Tutan cu Real Madrid in thawk u sih.
2000 kum ah Real Madrid president rian cu Florentino Perez nih a ttuan a thawk i Real Madrid hi "Galaticos" timi biafang hmang in bawlung vawlei ah a rak larter, nihin tiang a si ko. Kum tin hi leicung i minthang bawlungchuih thiam timi pakhat tal cu a rak cawk i a rak cawk hmasabik mi cu Luis Figo a si, atu hi Figo cu FIFA president ttuan ka duh a ti i politics a khel cuahmah. A hnubik kan zoh ahcun ni kum ah khan World Cup i minlang bik Toni Kroos le James Rodrigues a rak cawk hna. Zidane bia kan zumh a si ahcun Eden Hazard, EPL player of the year hmu ding ah zumhbik mi cu Real Madrid nih tu kum "Galaticos" caah cawk an timh tiah Daily Mirror nih cawnnili ni ah khan a ttial.
England ah kir usih law Chelsea nih Hazard cu an thlah sian lai ka zum lo. Nemanja Matic le Fabregas hi an form a tla ngai tiah Football-expert pawl an i ceih lenmi ruah tikah Mourinho nih a cohlang kho lai lo. Atu hin Southampton alaikal Morgan Schneiderlin khi cawk ding in a ruah pah i sau ngai a chuih ti lomi John Obi Mikel phaisa pinah chap ding in an ruahmi Express nih a ttial. Tu kum Chelsea ah a lang ngaimi cu hnukham Ivanovic a si, nain kum 30 a luan cang caah Chelsea phung ning in kum 1 cung minthut ter an si lo i mah cu a duh lo. Bayern Munchen nih an bawh ko tiah Daily Star nih a ttial i Mourinho nih a sian lem lo caah kum thum ca in minthutnak an tuah te kho men. Cawnninga ni ah Mourinho nih a siangngakchia tthing Bale le Varane cawk awk an ttha la maw tiah Real hruaitu a chawnh hna i an rak "nih" tiah tuni The Sun nih a ttial. Chelsea nih Falcao an duhnak an langhter ve, a ke zong dam lei a pan cang i a kum zong upa tuk a si lo caah hlan minthang cia cu OK ko lai, tiah ruahchannak an ngei.
Manchester United ah kal hma usih, annih hi an thil ti an i biaktak ngai. PSV Eindhoven ngeihchiah a simi Memphis Depay cu zahan kha Manchester a phan i United he biaruahnak an ngei. A hlawh tiang an ceih tiah bia a chuak. Tihni i Real Madrid semifinal ah a kuatu Hernandez cu Real Madrid nih tthal hin cun kan duh ti lai lo, an ti i Van Gaal nih a caah hmun um lo in a ruah caah khawimaw a kal te lai (Southampton si dawhbik a si). Van Persie zong kum khat te cu ManU ah ka um rih ko lai, a ti i an zuar lo hmanh ah a ralaimi kum ahhin a chuih caan a tlawmte te ttheo lai. Van Gaal nih hmaikal thar a kawl cuahmah.
Wesley Sneijder hi Van Gaal nih a upatmi pakhat ah aa tel an ti. Kum 30 a si cang i United alaikal caah an rak duh tawnmi pakhat zong a si, i Van Gaal nih a ruah pah. Sihmanhsehlaw, Metro nih a ttial ning ah Paris Saint-Germain nih cuh dawh an si i a rum tukmi PSG nih United nakin tamdeuh Galatasaray FC an pek hna ahcun Sneijder cu PSG ah hmuh a si te lai.
Arsenal an pu Wenger nih Real Madrid i a chuihmi ISCO a duh ti hi thuh awk a ttha lo. Malaga chuah tak a rak timh lio in a rak hal hna, ni kum zong ah Real a rak hal tthan hna. Atu tiang cu Isco nih a lu a lei hnawh rih nain Real Madrid nih phaisa an duh caah Euro million 30 hrawng in cun kan sian lai, an ti cang. The Sun nih a chim ning ah Wenger nih Southampton i a chuih liomi Victor Wanyama khi a duh, cucu amah Victor nih aa chimmi a si i a man zong an i ceih i £20million si dawh a si.
Ni kum ah khan bazar ah zoh a rak tongbik pakhat cu Sporting Lisboa ah a chuih liomi William Carvalho khi a si i Sporting nih an hauh mi a man a tam caah hohmanh nih an rak caw hna lo. Tutan cu club lian tampi nih an ngiat bu ah Arsenal nih biatak deuh in an nam lio.
Liverpool nih an Captain thar Jordan Henderson cu kum 5 ca in min an thutter khawh cang. Asinain Steven Gerrard a um ti lo hnu cun alaikal pakhat cu an herh hrimhrim caah Real Madrid i Asier Illarramendi khi cawk ding in an hal hna. Asier hi Real Sociedad i a rak um lio tein Liverpool nih an rak duh.
Tuni cawnninga ni ah Champions League Semi-Final chuih ding an i fiang cang i cu he pehtlai in ka zumhmi ka van ttial te lai, ka thawh tthat cu. Ra tthan te law, nan rel khawh in nan hawile kua chin ve hna u, an theih lo sual ah.
Relchap: Tihni Biathlia
Mangtha/chuntha u.
Comments
Post a Comment