Guardiola Hi Manager Thiambik A Si Tak Maw?

Champions League Semifinal ah Bayern le Barcelona an iton ding a fian in cun Bayern Munchen manager Guardiola caah cun a poi ngaimi a rak si lai. Zeica tiah kum tam ngai a rak hruaimi club le a siangngakchia he iton ding cu bawlung tuanbia ah a thiamnak taktak, a sinak taktak a langh khawhnak a si caah a si. Cucaah amah Guardiola kong hi tutan Semi ah a linsa khun.

"Messi, Iniesta le Xavi an umnak Barcelona FC cu manager sinak a tling mi ahopaoh nih teinak an hmuhpi ko lai," tiah 2009-2013 hrawng ah khan an rak chim pah lengmang. Barcelona a par liote a rak si i Champions League, Spain La Liga le a dang an chuihmi ah teinak hrai tampi Pep Guardiola nih a rak lakpi hna. Football club, asiloah bawlung phu pakhat ahhin a chuihtu a thiam hi maw a rak biapi cawnpiaktu le hruaitu hi dah ti ahcun a pahnih in a tina le a chuihtu thiam lo cun manager thiam zeihmanh santlai lo, a titu an um ko lai (kan hnu zong ah Liverpool kong ah a chuihtu mawh deuh in a chimmi kan tam pah). 

Pep Guardiola nih Barcelona a chuah tak i min lian Bayern Munchen a hon tlaih tikah "Messi, Iniesta le Xavi" a si lomi nain minthang a simi player tampi a hruai ve tthiam hna. Mah cun zeidah a cang? Bayern Munchen a hruai hnu zong ah Real Madrid cu cei ko in a rak tei hna. Barcelona Fc in Real voi tam a rak tei lawng si lo in Bayern a rak tei khawh. Cucaah tutan zong Barcelona nakin Real he ton a rak duh deuh ving lai tiah ka ruah. 

Barcelona Fc a chuah tak hnu in atu hi Barcelona he ralchan in an iton avoi khatnak a si lai. Messi, Iniesta, Xavi an dam rih pinah Neymar le Suarez nih baltin khat in goal an i senh lengmang khawh caah tu zan cu Guardiola hi hodah a si taktak timi a lang kho lai. A ttha tukmi club, Bayern a hruai ve ko caah Tactics in zeidah a lawh taktak timi a lang lai. 

- Guardiola hi tulio manager lakah a thiambik a si ko, tiah atu Barcelona manager nih nihin press conference ah a chim.

Tu zan ah Bayern Munchen nih Barcelona a tei a si ahcun an chim bang Guardiola cu manager thiambik a si ti khawh a si ko lai dah. Zeicah tiah Messi, Iniesta le Xavi (Neymar le Suarez) a ngeih ti ttung hna lo, a Tactics pei si ko lai hi, ti a si cang lai. Asinain, Messi le Suarez hi Bayern nih an kham khawh hna lai ka zum lo. 

- Pep nih Barcelona kan chuihning lawng si loin kan minung a kan theih tuk. Asinain, chuih a duh daan le a ruahnak hi saupi a tang ah kan rak um cang caah kan theih tuk ve ko, tiah Messi nih a chim. Cucaah Bayern nih an i ruahchan awk a um hlei lem lo tinak a si. 

- Khua ka ruahning cu nan theih tak ko lai, nain Bayern a chuihtu pawl nih zeitindah an ruah timi cu nan thei ve hlei lo, tiah Guardiola nih a chim ve. 

- Asinain, Messi cu zeiti hmanh in kan kham kho lai lo tiah tunai ah a chim chap. 

Robben a chuih lai lo.

Bayern Munchen i bochan ngaimi Arjen Robben le Ribery cu an i hlem caah an chuih kho lai lo. 

Barcelona cu aa hliammi ah Jeremy lawng a si i a dang hochanmi paoh redi an si. 

Barcelona nih a don lai caah Barcelona caah ruahchannak lam tamdeuh a um. Nain Guardiola pi Camp Nou i van kir i Barcelona he Semifinal van kai ko cu Bawlung a uarmi paoh nih pello tein zoh awk a si ka ti. 

Zeidah nan zumh deuh? Cun Pep Guardiola hi Manager thiambik cu a si na ti ve maw?

Bayern ai khawngmi an tam caah le Barcelona an mak tuk caah 3-1 in Barcelona nih a tlunter te hna lai tiah ka zumh. 

Note: Chuncaw ei pah hnawh sare in ka van tial duakmi si.