90 hrawng in NSA nih US phunghram he kalh in thil a tuah mi a chuahmi cu a lungtlinnak a langhter. «Nawl a zultu American pawl an telephone ngaih piak le khon kha NSA a rian a si lo. Tu zing i biaceihzung nih an ceihmi cu ka lung a si,» tiah a chimmi Guardian ah rel khawh a si.
2013 i Snowden nih mah hi kong a phuan hnu in US cozah le President Obama cu an ram chung lawng ah si lo in international ah mithmai chiahnak ngei lo tluk an rak si. A poi bik pakhat cu Germany cozah he an i sukkhak i sau lak mithmai ttha an rak i pek khawh lomi kha a si.
Tuni i Manhattan biaceihzung nih "phung he aa kalh" tiah a ceih mi a dih hlan ah Germany i sungthoh BND nih NSA he internet-communication kan i thleng in kan i theihter ti lai lo, tiah an chim ve. BND le NSA nih hin a thli in Europe cozah an ngiathlai ttinak a um tiah cozah dang nih purhdah a si.
Snowden nih a phuan hnu in president Obama nih a USA hawikom a simi ram dang pawl cungah a rianttuan ning remh ding biakamnak le a tuahmi fianhnak a rak ngeih. Sihmanhsehlaw, Snowden cu American cozah nih dong-lo thonginn ah thlak an duh caah American nih an ttihbik mi Putin sinah a vai dor lio a si.
Ref: NTB/DB
Comments
Post a Comment