Nihin Bawlung Biathli: PSG Ah De Maria le Paul Pogba An Kal Kho

Tthal chung bawlung bazar (TransferWindow) an on nakding ah a nai chin lengmang ko. Kan uar le dawi bik ciomi English primier lueague club lian pawl nih Europe ah an lal khawh tthan nakding ah an thazaang i-lawt an i tim cio.

A hnubik bawlung biathli tlawmpal cu mah hi a si: 

Angel Di Maria nih Manchester United cu a sung pek dawh in a um, Paris Saint-Germain nih chanh hnik an i zuam i bia a fiang deng cang. Maria nih hin Real Madrid a rak chuah tak i United ah a rak luh lio tein PSG ah kal a duh kong a rak chim diam cang i mah cu lio ah PSG cu Financial Fair Play-rules ning in mi caw kho an rak si lo i Manchester United ah a rak kal kha a si. Atu cu PSG nih mi a cawk khawh cang i Di Maria caah hmun an remh cuahmah tiah The Mirror nih a ttial i Euro 45 million cu Menchester United bank ah senh ding redi an si.

United kong peh ko sih law, hnubik bawlung biathli ah kan tial cang bang Louis van Gaal nih atu te hin a ralaimi kum pawl ah David de Gea lo in Manchester cu hruai ding timh tuahnak a ngei. Real Madrid ah De Gea a kal sual a si ahcun atu i Tottenham nih zuar an duh mi Hugo Lloris hi Van Gaal nih cawk a timh. The Mirror tthiam nih a chimnak ah Lloris nih Champions League ah chuih a duh tuk cang i Man U goalbawh si ding aa ruahchan. Asinain Goal.com nih a ttialnak ah PSG nih Tottenham innka an kingh ve.


PSG nih an phu minung thlennawn an duh ngai i Juventus alaikal Paul Pogba cawk ding an i tim i Pogba nih a lungtlinnak a langhter caah Manchester, Arsenal le Chelsea fans caah ngaihchiatnak thawngpang a si ko, tiah The Star nih a ttial. Kum 22 lawng a si i Real Madrid zong nih cawk khawh ding an i zuammi pa a si.

Chelsea nih Drogba (37) hi an cawm ti lai maw timi kong ah a ngeitu Roman Abramovich khua a ruat lio, tiah Mirror nih a ttial. Chelsea minthan aa thawk lio tein Drogba cu Chelsea caah biapi tuk a rak si i nihin ah cun Chelsea phu ah upa bik a si cang nain an duh peng rih.

Manchester ah kir tthan usih law, City alaikal Yaya Toure cu Arsenal nih an bawh ngai ko nain a pu hlun Mancini nih Inter ah chuih ding in a lem caah Yaya nih a agent cu Milano ah a thlah tiah bia a chuak.
United nih an i nocawm mi Andreas Pereira cu PSG nih a hlawh let-thum in chap ding in an leem. Brasil miphun a si i Manchester United i a ngeihmi pehtlaihnak (contract) caan hi tthal hin a dih lai i United nih an chap lo a si ahcun Juventus, PSV Eindoven nih an bawh ve ko. Asinain Daily Mail nih a chimnak ah PSG cu a al hna i United nih contract an chap ding a hngak.

Liverpool nih a hnubik Premier League an rak tei hi tihni khan kum 25 a tling, mah hnu EPL an tei ti lo. Mah cu kum 25 a tlinni ah Hull City nih 1-0 in an rak tei fawn hna. Mah caah Liverpool fans cu an lung a dong ngaingai. - Liverpool manager Rodgers hi a rian phuah awk a si rih lo, tiah ka rak tial nain nihin i Daily Mail tialnak ah Dortmund manager in Liverpool ngeitu nih thlen an duh bantuk a lo.

Southamptons nih a minung ttha tampi a zuar cang nain atu i an uar ngaimi Morgan Schneiderlin cu Chelsea, Arsenal le Tottenham nih a minthut an bawh ko. London Evening Standard nih cun Tottenham hi Morgan cotu ding ah aa tlaak bik a ti. Southampton nih £20million lawng in an sian caah phaisa a ngei ding Tottenham cu an zumhdeuh.

Arsene Wenger le Louis van Gaal nih Torino an hnukham Matteo Darmain khi cawk an duh. Italy in hin hnukham ttha an chauk tawn. Amahbelte, Torino nih hin a man van an tawnghter i £11 million nak tamdeuh in an hauh caah hnukham pakhat mah zat leng cawk ding cu a har pah lai, tiah STAR nih a tial. Nain kum 25 lawng a si ve rih.