Bawlung chawlet pawl caah tthal bazar an on deng cang. Ni 70 hrawng cu aa duh rih nain atu hin a tlawh in an tlawk cang. Club liandeuh pawl nih ahodah an cawk lai, i ahodah an zuar lai tiah an bawh hna. Bawlung chuih kum (season) a dih rih lo caah cu club nih anih an zuar lai, cawk an duh timi kha thawngpang i tial a si tikah tialmi club pawl caah hnahnawk ngai a si tawn i cucu an hrial. Sihmanhsehlaw, biathli timi cu tuchan ah a um kho huaha ti lo. An van chim luaimai ko hih:
Liverpool hi a ralaimi Season caah minung a caw hmasabik an si i zahan, zarhpini ah khan manager Brendan Rodger nih Goalbawh thar Caoimhin Kelleher timi kum 16 pa cu kum li ca in a cawk tiah Daily Star nih a ttial. Asinain, hi kum 16 pa nih hin atu an goalbawh Simon Mignolet, a thiam lo ngaingai mi pa hi a chawng kho colh hnga maw? Mah tluk cun a thiammi a si hnga maw?
Liverpool- siseh United fan pawl nih Radamel Falcao Liverpool ah aa tthial lai tiah bia a rak lengmi cu kan hnu zarh tiang kha an zum kho lo. Nain atu cu Daily Express nih Liverpool le Falcao an i chawnbia tiah a tial ai. Falcao agent Jorge Mendes nih Liverpool ah tthial ding in, hlanh si lo in a cawk in cawk ding in a chawnh lio hna a si. United nih Monaco in an rak lakmi Falcao cu ruahning bantuk in goal a cawm khawh hna lo caah a man a ttum tuk cang i Liverpool nih an cawk ding zong a ttha ngai kho tiah ruah a si. A man a ttum bu ah Liverpool nih man tam ngaingai in hmaikal cawk an timh ti khawh a si fawn.
Manchester United cu Ferguson aa dinh hnu ah man fak ngaiin mi an rak caw i atu cu an rim rua, a si khawh chung in a nodeuh mi le a man deng ttung i Falcao nakin goal sut kho deuhmi kan kawl lai, an ti. Daily Star nih a tialning ah atu hi PSV Eindhoven ah a chuih liomi Memphis Depay timi kum 21 pa cawk ding in an hal cuahmah hna. Depay cu Liverpool zong nih an leem cuahmah ve i a rauh hlan ah club lian ah aa tthial lai ti cu a fiang ngai.
United kong peh rih sih. Hmaikal a dang pakhat United nih an ngiat liomi cu PSG i Ezepuiel Lavezzi timi khi a si. A kum cu upa pah cang nain PSG nih tthal hin cun a duhnak club ah kal ding in an thlah hnik i England ah tthial a duh tiah theih a si. Liverpool nih kan hnu thla ah an duhnak an rak langhter pah i United maw Liverpool ah dek hmuh khawh si te dawh a is ko. United nih Club Brugges i a chuihmi kum 19 pa Obbi Oulare zong an duhnak an langh i Everton, Sunderland, Dortmund le Leverkusen nih an i cuh ve. - Southampton hnukham Nathaniel Clyne khi Van Gaal nih a duh tukmi atu le tu a langhter tikah Rea Madrid an hlanhmi hna Hernandez he kan i thlen ding ahcun kan duh ko lai, tiah Southampton nih an leh hna tiah Express nih a ttial.
Arsenal le Juventus nih an thapi an i chuah i an i eng ve. Ahodah an i cuh tiah cun Argentina miphun PalermosPaolo Dybala hi mino te a si i hmailei ah minthang ah aa chuah te lai tiah an ceihbikmi pakhat a si. Asinain amah lawng si ti lo, Napoli ah um a duh ti lomi Gonzalo Higuain cungah Juventus le Arsenal nih an mit an thlak veve. Juventus nih cun a naupa Nicolas Higuain an chawnh len cang, nain Arsenal hi Napoli a rak i tthial hlan ah tthial a rak duhnak a si tiin zapi theih a si.
Arsenal hnukham an der timi cu chim hau lo a si. Gabriel nih a von bawmh tuk hna nain hnukham an herh rih caah Espanyol i a chuihmi Mexican pa Hector Moreno khi Wenger le a bawmtu nih an duh ngaingai. Tottenham nih an leemnak a sau tuk cang, nain tuni i Express nih a ttial ning ah Hector nih a agent pa cu Arsenal thim ding in a chimh, ti a si. - Birmingham i an mino te Demarai Gray cu Arsenal nih an duh fawn i tthal cun a kum dih cang lai nain Birmingham ah um a duh ti lo caah minsen a thar a tial lo. Arsenal ah kal duh dawh a si.
Chelsea ah kan kal lai. Mourinho nih a chim tawnmi cu Mesut Ozil hi leicung a thiambik 10 lakah aa tel ti kha a si tawn. Atu hi Jose nih a ralaimi tthal bazar ah hin Ozil cawk ding in Wenger a hal cuahmah tiah FiChajes-Sport nih a ttial. Asinain Arsenal nih hlan bantuk in an club i min ngeibik le a thiam timi zuar an i timh ti lomi ruang ah har ngai dawh a si.
Premier League club pawl ahhin a si khawh chung in UK mi a si lo hmanh ah English si hna seh ti duh a si i England bawlung chuih thiam an kawl cio. Atu i West Ham kehlei hnukham Aaron Cresswell cu Chelsea nih pound million 20. in cawk an duh caah West Ham nih zuar ding an lung um nawn tiah Daily Express nih a ttial. Jose nih Brasil pa Filipe Luis cu ni kum ah a rak cawk nain Atletico Madrid i a rak chuihmi pa cu a hmang tuk lo. Cresswell cu English a si caah a duhdeuh fawn!
Peter Crouch in donghter usih. A lu in goal tam taktak a sut, England aiawh zong in a rak chuih balmi a si i atu hi NewCastle ah tthial dawh in an ceih. Asinain mah Newcastle timi cu Premier League i a tla cuahmah mi club khi si lo in Australia i Newscastle Jets timi Club khi a si tiah Mirror nih a ttial.
Note: Nikhat dan a si lole ni hnih dan in Bawlung Biathli rel khawh lengmang a si lai, ra tthan te. Facebook ah share zong tuah ding in kan sawm. Lungawi!
Comments
Post a Comment