Tuni cu ka umnak Tromsø nikhua a ttha tuk. Tlang cung ah horha, a tang ah rili le khuapi dawh ngai cungah van a thian ning cu zanlei 7:00 tiang ah a sang tuk rihmi nika pawng ah thlapa cheu aa benh ve. Camera ka ngei ti lo i na mitthlam tu in hmuh van i zuam te. Hawi he rili kam ah kan um hnu ah tlang hrawng in a hon hraangmi thli a kik ngai i ka lawi tak hna.
Cun mah hi ca hi ka von ttial.
Mah hi ca nih aa tinhmi cu careltu caah information- pakhat a si khawh ding khi a si. Zeidang nan i cawn khawh le nan hngalh duhmi a si lai tinak a si lo. Mi tampi nih internet chung Google te kan kau hna ah khin zeidah ka lak lai, zeidah kai cawn lai timi kan ruat cio. Cu tikah internet na van kau i minit tlawmpal chung ah na hmuh khawhmi cu Website le Blogger rel cawk lo deng kha a si.
Tu hrawng hi Laimi blog a ser i blogger phun a hong cangmi kan tam ngai cang. Cucaah Blog cu zeidah a si, timi a haltu an um pah. Mi tampi nih anmah pomning le duhning in a suallm an chim tawn. Cucaah tutan ah hin tlawmpal in zoh tti hna usih, Blog le Website an i dannak zeidah a si?
A hrampi an i dannak a simi cu DATA an chuahterning, an serning khi a si. Mah cu dah ti lo Blog le Website hi aa ruang in an kal tti kho ko, an idannak buai tuk awk a si lo. Asinain, fiangte in kan hngalh a herh ve mi pakhat cu Website le Blog ah zeibantuk kong le thil dah kan tar, kan ttial, kan pho, kan chuah timi hi a si.
Zeidah Blog cu a si?
Blog pakhat cu Web-log an ti i cabia (thil na blog duhmi) pawl kha caan le a ni zulh in pakhat hnu pakhat i chang in chiahnak a si. A hnubik na chiah/taarmi kong kha a cungbik ah a um lai i mah hlan na tuahmi nih a zulh lai. Blog cu FREE in fawite in thawk khawh a si i a laarmi Blog hna cu Blogger le Wordpress hna hi an si. - Blog cu nitin na ttial thar/chap lengmang ah cun theih le zulh dawi na tong deuh lai. Sihmanhsehlaw, rumra a ngeimi, sining dik le ttha a ngeimi pakhat si kha i zuam cu a hau.
Blog a si ti theih khawhmi sinak cheukhat:
- A caan/ni (Chronological) ning tein blog ah a lang.
- Careltu hna nih comment ttial in thil kong i ceih khawhnak a on i mi a sawmmi System a si.
- Blog ah taar tharmi paoh Date, Categories, author le Tags a um.
- RSS (Really Simple Syndication) feeds pawl an um.
Blogger pakhat nih thil phun tamtuk a ttial le a chiah ahcun len a har ngai ttheo. Dirhmun a ngeih a hau, an ti. Cucaah na Blog hi zei kong dah ttial na rak duh i na rak thawk, timi biahalnak a biapi ngai ttheo. Cheukhat nih Cancer an ngeih caah cu kong cu an nunchung caah an ttial, i cheukhat nih politics, cheukhat nih an dirpimi zumhnak tibantuk in a kal. Zeidang tampi an baan ti lo.
Laimi blogger ah zoh khawhmi cu Hlawntiniang, Dingdi Mang tbk. hi an si i topic tamtuk an ttial lo, anmah kong, an tonmi tbk. an ttial.
Relchap: Free Blog Thabik
Zeidah Website cu si?
Website pakhat cu HTML/CSS asiloah Javascript maw PHP timi in an ser. Blog phun in hman khawh zong a si ko nain Website pawl cu cattial/ thil taarnak sawh lawng si lo in zeidang dang kawl khawhnak ah hman khawh an si. Website ttha ngai ser ding ah caan tampi a herh kho, phaisa zeimawzah a dih kho. Asinain tu chan ahcun phaisa pek khawh ahcun fawideuh te in Website ngeih khawh a si cang.
Blog cu website pakhat chungtel a si kho, nain Website cu Blog chung a pu lawng a si kho. Website pakhat cu billion pakhat zong nih hman khawh ding in ser khawh a si, tahchunnak ah FACEBOOK.
Website sining cheukhat:
- Blog cu website a tteng nge a si kho, nain tampi aa tuah kho.
- Mileng caah an ngeihmi an tuah khawhmi kha an taar/chiah
- Fawite in pehtlaih khawhnak (contact form)
- Design tha tein sermi rian phun khat a si.
- Website chung i a ummi vialte kha langhter khawh aa zuam.
Aa tthathnemmi nan um si le, lawmh awk si. I theih awk info. deuh ah ttialmi a si kan ti cang bantuk in a thei lomi caah a si fawn.
Cc: 2planawesbite.com, Wikipedia, Wikihow
Comments
Post a Comment