May 9. ah Valencia he 2-2 in an rak dih caah La Liga hrai cu Real Madrid nih an thleet ti khawh a si cang. Mah cu a si caah phaisa tampi dih in teinak hmuh aa zuammi club caah Champions League hrai lawng hi khamhtu a si ding a rak si. Nain, Ancelotti nih Champions League voi li a tei ding le Ronaldo nih Suibawlung voi li a lak ding hi a tthawng ngaimi huham khamtu a um ai. Zei si cu ka hngal lo, i zeican a kham khawh hna lai ti zong ka hngal lo.
Ronaldo nih penalty in 1-0 a van hruai hna, inntek an si fawn tikah an tha a tlung, ruahchannak a tam chinchin. Nain amah ruang ah a tthangcho ding mi tampi tthumh a simi Ronaldo nih tutan cu a chanh kho hna lo. - Mah cu lio ah a no tuk rih, Real Madrid ah aa tlak rih lo tiah bawlung bazar ah an rak pho i Arsenal nih caw hna seh ti ka rak duh tukmi MORATA kum 22 cu Juventus nih caan tling an chuihter. Zahan zong kum 4 chung a rak umnak Real Madrid ah a kir tthan, a chuahnak khua zong a si, nain a daw hlei lo, 1-1 in minit 53 ah a cham i home-away in Juventus nih 2-3 in Real Madrid cu a tei. Morata nih a lawm lo khah!
Carlo Ancelotti hi a vanthat tuk lo cun an chuah lai.
La Liga tei lo ding a van fian tuk hnu in Champions League (CPL) a tei zong ah Carlo hi a him lo tiah biathli a rak chuak cang. CPL final hmanh a kai pi ti hna lo caah a vanthat tuk dah ti lo cun boss dang a kawl hau lai timi a fiang chinchin. - Real Madrid cu manager thleng ngaimi an si, i manager pakhat hi saupi aa chiahmi an si lo. An lungtling mi manager an hmuh paoh ahcun Carlo cu a thil tim in a chuak zau te lai.
Carlo Ancelotti hi manager a ttuannak club a tam ngai i Serial hrai a teimi cu pathum lawng a si; Milan 2003/04, Chelsea 2009/10, Paris Saint-Germain 2012/13. Real Madrid manager a si i a rak ttuan balnak club pawl cu: Reggiana, Parma, Juventus, Milan, Chelsea, Paris Saint-Germain hi a si.
Manager tampi caah Champions League tei cu a har tuk. Tahchunnak ah Alex Ferguson nih United cu EPL hrai 16 a lakpi hna nain CPL cu hrai hnih lawng aa thihpi lai. The special One zong Serial hrai cu pariat a lak nain CPL cu pahnih lawng a tei ve rih ko. Cu lio ah min a ngei tuk ve mi Arsene Wenger le City manager Pellegrini nih an tei kho rih lo. - Cu bantuk cun Italy i manager minthang a rak simi hna Serie A hrai 10 teipi i CPL pakhat lawng teitu Giovanni, Marcello hna hrai riat a rak tei, Capello zong hrai sarih a tei nain Champions League cu voi khat pin an tei kho lo.
Asinain Carlo Ancelotti (52) nih Champions League voi thum a tei: Milan 2002/03 le 2006/07. Cun Real Madrid 2013/14. Final 2015 kai ahcun hrai li la kho ding a rak si nain a khuai!
Manager rian tling kum 18 a ttuan chung ah a teimi hrai tuak cun CPL hi ai ziakmi a lo. Cu pinah tutan Juventus hi a tei lo a si ahcun Real Madrid nih an tei khawh ding a um ti lo. Tikah phaisa a ngei tukmi club nih a rian chuah ding le chuah lo ding hi CPL tei le tei lo an zoh lai tiah football expert tampi nih zarh thum ai duh khan, an rak chim chung cang.
- Madrid ah um rih cu ka duh ko, nain zeidah a cang lai ti cu ka hngal ve lo. Club pakhat nih cun manager chuahnak nawl a ngei, i anmah biakhiahnak chung ah ka um. Tutan bawlung kum hi dih phot seh, tiah Carlo nih manager rian kong journalist nih a halmi a leh.Ronaldo le Casillas zong him dawh an si lo
Casillas cu Mourinho nih a rak hmang duh lo. Asinain a tuanbia ruangah nihin tiang a hmun, i atu belte a caah hmun um dawh a si ti lo. Atu tiang David de Gae an caw rih lo nain goalbawh thar an zoh ko. Tutan a bawhmi goal pawl ah thatuk in a khammi a tampi nain zohchia ngaiin a tlolhmi a tam tuk i aa din la maw, club niamdeuh ah dah a bawh lai? A fiang ngaimi tu cu Real ahhin kan hmu ti lai lo.
Ronaldo hi United nih an duh peng rih. Cu pinah Chelsea le Mourinho nih innka an hun piak, an ban an samh i ra ko, an ti. Asinain a man tu cu a tlak ngai a herh lai. Khatlei in USA club nih an leem ve. Hi vialte hi Real Madrid hotu pawl an lungdonghnak ruangah a si kho ko. Kan zuar lai, ti cu fiang phut in an chim lo nain kan zuar lai lo, an ti theng lo. Nai hrawng goal a sut tuk ko nain a cawlcangh le a muihmai hi a huam ti lomi a lo fawn. CPL goal tambik 77 a ngei nain Final ah Messi nih a tei khawh rih. Tu kum cu Suibawlung a nei ti lai lo.
Juventus hi an vantha ti awk ttha lo.
Zahan kha goal-chance tampi an ser kho lo. Khatlei in a si khawh chung in goal thlah lo an i zuam, i Real nih goal thlen hlan cu bawlung an tlaih. Juventus manager nih puai chung ah Formation a thlen i Pirlo a chuah hnu ah 3-5-2 in a chuihpi hna, Real nih an nam tthan hna nain an rak i kham kho.
Pirlo hi Italy aiawh in a chuih ti lai lo nain bawlung cu a daw taktak, i Juventus nih tutan CPL a tei ahcun ka chuah tak lai, a ti. Liverpool nih an baan an samh piak, a duh le duh lo? 2006 World Cup tei lio ah a biapi tukmi pa a rak si. Champions League hi AC Milan a chuih lio ah voi hnih a tei, 2003 le 2007 a si i 2003 hi Juventus he final an rak kai.
Juventus cu Italy ah an tthawn tuk lio a si i hrai thum la kho an si ve fawn. Cucaah Barcelona caah Real Madrid nakin tei an har deuh lai timi hi ka lung nih a hngalh ko.
Chuntha in mangtha ulaw. Nan hawile kua chin Share tuah te hna u.
Foto: Reuters/Nrk/NTB/AP
Comments
Post a Comment