Hlanlio ah Lai khuate pakhat a rak um. Cu khua cu tlangval dawhdawh, pumrua tthattha le nungak dawhdawh an chuahnak khua a rak si caah Lairam chung ah minthang ngai a rak si. Khua pakhat a si bantuk in mi tlamtling lo, ai dawh lomi le a derthawm ve takmi cu an ram um len ve tthiam.
An khuabawi nih Fanu dawh tuk a ngeih i a min ah Iang Doi a si. A fanu cu a mikip nih an duh i co ding an i ruah cio hna. Cu chan cu Laimi pakhat le pakhat an rak i do/tuk le thah lio a si i Tiphul ral timi an rak hraan lio zong a si. Mikei zong an rak um rih. Cucaah, pasal ttha timi hi rak herh tuk lio a rak si.
Iang Doi a pa cu sakahthiam, paral ttha a si caah khuami nih khuabawi ah an i lakmi a si. Ram uk bawi zong a si. Iang Doi cu khua dang le ram dang zong in a hung hal lengmang cang, pasal ngeih zong a zat ve cang caah a pa cu khua a ruat ngaingai cang. Ka fanu caah mizeidah ttha lai? ti a tuak. A fanu hi duhmi tlangval a ngei rih ve lo.
An khuami le khuabawipa ruahnak petu pawl nih cun, Iang Doi hi ram dang le miphun dang vatnak cun an khua ah tlangval tthattha le pum rua ttha, mi tthawng an tampi ko caah kanmah khuami te hi a vat awk a si ko tiah, ruahnak an pek. Cu ruahnak an pekmi cu lungtlinnak a ngei,.. cu ni thawk cun an khua tlangval nih an len le an hal hi a tam cang.
Iang Doi nih a duhmi an um lo caah, a pa cu a lungre thei.
Voi khat zing cu, a pa nih Iang Doi cu a Lo kal pah in bia a ruah. "Ka fanu, nangmah te lawng fa kan in ngeihmi na si. Na nu le pa hi nangmah caah kan nung. Va ttha te na ton ding kan in duh piak," a ti. "Cucaah, kan khua tlangval lak i a tthawngbik, aa dawhbik le a nun khobik he nan i umh ding kan duh. Tulio cu ral a tam, i thah a tam i nangmah him te in an humzual khotu na vat awk a si," tiah a nu nih a ti ve. Iang Doi nih, "ka nu le pa, kan khua ah ka duhmi an um lo, nain nanmah nih nan lungtlinmi a um ahcun mah cu ka vat ko lai ta," tiah a leh hna...
A pa cu ai lawm. Inn tlun a zat hlan in a tlunpi hna.
A thaizing zarhte ni ah ti hin Iang Doi pa, Khuabawi nih cun khuami sinah thawng a thanh. "Ka khuami hna, keimah hi ngeihchiah le chawva in ka tlamtling lo nain, ka ral tthat ruang ah le, ka tthawn ruang ah Khuabawi ah nan rak ka thim. Khuami nih nan kan dawt caah kan i lawm. Atu hi ral le i thah a tam tuk lio ah ka fanu zong a hung cuza ve cang i ka fanu a humzual khotu, a khamh khotu keimah bantuk paral ttha le a tthawng mi hi ka fanu caah kan duh. Cucaah, kan khua tlangval vialte i puum u law, thaizing ah kan khualai ah hin hung chuak dih uh," a ti hna. Lo a kalmi zong pa paoh cu nan chimh dih hna lai, ti a si.
I ngaih ngai cio in, an khua tlangval vialte cu Lo in a hung tlungna, khual in a hung kirna an si.
Caw-ngia tang ah aa peh
Iang Doi pa nih, an khua tlangval tthattha cu a zoh hna ah a lungsi tuk. Cun ti hin a ti hna, "Khua tlangval hna, nan pumrua zoh cim a si lo. Nan i dawh, nan ral a ttha," tiah a hun fak hna. "A sinain, nan dihlak cun ka fanu hi nan ting lai lo, nan lakah pakhat lawng nih a co lai."
An khua laicir ah Mairun kuttum tia te khi an toh. Iang Doi pa nih a rak hman mi Lili-thal cu an von lak i "Khi mairun khi nan kah lai i a kheng mi pa nih Iang Doi nan co lai," tiah khuabawi ruahnak petu nih cun tlangval rual cu an hun pek hna.
Tlangval nih cun pakhat hnu pakhat in an Thal cun an kah lengmang i minung 46 nih an kah cang. An kheng kho bak lo. Tlangval an dih pah cang.
A ttiattum lo tete an taang cang. Iang Doi pa cu a thin phaang cang. Khuami zong an khuaruah a har cang. Tlangval pali an taang i an kah ve. An kheng ti lo.
"Tlangval nan dih maw? kan khuami pa nan um ti lo maw?" tiah Khuabawi ruahnak petu an hung au. An um ti rua lo, an van ti lio ah,.. an khua i a ttiattum lo bik. Pa tthengtthong te, Lo zong a kal kho lem lomi te khi a hung ra. Pa pei ka si ve cu, a ti hna. "A si ko, kap ve ko," an ti.
An khuami ahohmanh nih a khen lai tiah an ruat lo. Iang Doi cang zong nih kap ko seh, a kheng bal lai lo cu tiah lungdong ngai in a chim. Nain ruahnak petu nih cun a duh lo.
Hi vial hin za rih seh law, voi dang ah kan thim tthan hna lai, tiah an ti. Sihmanhsehlaw, Iang Doi pa nih kap ko seh, pa pei a si cu, a ti ve caah pa ttiattum lo te, Ral Kam cu Thal kha an van pek ve.
Thal cu a van zam. Ai remh,.. "tlawmte kai naih deuh kho lai maw, kei cu ka dam pah lo le," a ti hna. "I naih deuh ko," an ti.
Khuabawi ruahnak petu cu a thinphang tuk cang. A khen lai tiah ruahnak a ngei tuk. A si khawh ahcun kap hlah seh, ti an duh. Asinain pa a si ve caah le khuabawi nih a biakam leet a duh lo caah a kah cang lai.
Ral Kam nih cun, a van i remh a van i remh,... Iang Doi cu a thin phaang ko. Hi tluk dawh lo le dertthawm hi, a hnubik a si cang le a khen khawh men tiah a thin ai domh. Kap ko seh a timi aa chir tuk.
A van i remh a van i remh i thal cu a van zam,.....
Mairun cu a zoh,.. a mit aa chinh i a thal zammi cu a van thlah, Mairun cu a van kah,...
An khuami cu an thaw an ip dih. An thin an i domh pah cun Mairun cu an van zoh.
Ral Kam nih mairun cun a rak khen deng maang tak ko.
Cu ti cun, Iang Doi te chung le khuami cu a thawpi an chuah i lung nuam ngaiin an lawi hna. Ral Kam zong, ka khen deng kha awh, a ti i zanriah zong thawte in a ei i a it ve,.. an ti..
A dong.
Note: 2010 i Lenhloi tawi khomhsuat "December ka phan tthan cang" timi chung in van charmi a si.
Foto: Vapual (cauk caah a rak ka suai piak mi)
Comments
Post a Comment