Zahan i Chelsea le Manchester United an chuih hlan ah Mourinho nih a chimmi cu: Chelsea nakin Manchester United a let in a hruai an fawideuh. Chelsea kan chuih ning hi zoh a dawh lo (boring) tuk, ti a si. - A chim ve bantuk in zoh dawh kha biapi a si rua lo, teinak hmuh hi zuamnak ah biapi a rak si rua, teinak hmuh khawh ding lam tu an rak kawl.
Kum khat a luan ciami ah khan 2005 le 2006 i Chelsea nih Premier League an rak tei lio ah Mourinho tang i rian ttuanmi Ass. coach Steve Clarke cu Chelsea an hlawhtlinnak biathli kan chim tuah tiah an rak hal i tihin a rak leh hna: Chelsea nih zoh dawhte in an i celh khawh tuk ko, nain a herh cang an ti ahcun a si ning paoh in an nor (chuih) kho fawn. "Cun, annih cu tei khawhnak lam an kawl kho peng," tiah Clarke nih a chimmi kha Chelsea nih Man U an teimi hna puai a dih khawh in TV-chung biachimtu nih a hon nolh tthan.
Relchap: Premier League Ah Zoh Awk Mi Thar 5
Bawlung chuihnak ah le phu pakhat ahhin a biapi taktak mi cu "lungput" hi a si tiah nai hrawng Sport journal ah rel khawh ngai a si. Tahchunnak ah Liverpool cu a luancia kum 8 i an rak ngeihmi lungput kha an ngei kho ti lo tiah Liverpool a rak chuih tthing pawl nih an chim, an lung a der. Cu bantuk cun Man City cu lungthawhnak le tei duhnak lungthin kha an tthanter khawh lo caah atu bantuk in an tlaak hi a si, an ti. - Asinain hika i chim duhmi cu Jose Mourinho dirhmun hi a si. Chim a har nain, a luancia thla thum chung i Chelsea nih EPL i teinak an hmuhmi zoh tikah a fiang kho ngai, a biapi mi le club lian pawl sinah 3.points an lak khawh pengmi khi an lungput a tthawnnak a si ko rua.
Tahchunnak ah Chelsea nih QPR cu (1-0), Stoke (2-1) le Hull (3-2) a teimi kan zoh a si cun a caan dih lai minit tlawmte aa duh ah Chelsea nih teinak goal- an sutmi lawngte a si kha hmuh khawh a si. Goal tampi pi in mi an tei lo nain teitu sinak lam kha an kawl kho peng, an i zuam peng.
Zahan zong 1-0 in Manchester United an tei ko hna.
Goal thlen hlan cu kap hnih ning in an chuihmi a ttha tuk lem lo, nain Man U nih bawlung tamdeuh an rak tin. A biapi deuhmi cu inntek Chelsea nih goal an ngeihmi kha a si.
Mah zawn ah Mourinho le Van Gaal dirhmun a rak lang ngai. Mourinho nih cun hmaikal nakin hnukham kha biapideuh in a chiah i khatlei pawl an i palhnak pakhat hnih te kha a bawh. Van Gaal nih cun hmaikal (attacking) i nam chih hi a biapibik ah a chiah zualzal. Champions League 2010 Final kha nan rak zoh cio ko lai, Mourinho hruaimi Inter le Van Gaal hruaimi Bayern an rak chuih i Bayern nih bawlung an tin peng ko nain a hnu ahcun Inter nih 2-0 in an rak tei diam ko.
Minit 37 an chuih ah duhsah tein bawlung aa chan i hmai a nor cuahmahmi Man U hmaikal Falcao nih tual lai ah bawlung a thlau: Chelsea laikal Fabregas nih rang ngaiin a hei chuih i bawlung thai a thiam ngaimi Oscar sinah a phan, EPL player of the year a hmu khomi Eden Hazard nih nuam tein goal ah a senh.
Chelsea ah caah an chuih cuahmah mi puai uktu si kha a biapi lo: 1-0 in teitu si kha a rak biapideuh.
Premier League 2014/15 an thawkka ah zei club dah pakhatnak a la te lai timi chimchungnak ka rak ttial i Chelsea hi ka rak zumh bik. Atu hi teitu sinak he an i hlat ti lo.
Manchester United cu a luancia thla thum chung ah zeitluk indah an tthancho timi hi a biapi. Stamford bridge ah teitu an si kho lo nain an chuih chung vialte uktu dirhmun ah an rak dir khawh caah Van Gaal rianttuannak a si ko. - Sihmanhsehlaw, United cu thaizing an si i Chelsea cu nihin an si: chim duhmi cu Chelsea nih tutan EPL teinak ding aa fiang ngaingai cang i United cu hmai kum lawng an zoh.
Cc: Sky/Canal Digital/Wikipedia/DB
Comments
Post a Comment