Voi khat cu hawi he facebook i zapi biaruahnak ah thil pakhat kong kan ceih hna i mi pakhat nih min-deu in aa tuah riangmag le a diriam tein a rak ruah taktak mi pawl kha a chim hna. A min taktak in cun zaran nih kan ruahmi ah a rak i hrawm. Voi khat tthiam ah Laimi ramkhel rian ah siseh miphun kong ah bochanmi pakhat cu a cattialmi le biachimmi kha cattialtu pakhat nih "tideuh hin, tideuh khan,... a palh kho men", tibantuk in comment a rak tuah tikah cu bochanmi pa i a khuami le anmah leimi pawl nih an aukaan, an i ttanh ve. Mi pakhat cu minung min zong si lo in ID aa tuah i comment tuahtu pa cu biafak ngai in a rak ti, cu hnu ah saupi cu ID cun ca a ttial ti lo.
Norway cu leicung ah democracy hmang sau pawl ah aa tel vemi a si. Nain, naite ah nutung pakhat nih ramdang mi duhlonak langhternak a tuah lio ah a mit lawng lang ding in a sam le hmai a rak i khuh dih. Cu bantuk in democracy aa fiangmi, a duhmi tampi lila nih anmah aiawh ah mino asilole mipi kha an duhnak chimtu ah an hman tawn hna. Ram le miphun pakhat zong a hnulei in chaak a rengtu an um tawn. Cu bantuk ramkhel party siloah hruaitu pawl nih mipi sinah chuak lo in chaak an rengh khawhmi kha hmai an nawrter tawn hna. Kawlram chinchin ahcun ralkap cozah nih mipi an hman khawhmi hna kha an awnhter hna, timi a fiang.
An zate in chim duh tukmi le tuah duhmi cu an ngei cio ti a fiang. Sihmansehlaw, cu an chim ruang i zatlangnun ah a chuak ding a man kha cohlan an duh lo. Myanmar anynous nih Cozah asiloah Ralkap theng maw aho an si thei kho lo in do an i zuam. CNF/CNA upa pawl siloah ramkhel rian ttuan ning rem lonak kha chim rel a duh nain a min langhter a duh lo. Cu bantuk in an khuami asiloah a uarmi pa aukaan a duh tuk nain a min tak a ttial ngam lomi a um ve. A donghnak ah Norway hi a duhning in a um khawh tak lo ding a ruah ah ramdangmi a huatnak a langhter nain a mui aa langh duh lomi nu a um ve ko. Mah hna i an duhnak tak cu, an ruahmi le duhnak kha mi nih kan chim piak hna seh, ti khi a si bik ko. Aruang cu kha ti an chim tikah a ngaitu le theitu sinin lehrulhnak le siarem lonak kha hmaitonh an duh lo caah a si.
Myanmar anonymous nih an phan khawhmi cu cozah nih an kan tlaih lai ti a si kho. Chinmi le CNF nih an ka huat lai, Chinmi lakah ka tlumtla ti sual lai lo ti a phan caah CNF kha mi ID hmang in a rak ti hna zong a si kho ve. Chin ah pakhat kan si ti a lar tuk lio le lungrual kan herh tuk lio ah mah khua le peng ttanhpa, an ka ti sual lai tiah mifim pakhat nih ID-deu in an khuapa asiloah an tlaang pa kha a ttanh i si ko lai. A hleiin miphun kong i thleidannak siseh duhlonak langhter tikah cun an himnak vengtu ngeih an herh caah mipeem duhlonak a langhtu nu nih a hmai aa hmuhmi cu theithiampiak zong a si deuh kho men, mah le mah i ven lo ah honihdah an kan ven hnga?
Internet chung ah cun mindeu in cakuat, chawnh a tam ngai i telephone zong in mindeu in mi chawnh a hmangmi an tam ko. Laimi nih kan tuahmi e-group /forums zong ah mindeu a hmangmi a min tak ttial lo in ruahnak le hmuhning chim a hmangmi an tam ko. Sihmansehlaw, Europe le nitlak ram pawl nih cun news-website pawl ah careltu nih comment ttial a duh ahcun a min taktak a ttial ding an duh cang, i a si khawh chung in moderate an tuah hna. An chimmi zong zeidah a si timi a si khawh chung in an ngiat.
Thil pakhat kong i ruahning le hmuhning ngeih le chim timi hi man a ngei. Ralkap uknak, siangpahrang uknak a si ah maw, silole atu i ttihnungmi IS pawl lak zong ah ruahnak le hmuhning na chimmi ruang ah thah khawh na si bantuk in democracy ram zong ah na chimmi hi man a ngei ve. Asinain democracy nih cun zalong tein chimrel khawhnak a onh, i cu chimrel tikah a hnuzul buainak siloah tthatnak kha ttuanvo a lak ve awk a si caah mindeu tibantuk hman cu a niam tuk ah ruah a si. Thil pakhat kong kha zeiti na va ruah zong ah mi dang nih an ruahning cu a dangpi a rak si ve ko. Na ruah le pomning in an ruah lai lo phan ah mindeu in siloah mi dang hmang in chim na duh a si ahcun, cu bantuk minung cu an tampi i cu hnapawl cu kawl in mindeu in i chawn ko hna u. Hawi tampi nan ngei ko. ØØ
Note: Chin Degest caah rak ttialmi a si.
Comments
Post a Comment