Football Club Cawk Na Duh Ve Maw?

A Hmasabik ah Chelsea nih English Primeir League a teimi cu Laimi Chelsea fan-pawl kan lawmhpi hna. Cun ka rak ruahdomhmi ka hman caah kai lawm fawn. Cucaah Chelsea FC timi vawleicung a hon thannak tuanbia tawi, a luancia kum 4 hrawng ah ka rak tialmi kan hrawmh tthan hna.

Cu hlan ah naite kha Arsenal FC cu Africa i a rumbik timi pa nih cawk a duh kong Mirror nih a ttial. Asinain atu tiang cu a caw rih lo. Cu bantuk cun a luancia kum nga hrawng ah Laimi nih Chin United timi Club Kawlram ah kan von ngeih tikah "Football Club Cawk Na Duh Maw?" timi tlangtar in ka rak tialmi a si. Duhsah tein van rel law, tialnak a hlan pah cang, ka remh ti lomi a si caah a rel har pah kho men:

Football Club Cawk Na Duh Maw?

Miraangpa, Ken Bates timi cu 1982 ah khan football club cawk ding in a lung a rak i khiak. Club kip cu a rak ngiat hna i major European championship zong a la balmi, teinak tuanbia chan saupi ai chormi minthang, a tthing ngaimi London club pakhat cu man dengte in a rak hmuh. Ken Bates nih mah cu club cu £1 in a rak cawk. Cu club min cu Chelsea a si.

Football club lian pakhat £1 lawng in cawk cu, zeitindah a rak si khawh? Mah cu a dang club hna nih an rak ton ciomi he ai khat ko. A lianmi club na thok i chanthar thilri ai tlak in stadium thar na von sak. Mah cu a man a fak taktak. Cu man pek khawhnak ding ah bawlungchuihtu na ngeihmi cheukhat thiammi chung in zuar an hau. Cu tikah a phi chuak nih na khuaruah an har tar khawh. A niamdeuhnak ah na hung ttum ta. Ttanhtu mipi an hung tlawmdeuh. Phaisa lutchuak a tluang ti lo. Asinain sak liomi cu lim a hau. A ttumchukmi thil pakhat zuamcawh nak ruang ah a tla kho thaimi a si fawn. Cu tikah mi pakhat khat kha a ra i na club cawk a duh, leiba zong kan cham hrim ko lai tiah aamah a khaan ko a si ah cun, £1 a pek ding a si ko zong ah, Eh! ti ko. A phu ko.

Ken Bates cu 1982 in 2003 tiang Chelsea chairman a rak si. Amah hruainak thawng in, a tla tuk cangmi club cu a hung tthangcho i Premier ah a hung kai cang. Cun, 1997 le 2000 ah FA cup a teipi hna, i 1998 ah European Cup a lakpi rih hna. Zeisihmanh ah, cu vialte cu phaisa man a si. 2003 tiang ah a leiba hi £80 million a phan. Cu tikah, zuar caan a rak phan tthan.

Bates cu micheu nih an rak dawt, a cheu nih an rak huat, i colourful chairman tiah an rak ti. Zeitikhmanh ah a pawngkam um cu a nuam peng, an ti. Asinain, amah chaangtu pa hi khuaruahhar deuh ngai cu a si. 2003 ah Bates nih Chelsea cu Ruissa pa sinah a rak zuar. Roman Abramovich, ti a si i £60 million in Chelsea cu a rak cawk.

Roman Abramovich cu hodah a si? Mahpa cu Russia mirum  taktak pakhat a si. A tak ti ko lo cu, amah nakin phaisa ngeideuh mi vawleicung minung hi zanriah ei sawm hna law, na milengkhaan ah an i tlum ko lai. Nain, Abramovich cu a si a rak faak tuk. Siberia chaklei ah a rak tthang, i kum 4 a si hlan in a nu le pa nih an rak thih taakmi a si. A hnu ah cun Moscow ah a rak i tthial i plastics compei fa tete cu khua chung ah a rak zuar i mah ticun phaisa kawl hram a rak thawk.

Har taktak in a rak i thawk. Hipa chawlehthal ning hi kha lio Russia communist a puur chawng chawkawlnak zeitluk indah ttih a nun timi tahchunhnak ah an hman ttheo. Fimnak thate in ai cawn hnu ah zinan company kip ah Share tampi a cawk. Cu ti cun phaisa hlum a hung tawngtham. 1995 ah Russia mirumbik a rak si cang. Cu le cangka, politics ah a hung lut i 92% vote in a tei caah Siberia region of Chukokta ah governor a hung si. Governor a ttuan nak ah ai zuam tukmi a si. Journalists nih a um kalnak kip le a tuahmi tete an zulhdawi hnu lawng ah an bia halmi hi a leh tawn hna. Project tampi ah phaisa a hlut. Cu hnu ah zei rian saangdah a rak duhmi a si?

Russia ram caah rian tampi a ttuan hnu ah Sport hrang ah caan a hung nei, club cawknak caan ti ko sih. Russia a si bantuk in ice-hockey team kha cawk le hruai a rak herh, an ram ah a biapimi sport phun khat a si. Asinain, rau lo te ah football leiah a lung a rak um. A phaisa cu Spain club lian pakhat sinah hman ding a rak i tim, nain chairman nih a controll dih khawh dingmi club kha a rak duh (Real madrid le Barcelona boards cu fans/ttanhtu mipi nih vote an pek ning in rak kalpi a si.) Mah cu Abramovich nih a duh hrim lo. Amah nih controll dih a duh. Bianaah, a duh caan paoh i manager chuah le thlen khawh a duh. Cucaah, England, cuka phaisa a tamnak  ah a rak kawl.

Premier League i phaisa an hmuh ning hi Italy, France le Germany te hna he tahchunh cun a tamdeuh tuk. Vawleicung football club rumbik 20 chung ah England club 6 an i tel (tu kum cu 8 bak top 20 chung ah an i tel - "updated"). Khawika ahdah hi club hna nih phaisa an lak cawk hnga? A ngeitu an rum caah maw si hnga? Football club an phaisa hmuhnak biapi pathum a um; ticket zuarman, sponsorship le an thilri, le a pathumnak cu nanmah, kanmah cio nih Premier League kan zohnak television le a dangdang media pawl an si. Club lian le a tthawngdeuh paoh nih ticket tamdeuh an manh pinah an sponsorship a ttha i an thilri (angi, kedan tbk. an fans nih an uarmi a tam.) an manh khun. Ramkip minung nih an rak uar ve hna tikah TV in zoh a si i phaisa tampi a lut ve. An ni hlawh zong a ttha, a bikin bawlung- chuihthiam nihlawh a ttha,(bianaah, Chelsea captain John Terry cu zarh khat a nihlawh £60,000 a rak si, tu cu a kaideuh cang.). Cu tikah transfer fees a tam ve tawn.

Khatlei kam in club dangdang an tlaak tawnnak a ruang cu sponsor tthate an ngeih lo ruangah le an sponsor pawl an tlaak ve tawn ruangah a si pinah a zohtu an hungtlawm tawn caah a si. Ken Bates nih Chelsea a kal takhnu in, hlan ah minthang ngai a rak si ve mi Leeds United a cawk i amah nih a von hruai tikah a hun tthanchoter te lai tiah an rak ruah. Asinain, club fadeuh pawl hi financial lei ah an rak chambau tuk  hna. Cun, bawlungchuihpawl an nihlawh kha hlannak in a hung niam ve cang. Leeds cu premier league in a tlau beh cang hi teh.

Club fa tete an phaisa kha club liandeuh pawl nih an dawp hna.

Asinain, Abramovich bantuk caah kha bantuk tete kha buaitlaak a rak si lo. A duhmi minung paoh a thim hna pin ah pa tlangtlang a thim hna. A dang club he i dan a duh. Governor a ttuannak khua Chukokta ah Chelsea pahnih i kalpi hna seh law, mipi nih khawika vawlei dang (planet) in dah an rat hnga ti awk tlaak an si hnga.

Chelsea ai ngeih le cangka in zeidah a rak tuah? A rannak in a leiba a cham colh. A hnu kum 2 chungah £200 million cu mithar cawknak le manager thar cawknak ah a hman. Mi a thlen dih hna i a tamdeuh cu England a leng ramkip minung an si. A manager thar zong Portugal a si.

A rak tthahnem tuk. Hmakhat te ah Chelsea nih, cung i a lor tukmi England Club minthang Arsenal le Manchester United an von zuamcawh hna i 2004-2005 season ah an rak thlaak hna, i premier an rak tei. Chelsea cu Champions` League zong semi-final an rak kai i Liverpool nih an rak tei hna J. Abramovich team cu mi lungthin an laa kho i a caancaan ah cun bawlung hmuh khawh a si tawn lo.

Cun, min thar a ngei; Chelski J       
2009-2010 Primer League champion zong Chelsea a si tthan.        
Nihin football cu Phaisa ngeih paoh ah an tthangcho.

Minthang bawlung chuihthiam Steven Gerrad le Torres an chuihnak Club, Primer League champion voi tambik a si pinah Champion`s League minthang a simi Liverpool club zong 2007 in tlak hram a hun i thawk. Hi zong hi cunglei club pawl bantuk in phaisa chambau ruang ah an duhning in mithiam an caw kho ti hna i an tlaak hi a si. Liverpool ngeitu American mirum pahnih nih Liverpool an dawt tak a si ahcun Liverpool hi an zuar a herh caah atu hi a caw kho paoh nih cawk ding in an pawn lio a si rih. Liverpool cu a man fah tuk caah Arab/muslim pawl dah ti lo, hodah caw kho hnga? Atu hi Arab mirumpa kut phak ding 70% ai fiang cang (nain an caw kho thai lo).

Club pakhat cu zeisikhom ah kan cawk khawh ve ko lai, nain kan caw lem hnga lo.#

Note: Chelsea hi atu a ngeitu nih a cawk hnu in biatak tuk in a hong thang i a fawinak in kum 50 hrawng hnu ah Premier League tei a rak thawkpi tthan hna i atu ahcun England ah a thangcho cuahmahmi club a si.

Cc: wikipedia, the sun le a dang tadinca rak relmi. Foto: press/wordpress