Nihin Bawlung Biathli: UNITED Nih Hummels Cawk Ding An I Biatak

Laimi zong nih England hi kan uar tuk, kan duh tuk. Nihin ah Europe i Champions League ah quarter hmanh an chuih kho lo nain Premier League ti ahcun zei cu hme kan theih, ti u. Kanmah lawng kan si lo, Sport journal a tam u nih cun English Premier League thlihran hi an dawibik vemi a si ko.

Nihin biathli cu Champions League qaurter zoh dih in ka von khawmh suat. Laica reltu caah ka timi a si, i amah thawngpang lawng silo in Laica le holh thiamnak zong ah hman chih awk ah saduhthah khi a si.

Real Madrid ah a khongkhong timi Ronaldo, James te hna le manfak piin cawkmi Kroos te hna nih goal an sut kho lo. Asinain Manchester United i an va hlanmi ralkap Hernandez nih Real Madrid cu Semi-final a kaipi hna. Cucaah United in kan van thawk rih ko lai.

Tihni ah khan Hernandez cu Southampton hnukham he i thlen ding in khuah an rak ruah tiah bia a rak chuak. A si khawhnak a lam a tam, Real Madrid nih cawk thai zing in an duh rih lo i tu zan a goal mi nih Real hruaitu pawl an lung a thlen lo paoh ahcun Manchester United nih Southampton hnukham Clyne (EPL Team of the year ah aa tel lai tiah ruahmi a si) hi an duh tuk.

United nih Falcao cungah an lungtling lo tiah na rak ruat maw? Mah cu a si lo, tiah Mail nih a chim. United hruaitu bik Ed Woodwardhar nih Monaco-hruaitu hna cu tutan season a dih cun pund million £45 hrawng in cawk thai ding ah a hal hna. - Manchester United-fan pawl caah thawng ttha pakhat cu Real Madrid nih David de Gea cawk an tim tthan lo i Asmir Begovic timi an ngiar timi hi a si. David de Gea cu tutan Premier League player of ther ah thim khawh ding, a thiam bakmi a si caah United fan nih an siang lo rengreng tiah Express nih a tial.



United ah mi zapi lungthin le mit a phan ko i an kong van peh rih usih, a thinhung mi nan tlawmte lai. - Dortmund le Germany hnukham Mats Hummels cu United nih million £24 hrawng in Dortmund hruaitu sinah an hal cang tiah Germany tadinca minngei Bild nih a ttialmi Skynews nih a chim chin. United nih an halmi hna man hi a tlawmdeuh kho men, asinain tamdeuh pek ding zong an ngamh i kum 26 a simi Mats nih "A si khawh ahcun ram dang ah i tthial ning law, keimah caah le bawlung lei ah a ttha lai, tiah ka ruah," tiah a chim. - Adang pakhat man tam ngai in Van Gaal nih cawk a duhmi cu Atletico Madrid i akil lei tlimi Antoine Griezmann khi a si, i Spain club Real Sociedad (David Moyes manager tuannak) nih chawhkhenh ding a lawh cang caah a rannak in hnatlaknak tuah ding in Man U nih an hal hna tiah Todo Mercado Web nih a chimmi media dang nih an ttial chin.

Kan hnu hrawng cu Manchester City le Liverpool nih an minung thlen dih a herh ti a rak laar ngai. Atu ning te cun City cu tam lak an i thlen a herh ko rih. Asinain tulio a linsami Tottenham hi kan zoh si cun leiba tam tuk an ngei i 2013 kum i mi an rak cawk mi kha hlawh tamtuk an pek hna tikah an har ngai. Cucaah zuar khawh lo hmanh ah free- in chuah ding ah ruahmi hna cu: Roberto Soldado, Etienne Capoue, Paulinho le Vlad Chiriches hna hi an si. Cu hlan kum 5 hrawng ah a rak ttha ngaimi Aaron Lennon, Mousa Demble le Kaboul te pawl zong White Hart Lane ah hmun ngeih dawh an si lo. Adebayor tu hi nai hrawng a lang lo tuk nain a him tiah ruah a si i Benjamin Stambouli cu London Evening Standard nih a him ve lo tthal hin cun club dang a kawl hau ve lai, tiah a phuan. - An goalbawh Hugo Lloris tu hi Free in an siang lai lo, an rak cawk zah in an zuar khawh lo hmanh ah a sung lo ding in zuar an duh tiah Quardian nih a tial.

Liverpool nih Falcao cawk khawh dawh in a um than lo, ti ko usih. Italy hmaikal, Dortmund ah a chuih liomi Ciro Immobile cu cawk awk a tthat le that lo Liverpool nih an hlat cuahmah tiah Italy media nih an ttial tiah TV2 nih a chim. Amah hi goal a sut kho ngaimi cu a si i Falcao nakin a man zong tlawmdeuh dawh a si. Liverpool ah a hlawh tlin lo hlei ah serhsat a tong ngaimi Mario cu Liverpool nih an zuar lo hmanh ah Free- in an kal ter lai tiah zumh a si.

Yaya Toure le City cu lam i tthen ding a fiang ngai. Atu tthal ahhin hlan i a pu a simi Mancini nih Inter ah chuih ding in a duh tuk, nain a upa a rak chuihnak Arsenal ah hmun ttha ngeih dawh a si. City a um lio ah phaisa a duh tuk tiah an rak chim hnawh tawn i atu cu phaisa lawng a si lo, tlumtlak nak Club a biapi tiah Daily Star ah a chim. Yaya nih City a chuah tak a si ahcun Arsenal nih innka kan on an ti i a hlawh zatceo deng cu a ttum hau te hnga, i man dengte in an cawk te ttheo lai.

Arsenal nih tulio i an ngiat bikmi cu alaikal (midtfielder) a si bantuk in hnukham pakhat a tthami te an kawl cuahmah. Arsenal nih Argentina hnukham Emanuel Mammana timi hi biatak tein an dawi lio a si i tthal ahhin cun cawk khawh a si ti lai tiah ruahchannak a um nain Juventus le Atletico Madrid nih an zuamcawh ve hna caah a har ngaimi dirhmun a si ko rih.

Relchih: Tihni biathli

Biathli a si bantuk in bia vaivuan zong tampi dawh a si, media nih an chimmi kha a si lo, tiah club hruaitu le a chuihtu pawl nih an chim ttheo i pakhat le pakhat an i celhnak zong a si caah bawlung a huammi caah theih le rel a nuam sok, rel a duhmi caah ka van khomh tawn lai, ra tthan te.

Nan hawile zong kua chin hna u. (T-deh kong ah tt ka ti chel t lawng ka ti chel si, a rannak in tialmi si caah a reltu nih theithiam te ne u.)