Sergei Lavrov, Russian Foreign Minister nih "Islamic State phu hi Russia i kan ral lianbik a si," tiah a chim. Nihin i Ukraine ruangah USA he an i pehtlaihnak a khalmi kong kha zeihmanh lo bantuk in a chiah.
USA nih zahan naite ah Ukraine cozah cu phaisa tampi an bank ah a rawn piak hna. Cu pinah Russia ramri ah a ummi ram cheukhat ah raltuknak tanks le ralkap tampi a chiah i raltuknak vanlawng zong Russia ram ri ah a zuanter, training an tuah nak. Mah cu lawng a si lo, NATO chungtel ram a simi ram cheukhat zong nih hriam rit tampi le an ralkap an kuat ve. Mah vialte cu aa theihter lo bantuk in Russia nih bia a chim.
"Ka zumhmi cu IS hi tulio i kan ral lianbik a si ko," tiah Lavrov nih Russian Radio Stations i intervio ah Tuluk, IS asiloah NATO ahhin zei deuh dah tulio Russia caah ttih a nung bik an si ti biahalnak cu a rak leh hna.
A taktak tiah cun nihin tiang ah Russia nih IS hmang in buainak asiloah harnak a tonmi chim tlak a um rih lo (mi lang in Russian thahmi siseh, tlaihmi siseh, Russia tlirhkhonhnak tbk.) nain Russia caah ral lianbik an si a ti. USA, China le NATO nih ral an tho taktak bal lai lo, ral hi kan duhmi a si ti lo ti hi aa fiang tuk ko (rua).
Lavrov bia pakhat cu "Russia miphun a zaza, European a zaza, American a zaza nih CIS (hlan Soviet) ram pawl nih IS an doh cuahmah," timi hi a si. Russia nih hin ni kum te khan IS cu international in buainak a chuahter kho mi phu an si i hrawh an hau timi kha an rak chim cang i cu kong cu Laiholh in cauk zong ah rel khawh a si te lai.
"United States he pehtlaihnak kan ruah a si ahcun mah kong cu ram (state) pakhat kong a si i atu IS kong hi cu Vawleipi himdaihnak/buapimi a si caah kan chawnhbiaknak in kan daihter le lam thar kan kawl a herh," tiah Lavrov nih a chim i IS hi hrawh khawh dawh in a hmu lo tinak a si hnga, IS he i chawnh biak i daihnak ser (a si kho lo ngaimi) le lam dang kawl piak hna a lung ah um seh law a dawh.
Nitlak ram pawl, a hleiin USA he an i hawikomhnak cu Cold-war a dai hnik cangmi van lum cuahmah lio ah a cang i Ukraine kong ah pehtlaihnak le chawleh an i phit. Russia nih cun a tuar ngaingai cang, nain caan sau a rauh a si ahcun Europe, cun USA zong nih a tuar ve te ko lai: Zei ram hmanh anmah lawng in an dir kho ti lo.
Russia nih cun NATO ram pawl a simi ram innpa kha a tlirh khonh hna, an ram ri ah raltuk a cawnter hna chel, vanlawng a zuanter chel in a um i NATO chungtel a si lomi Sweden zong a ngiat a thli in a ngiat lengmang.
Tulio cu Norway holh bak in Russia nih thawngpang website a ser i an ram ah heh tiin Norway holh cun thawngpang a chuahter. Nai zarh ah Svalbard cu Russia nih cuh a timh bantuk in bia a chuah caah atu hi Norway cozah le Russia cu bia in an i tong lengmang. Cucaah Norway holh in thawngpang website ser cu Russia Propaganda a si ko, tiah ral kong le ram pehtlainak lei thiamsang nak hnih an chim.
Cu ve bantuk in Tanks le ralkap tampi he Russia ramri ah a hon fuhtu USA, NATO ram pawl siseh, sipuazi in vawlei a cul cuahmah mi Tuluk cu kan ral an si lo, IS hi kan ral lianbik a si ko tiah a chimmi zong cu Propaganda thar ngai a si ko.
Cc: Yahoo, Wikipedia
Comments
Post a Comment