Kum tampi hnu ah Juventus cu Champions League ah an hong dir tthan. Inntek dirhmun in Europe chung ah a pehpeh in puai 12 an sung lo. Asinain tu zan cu mirang nih "Unlucky number" an timi 13nak ah Real Madrid nih va den hna dawh a si.
Nihin cawnnithum ni cu kan i ngaih tuk ciomi Semifinal pakhatnak an chuih a si lai i Torino ah Juventus nih Real Madrid a don lai. An chuih hlan ah tlawmpal theih chung awk van zoh hmanh sih:
Spain khualipi Madrid i club lianbik le leicung ah club lian bik lakah aa telmi Real Madrid hi tu tan Champions League ah alang/"Away" in cun ttih bak an nung:
- Real Madrid nih alang an chuihmi puai 11 ah puai 8 an tei i puai 2 cu an i tluk.
- Minit 444 an alang i an chuihnak ah goal an sut kho hna lo. Group- an chuih lio i Razgrad FC nih an goalmi hna kha a hnubik a si.
- Real Madrid nih Group an chuihmi puai thum ning in tutan bawlung kum ah a tei hna.
Real Madrid ah hmai kum kan hmuh khawh le hmuh khawh lo ding aa fiang rih lomi Carlos Ancelotti nih tulio te cu kan form a ttha tuk tiah nihin puai kong pressconference ah a chim. - Van pial ahcun, Real Madrid nih La Liga pakhatnak a hmuh lo a si ahcun Champions League an tei zong ah Ancelotti hi a rian in an chuah khawh men tiah expert tampi nih an ruahdomh. Aruang cu Real Madrid nih kum tam ngai Spain La Liga a tei ti lonak a si caah a si bik. Atu hi Barcelonak nih tlawmte in an thlau hna i Barca an zumh bik hna.
Biatlang ka tarmi Final 20
Ancelotti nih tu kum zong final cu kan kai ko lai, tiah a zumhnak a chim. January le February kha aa khawngmi kan rak tam i kan rak vuaivuan pah nain kan i fimhlawm kho ko, cun atu cu kan ttha. Kanmah le kanmah kan i zum, a ti.
- A nam in kan nam te hna lai. Hmai nor in kan i celh lai, nain hnukham zong kan i ring ko lai, tiah Real Madrid manager nih a chim.
Juventus le Real Madrid nih Champions League i final an kaimi fonh ah voi 20 a si. 1998 ah Real nih Juventus cu final ah a rak tei.
Semifinal an chuihmi chinchiah:
- Real Madrid hi semifinal 25 a chuih bal i 13 a tei bal.
- Juventus hi semifinal 10 a chuih i 7 a tei bal ve.
A tar ngai cangmi Andrea Pirlo zong pressconference ah aa tel ve i Real Madrid cu nihin i leicung ah a biapibikmi "Football Club" a si tiah a chim. Asinain tutan semifinal ahhin Juventus nih Real Madrid cu caan rem pek aa tim lo ee, tiah a chim chih.
- Avoi khatnak puai hi a biapi tuk, avoi hnihnak cu bonus a si. Fimkhur tein kan chuih a hau te lai, tiah a chimmi BBC ah rel khawh tthan a si.
- Upa puitling lawngte kan si cang. Ttihnak ngei lo in kan i celh. Real Madrid he aa tlukmi kan si tiin kan i celh ko lai, tiah Pirlo nih a chim. Pirlo nih hin tutan ah Juventus nih Champions League pakhatnak a lak ahcun Juventus in kai din cang lai, tiah a chim chih caah Juventus fans caah ngaihchia ngai a si.
Asinain, Europe i a ropuibik Champions League final a chuih tambik cu Real Madrid a si i zei club hmanh nih amah tluk in teinak an hmu lo. Champione Laegue hrai voi 10 an cawi cang.
Juventus cu nai zarh khan Italy Serie A ah pakhatnak an si cang. Champions League semifinal belte hi 2003 hnu in atu lawng an chuih khawh a si. 2003 semifinal ah cun Real Madrid he an rak itong i 4-3 (zapi fonh) in Juventus nih a rak tei. Final cu Milan he an rak chuih. Asinain ni kum hrai a thlirtu Real Madrid nih tutan cu an dinhdorh hna lai zumh a si lo.
A thawk ding 11 ah zumhmi hna:
Juventus: Buffon - Lichtsteiner, Bonucci, Chiellini, Evra - Marchisio, Pirlo, Vidal, Pereyra - Morata, Tevez.
Real Madrid: Casillas - Carvajal, Pepe, Varane, Marcelo - James, Kroos, Ramos, Isco - Bale, Ronaldo.
Ref: VG, Wikipeadia, AP, BBC, TV2, beinsport.tv
Comments
Post a Comment