Bawlung uartu vialte nih i ngaih tukmi Champions League semifinal phu khat cu an dih cang i Bayern Munchen cu home-away in 3-5 in a sungh caah Barcelona cu an thaw chuak phut. Pakhatnak tei le tei lo cu Final kai kha a herh hmasa ko. Tu zan Real Madrid nih Juventus 1-2 sung cia in a don lai i a awngmi paoh Barcelona nih Final ah an tei te hna lai, tiah ka zumh.
Zahan i Bayern nih Barca an don hna i an chuih hlan ah Bayern 2-3 in Barcelona nih a tei tthan te lai tiah ka rak chimchungmi cu 3-2 in inntek Bayern nih an thlen. Nain i hnemhnak sawh a rak si. Cucaah semifinal puai khatnak an chuih laite i a min chim tambikmi Guardiola dirhmun, hnemh can ah van zoh hmanh sih.
Zaangfak te a si. Amah tangah Barcelona cu minthang a hong si tthan, hrai tam tuk a lak. 2012 i manager rian a chuah tak lio zong ah min thatnak he a chuak. Manchester United zong a tawng lo, City zong, a rum tukmi PSG zong nih an la kho lo. Germany club lianbik ah a lut. Bawlung vawlei hi ho a si kha hmuhsak a rak duh.
2013 i Bayern manager kedan a danh thawk in a hruaimi phu cu a lai in khuai lo in a kil bakin a thawk i a kulh. Cun ral zong a kil in nam a duh hna, aruang cu Messi kha kum tampi a rak hmuh cang. Cu bantuk in Bayern a luh ahhin a hna a rak ngam ve; vawleicung ah a thiambik timi kutdong khiak lakah aa telmi Robben le Ribery pei an um cu. A hna a rak ngam. Cu ve bantuk in Robben le Ribery cu thlitu bantuk, fei bantuk in an ral cu a kil in an luhhnawh khawh tuk hna i hlawhtlinnak tampi a rak hmuh.
Tutan bawlung kum zong Robben cu a ttha tuk, Germany ah puai 21 a chuih i goal 17 a sut i goal 7 Assist a ngei. Ribery tu cu a dam lo zong si pah, puai 15 a chuih. Goal 5 a ngei i goal 7 Assist a si ve tthiam. - Mah tluk cun Bayern Munchen ah an biapi.
Bawlung a chuihmi paoh nih ram aiawh in chuih an duh dih ko nain leicung, a hleiin Europe ah a sangbik le sunglawibik ah an ruahmi cu Champions League hi a si. Mah cu tluk in a sangmi zuamnak ah Club pakhat chung i a thiambik timi minung pahnih an bau a si ahcun bau le ttum-chuk tuk a si. Mah nakin a sungmi hi manager caah a um ti lo. Zei si hmanh ah, Bayern nih inntek ttuan in Barcelona 3-2 in a tei mi cu thangtthat tlak ngaingai an si, nain a zapi ah 5-3 in an sung.
Mah cu bantuk a kuarmi hmun cu airawlh khawh awk a har tukmi a si.
Tutan Semifinal i Bayern an sungh ruang ah Guardiola a man a tladeuh lai ka zum lo. Inntek dirhmun in a tei tthiam caah phuhrun awk ngeilo tein vancau buin a lawi kho ko lai, ka zumh. Pa men lo a si.
Tutan Semi cu home-away in zoh an nuam. Messi le Neymar hi Barca ah chuih hna hlah sehlaw, zeimaw cu aa dang kho men. Zei si khom ah Barca cu tulio te ahhin Vawleicung bawlung phu ah a tthabik an si rih ko, i zeibantuk phu he hmanh itong hna sehlaw anmah hi zumh an si deuh rih ko lai.
Barcelona nih a teimi cu a phumi le a si awk a si ko.
Bayern kha Germany ah champions an si hnu in an der pah. Nai zarh an sung kha mu. Asinain Barca cu zahan tiang puai 43 an chuihmi ah puai thum lawng an sung i puai sarih lawng hi goal an thlah. Cuaithlai ah Bayern a tei tuk.
Zahan cu Guardiola nih Messi kham ding lawngte a ruah ve. Hnukham kha a thlawnnawn pah hna. 4-4-2 in a thawkpi hna i kehlei a kal tawnmi Lahm cu orhlei ah, cun caan sau aa khawng mi Thiago a chuihter i kehlei ah a umter . Mah hi Quarter i 6-1 in Porto an rak teining a si. Bawlung kha hnu ah khirhter a duh lo, hmai ah a nam chih. Cucaah a langhlat in Lewandowski le Muller kha bawlung kuat an i zuam peng. Goal cu an sut ve ko, goal thum in an tei tak ko. Asinain a rak za lo.
Guardiola nih an ral sining a theih tuk ko; Messi hi a karlak in aa tenh lengmang lai, i a hnu in Suarez nih lam a ser lai, i kehlei in Neymar a tli lengmang lai timi cu zeihmanh san a tlai lo, amah caah. Aruang cu South America i a thiambik ram thum in hmaikal thabik "unau"pathum hi hohmanh nih an kham khawh hna lo caah a si. - Suarez nih duhfak lo in a nau Neymar cu a kheng ah sa a chiah piak lengmang.
Philh lo ding cu 2013 ah khan Bayern nih Barca cu 7-0 in Semifinal ah an rak tei ve hna i cu lio an manager cu Jupp Heynckes a si. Ribery le Robben kha honihdah an rak kham khawh ve hna? Tutan cu a si khawh ti lo buin an i zuam. Suarez aa hliam hnu in Muller le Lewandowski nih 3-2 in puai an dihpi hna.
Tu zan Real Madrid le Juventus nih Barcelona tonnak nawl an hal lai. Hi hna unau an dam i ttha tein an chuih khawh a si ahcun Barcelona nih hrai a cawi te ttheo lai.
Foto: AFP/cuatro.com
Zeitindah na ruah ve?
A tang comment tialnak ah ttial khawh a si. Na hawile zong kua chin ve hna, na rel i a ttha na ti ahcun.
Comments
Post a Comment